Read Bhaibhiri Idzva rechiShona Ezekieri 5 Bible Online

Ezekieri 5 - Bhaibhiri Idzva rechiShona bible

Ezekieri 5

¹Tsama nhatu dzevhudzi raEzekieri. “Zvino iwe mwanakomana womunhu tora bakatwa rakapinza urishandise sechisvo chokuveurisa uveure musoro wako nendebvu dzako. Wozotora zviyereso zvokuyeresa wokamuranisa vhudzi iroro.

²Chimwe chezvikamu zvitatu zvevhudzi iroro unofanira kuchipisa mumoto pakati chaipo peguta. Kana mazuva okukombwa kwaro azopera, unotora chimwewo chikamu charo chiya wochidimura-dimura nebakatwa kutenderera guta iroro. Zvino chimwewo chikamu charo chechitatu unochimwaya kumhepo uye ndichavaburitsira bakatwa muhara rivaronde.

³Unofanira kutsamhura katsama kaduku pana irori woripfundira kumucheto wegemenzi rako.

⁴Uye pavhudzi irori unofanira kutora rimwe worikanda mumoto woripisa mumoto. Kubva ipapo moto uchauya uchitungidza imba yeIsiraeri yose.”

⁵Zvanzi naTenzi Mwari, “Ndirorika guta reJerusaremu iri randadai kumisa pakati pamarudzi avanhu nenyika dzakaikomberedza.

⁶Asi rakapandukira zvirevo zvangu zvakaipa kupinda mamwe marudzi uye mirao yangu kutopfuura nyika dzakaikomberedza nokuramba zvirevo zvangu uye nokusatevedza mirao yangu kwavakaita.

⁷Naizvozvo zvanzi naTenzi Mwari, pamusana pokuti iwe unotutumara kudarika marudzi akakukomberedza uchiregera kutevedza mirao yangu kana kuchengeta zvirevo zvangu asi wakachengeta zvirevo zvamarudzi akakukomberedza,

⁸ndokusakawo zvanzi naTenzi Mwari, chiona, iniwo ndava kukumukira ini iyeni uye ndichaita zvandakatema kuita pakati pako marudzi achiona.

⁹Uyewo pamusana pezvinosemesa zvako zvose ndichaita kwauri zvandisati ndamboita uye zvinhu zvakadaro handimbofa ndakazviitazve.

¹⁰Ndizvozvo, vabereki vachadya vana vavo mukati menyu navanawo vachidya vabereki vavo ndoita zvandakatema kuita pamuri; kuwana vanenge vangopunyuka ndichavamwararisa kumativi ose.

¹¹“Naizvozvo, sezvandiripo kudai, ndizvo zviri kutaura Tenzi Mwari, zvedi, pamusana pokuti wakan'oresa nzvimbo yangu inoera nezvinhu zvenyu zvisingadiwe nezvose zvinosemesa zvenyu; naizvozvowo ini ndichakuparadzai. Handimbokuitirai tsiye nyoro kana kukuitirai tsitsi.

¹²Chimwe chezvikamu zvenyu zvitatu zvavanhu chichafa nedenda kana kuparara nenzara pakati penyu, chimwe chacho chichaurayiwa nebakatwa munharaunda yenyu. Chikamu chechitatu ndichachimwararisa kumativi ose chakabatirwa bakatwa mumaoko.

¹³“Ndiwo maperero achaita hasha dzangu, pandichapedzera shungu dzangu pavari ndobva ndagutsikana. Ndipo pavachaziva kuti ini ndakataura ndiine shanje, kana ndapedzera shungu dzangu pavari.

¹⁴Uyezve ndichaita kuti usare wangova nyikawo zvayo nechinhu chinoshoreka pakati pemarudzi ari munharaunda yako nomumaziso avapfuuri nenzira vose zvavo.

¹⁵“Iwe uchava chinhu chinozvidzwa nechitukiso neyambiro chaiyo nechinhu chinokatyamadza kumarudzi omunharaunda yako pandichaita zvandakatema kuita pamuri ndakashatirwa ndakapaka uye nechirango chinorwadza kwazvo. Ini iyeni Tenzi ndini ndazvireva.

¹⁶Ipapo ndichavakanda miseve inouraya yeshangwa yenzara nemiseve yokuparadza yandichavatepfenurira kuti ndikuparadze ndichiita kuti pauri shangwa yenzara irambe yongotsviriridza ndikushayisei chokudya chokukuraramisai nacho.

¹⁷Ndichakutumirai shangwa yenzara nezvikara zvesango, zvichakurozvai vana, denda richakuvingai ropa richideuka pakati penyu ndichikuuyisirai bakatwa pamuri iyemi. Ini Tenzi ndini ndazvireva.”