Read Bhaibhiri Idzva rechiShona Ezekieri 48 Bible Online

Ezekieri 48 - Bhaibhiri Idzva rechiShona bible

Ezekieri 48

¹Aya ndiwo madzinza acho tichibvira kumuganho wokuchamhembe, kubva kugungwa tichienda nokuHetironi woenda nokwokunge tavakupinda muHamati kundosvika Hazarenoni (guta riri kumuganhu wokuchamhembe yeDhamasikusi kwakatarisana neHamati) ichibvira kumabvazuva ichienda kumadokero, dzinza rokwaDhani, mugove mumwechete.

²Dzinza rokwaAsheri, mugove mumwechete, unobvira kumuganhu wokumabvazuva kusvikira kumuganhu wokumavirira wakabatana nenyika yokwaDhani.

³Dzinza rokwaNafutari, mugove mumwechete, unobvira kumabvazuva kudakara kumadokero wakabatana nenyika yokwaAsheri.

⁴Dzinzawo rokwaManase, mugove mumwechete, unobvira kumabvazuva kudzamara kumavirira wakabatana nenyika yokwaNafutari.

⁵Dzinza rokwaEfuremu, mugove mumwechetewo, unobvira kumabvazuva kudzamara kumadokero wakabatana nenyika yokwaManase.

⁶Dzinza rokwaRubheni mugove mumwechete unobvira kumabvazuva kudzamara kumavirira wakabatana nenyika yokwaEfuremu.

⁷Dzinza rokwaJudha mugovewo mumwechete unobvira kumabvazuva kudzikara kumadokero wakabatana nenyika yokwaRubheni.

⁸Nyika yokwaJudha inofanira kunge yakabatana nedunhu riya ramuchatsaura rigochengetedzwa rinobvira kumabvazuva kusvikira kumavirira riya rina upamhi hunoita gumi ramakiromita rine makiromita maviri ane hafu. Rinenge rakareba sokureba kwakangoitawo mumwe womugove yamadzinza kubvira kumabvazuva kusvikira kumadokero iine Nzvimbo Inoera mukati mayo.

⁹Dunhu ramuchatsaurira Tenzi rinofanira kuita makiromita gumi namaviri ane hafu kureba, kufara kwacho kuchiita gumi ramakiromita.

¹⁰Iyoyi ndoichava migove yedunhu rinoera: vapristi vanofanira kuva nomugove wakareba kuita makiromita gumi namaviri ane, chikamu chepakati nepakati chekiromita kudivi rokuchamhembe upamhi hwacho kudivi rokumadokero huchiita makiromita mashanu uye kudivi rokumabvazuva kuchiitawo makiromita mashanu, kurebawo kwedivi rokumaodzanyemba kuchiita gumi ramakiromita rina makiromita maviri ane chikamu chepakati nepakati chekiromita, Nzvimbo Inoera yaTenzi iri pakati payo.

¹¹Ipapa panofanira kuva pavapristi vakateketererwa kuna Mwari, vanakomana vokwaZadhoki vakaramba vari pabasa rangu, vasina kuenda mutome, vanhu veIsiraeri pavakaenda mutome sezvakaitwa navaRevhi.

¹²Pachava pavo, chiri chikamu chavakapiwa chinobva panzvimbo inoera kwazvo yakabatana nenyika yavaRevhi.

¹³VaRevhi vachava nemugove wavo wenyika yakavambirana neyavapristi inoita makiromita gumi namaviri ane hafu kureba iine upamhi hunoita makiromita mashanu. Kureba kwayo kwose kuchaita makiromita gumi namaviri ane hafu iine upamhi hunoita makiromita mashanu.

¹⁴Havafaniri kuitengesa kana kutsinhanisa kana kachidimbu zvako kayo. Havafaniri kurasa mugove iwoyu wedunhu irori rakakosha nokuti idhunhu rinoereserwa Tenzi.

¹⁵Panenge pasara pacho pakafara kuita makiromita mashanu uye pakareba kuita makiromita gumi namaviri ane hafu, panofanira kuva pokushandiswawo zvapo neguta iroro kuita pokugara uye kuva mafuro aro.

¹⁶Zvino aya ndomakuriro aichange yakaita, kudivi rokuchamhembe kunoita makiromita maviri ana mamita mazana maviri namakumi mashanu. Kudivi rokumaodzanyemba kuchaitawo makiromita maviri ana mamita mazana maviri namakumi mashanu. Kudiviwo rokumabvamazuva kuchange kuchiita makiromita maviri ana mamita mazana maviri ana makumi mashanu, kudivi rokumavirira kuchiita makiromita maviri ane mamitawo mazana maviri ane makumiwo mashanu.

