Read Bhaibhiri Idzva rechiShona Ezekieri 6 Bible Online

Ezekieri 6 - Bhaibhiri Idzva rechiShona bible

Ezekieri 6

¹Izwi raTenzi rakauya kwandiri richiti, “Mwanakomana womunhu,

²chinangana namakomo eIsiraeri uporofite kwavari

³uchiti, ‘Imi makomo eIsiraeri, inzwai izwi raTenzi Mwari! Zvanzi naTenzi Mwari kumakomo nezvikomo namakoronga namapani chionai ndava kukuunzirai bakatwa iyeni ndichizoparadza nzvimbo dzenyu dzakatunhumara dzokuteurira.

⁴Atari dzenyu dzichasara dzangova atari zvadzo dzisina chinhu neatari dzenyu dzorusenzi dzichaputswa. Uye ndichakanda vokwenyu vanenge vaurayiwa pamberi pezvifananidzo zvenyu zvokunamata.’

⁵“Ndichati kata-kata zvitunha zvavanhu veIsiraeri pamberi pezvifananidzo zvavo zvokunamata. Mapfupa enyu ndichaita kuti amwarariswe pamativi ose eatari dzenyu.

⁶Kwose kwose zvako kwamunogara, maguta enyu achasara angova magutawo zvawo asina chinhu nzvimbo dzenyu dzakatunhumara dzokuteurira dzaparadzwa zvokuti atari dzenyu dzichasara pasisina chinhu, dzaparadzwa. Zvifananidzo zvenyu zvokunamata zvichaputswa zvichiparadzwa; atari dzenyu dzorusenzi dzichipwanywa, mabasa enyu achibva apera kutsvairwa.

⁷Vanhu vanenge vaurayiwa pakati penyu vachati rakata. Ndipo pamuchazoziva kuti ini ndini Tenzi.

⁸“Asi vamwe venyu, ndichavarega vari vapenyu. Kana pakati pamarudzi ipapo, mukava navamwe vanopunyuka bakatwa napamunenge mamwarariswa kudzinyika,

⁹ipapo vamwe venyu vanenge vapunyuka vachandirangarira vari mukati memarudzi kwavanenge vakaendwa navo kuutapwa pandichaparadza mwoyo wavo woruchiva wakabva kwandiri ukapofomadza meso avo voita kamwoyomwoyo kokupindukira kuzvifananidzo zvavo zvokunamata. Saka zvichaita kuti vazvishore pamusana pouipi hwavakaita nezvinhu zvavo zvinondisemesa.

¹⁰Ndipo pavachazoziva kuti ini ndini Tenzi. Handina kutaura pasina kuti ndichavaitira zvakaipa izvi.”

¹¹Zvanzi naTenzi Mwari, “Rova-rovanisai maoko muchitamba-tambisa makumbo muchiti, ‘Maiwe-e kani inga zvatiwana, pamusana pezvinosemesa Mwari zvose zvemba yaIsiraeri, nokuti vachafa nebakatwa, neshangwa yenzara, nedenda.’

¹²Vari kure vachafa nedenda, vari pedyo vachafa nebakatwa, vanenge vasara vachengetedzeka vachafa neshangwa yenzara. Ndiko kupedzera hasha dzangu pavari kwandichaita.

¹³Ndipo pamuchaziva kuti ini ndini Tenzi panenge poti zvitunha zvavo pasi katakata mukati mezvifananidzo zvavo zvokunamata zvatenderedza atari dzavo pazvikomo zvose, napamusoro pemakomo ose, nepasi pemuti woga woga una mashizha manyoro napasi pomiti yose yemioku yakati gudegude napose pavanopira zvinonhuwira kuzvifananidzo zvavo zvose zvokunamata.

¹⁴Ndichasimudza simba reruoko rwangu kuvarwisa ndichiita kuti nyika isakare isare yangova nyika zvayo kwose kugere vanhu kubvira kurenje kusvika kuRibhura.[3] Ndipo pavachaziva kuti ini ndini Tenzi.”