¹⁷Guta iroro richava namafuro akadai izvi, kuchamhembe kuchaita zana ramamita rina mamita makumi maviri namashanu uye kumaodzanyemba kuchiitawo zana ramamita rina mamitawo makumi maviri namashanu uyewo kumabvazuva kuriwo zana ramamita rina makumi maviri amamita ana mamita mashanuwo kwozoti kumadokero kuchiitawo zana ramamita rine mamitawo makumi maviri ane mashanu.

¹⁸Panenge pasara uchitevedza kwakareba kwacho kwedunhu pachange pachiita makiromita mashanu kumabvazuva uye makiromita mashanu kumavirira. Inenge ichitevedza dunhu rinoera, michero yayo ichava kudya kwavashandi vomuguta iroro.

¹⁹Vashandi vomuguta vanobva kumadzinza ose eIsiraeri vacharimamo.

²⁰Dunhu iroro rose ramuchasarudza rinofanira kunge rakaenzana mativi ose divi richiita makiromita gumi namaviri ane hafu zvichisanganisira dunhu rinoera pamwechete nenzvimbo yeguta iroro.

²¹Ndima yose inosara kumativi maviri edunhu rinoera nenzvimbo yeguta iroro inofanira kuva yashe ichitangira paya panoita makiromita gumi namaviri nehafu padunhu rinoera riya ichindosvika kumuganhu wokumabvazuva, kwouya kumadokero ichitangirawo paya panoitawo makiromita gumi namaviri ane hafu ichindosvika kumuganhu wokumadokero yakatevedza migove yenyika dzamadzinza iwayo, ichava nyika yashe. Kubvisa dunhu riya rinoera neNzvimbo Inoera yeTemberi iri mukati maro

²²kubvisawo nyika yavaRevhi nenzvimbo yeguta racho zviri pakati penyika yomugove washe, zvimwe zvose izvi, zviri pakati pemiganhu yekwaJudha naBhenjamini ndezvashe.

²³Sezvakangoita mamwe madzinza ose, kubva kumabvazuva kusvika kumadokero, dzinza rokwaBhenjamini rinowana mugove mumwechete.

²⁴Dzinza rokwaSimioni rinowana mugove waro mumwechete unobvira kumabvazuva kusvika kumadokero wakabatana nenyika yokwaBhenjamini.

²⁵Dzinza rokwaIsakari rinowana mugove mumwechete unobvira kumabvazuva kusvika kumadokero wakabatana nenyika yokwaSimioni.

²⁶Dzinza rokwaZebhuroni rinowana mugove mumwechete unobvira kumabvazuva kusvika kumavirira wakabatana nenyika yokwaIsakari.

²⁷Dzinza rokwaGadhi rinowanawo mugove mumwechete unobvira kumabvazuva kusvika kumavirira wakabatana nenyika yokwaZebhuroni.

²⁸Muganhu wenyika yokwaGadhi nedivi rokuNegevhu, kumaodzanyemba, muganhu wokumaodzanyemba uchatangira kuTamari wonanga kumvura yokuMeribhakadheshi wobva waenda nokuKakova keIjipiti kundosvika kuGungwa Guru.[56]

²⁹“Ndiyo nyika yacho iyi yamuchagovera senhaka kumadzinza eIsiraeri. Iyoyi ndiyo migove yakasiyana-siyana yavo.” Ndizvo zviri kutaura Tenzi Mwari.

³⁰Nzvimbo dzokubuda nadzo muguta ndidzo idzi: dzinoti: Kuchamhembe kwacho kunoita makiromita maviri ana mamita mazana maviri ane makumi mashanu kwaerwa

³¹kunova nemisuo mikuru mitatu inoti, Suo Guru rokwaRubheni neSuo Guru rokwaJudha neSuo Guru rokwaRevhi, misuo mikuru iyoyo ichatumidzwa mazita amadzinza eIsiraeri.

³²Kwouya kumabvazuva kuchange kuchiita makiromita maviri ana mamita mazana maviri namakumi mashanu, ngakuve nemisuo mikuru mitatu inoti Suo Guru rokwaJosefi neSuo Guru rokwaBhenjamini neSuo Guru rokwaDhani.

³³Kwouyawo kumaodzanyemba, kwacho kunenge kuchisvika makiromita maviri ana mazana maviri emamita ane mamita makumi mashanu kuve nemisuo mikuru mitatu inoti, Suo Guru rokwaSimioni neSuo Guru rokwaIsakari neSuo Guru rokwaZebhuruni.

³⁴Kozouya kumadokero, kunoitawo makiromita maviri ana mazana maviri amamita ana mamita makumi mashanu, kuchaita misuo mikuru mitatuwo inoti, Suo Guru rokwaGadhi neSuo Guru rokwaAsheri neSuo Guru rokwaNafutari.

³⁵Kureba kweguta iroro rose kuritenderera, kuchange kuchiita makiromita mapfumbamwe. Izvozvo zita reguta rinenge rava kuzonzi, “Tenziaripo.”