Read Bhaibhiri Idzva rechiShona Ezekieri 7 Bible Online

Ezekieri 7 - Bhaibhiri Idzva rechiShona bible

Ezekieri 7

¹Izwi raTenzi rakauya kwandiri richiti,

²“Iwe mwanakomana womunhu zvanzi naTenzi Mwari kunyika yeIsiraeri, hokuno kuguma. Kuguma kwagogodzera kumativi mana enyika.

³“Isiraeri zvino pako pakuperera, ndava kuzokuratidza kuti ndakakushatirirwa ndichakutonga maererano namaitiro ako, ndichikurangira zvinhu zvako zvose zvinosemesa.

⁴Handichakuitira tsiye nyoro kana kukuitira tsitsi asi ndichakurangira nzira dzako zvinosemesa zviri pakati pako. Ipapo ndipo pamuchazoziva kuti ini ndini Tenzi.”

⁵Zvanzi naTenzi Mwari, “Nhamo dzichavirikana. Heyo nhamo youya!

⁶Kuparara kwauya, kwauya kuparara kwakumukirai!

⁷Hoko kwauya! Mugumo wako wasvika iwe mugari wenyika ino, nguva yasvika, zuva raswedera, zuva rebongozozo kwete romupururu wokufara mumakomo.

⁸Iye zvino ndava kukuvirukira nehasha ndipedzere hasha dzangu pauri ndichikutonga maererano namaitiro ako ndichikurangira zvinhu zvako zvose zvinosemesa.

⁹Handichakuitira tsiye nyoro kana kukuitira tsitsi asi ndichakurangira nzira dzako idzodzo nezvinosemesa zviri pakati pako. Ipapo ndipo pauchazoziva kuti ini ndini Tenzi anorova.”

¹⁰Hero zuva riya, hero rouya! Kuparara kwako kwasvika! Kushaya ruenzaniso kwapfumvudza, kuzvikudza kwatumbuka.

¹¹Utsinye hwakura kutoitawo kamuitiro chaiko kouipi. Hakuna nomumwe wavo achasara kana zvinhu zvavo zvakawanda kunyange upfumi hwavo kana kuzovawo nembiri pakati pavo.[4]

¹²Nguva iya yauya, zuva riya raswedera. Mutengi ngaarege hake kupembera kufara kunyange iye mutengesiwo kuchema nhamo nokuti hasha dzavirukira gungano ravo rose.

¹³Chiripo ndechokuti mutengesi haasi kuzodzokera kune zvaakatengesa zviya vachiri vapenyu nokuti hasha dzawira gungano ravo rose hadzisi kudzokera shure uye pamusana pouipi hwake, munhu haakwanise kuzviponesa upenyu hwake.

¹⁴Varidza bhosvo vakaita kuti vose vagadzirire. Asi hapana ari kusumuka kuenda kuhondo nokuti hasha dzangu dzavirukira gungano ravo rose.

¹⁵Kunze uku kune bakatwa, mukati mune denda neshangwa yenzara. Vari musango vari kupera nebakatwa, vari mukati meguta vari kupera kufa neshangwa yenzara nedenda.

¹⁶Kana vamwe vakapunyuka, vachava mumakomo senjiva dzomumakan'a, vose zvavo vachichema nhamo; munhu wese achichema uipi hwake.

¹⁷Vose varukutika maoko, vose zvino mabvi yava mvura zvayo kurukutika.

¹⁸Vava kupfeka masaga; kutya kwavabata. Vose uso, dzangova nyadzi dzoga, misoro yose, yangova miparavara.

¹⁹Sirivha yavo vavakutoirasa mumigwagwa, ndarama yavo yaita sechinhu chakan'ora. Sirivha yavo nendarama hazvigoni kuvanunura pazuva rehasha dzaTenzi. Hazvigoni kupedza nzara yavo kana kuzadza matumbu avo nokuti ndozvakanga zviri chibingamupinyi nehonzeri youipi hwavo.

²⁰Zvishongo zvayo zvinoyevedza, vaizvishandisira mbiri isina maturo vachigadzira zvifananidzo zvavo zvokunamata zvsingadiwi naMwari nezvinhu zvavo zvinosemesa. Naizvozvo iniwo ndaita kuti zvinhu zvavo izvozvo zvive zvinhu zvakan'ora kwavari.

²¹“Ndichaisa zvinhu izvozvo mumaoko mevechirudzi senyama yamagora uye kunavaipi vapanyika sechinhu chokupamba vagochin'oresa.

²²Ndichavafuratira kuitira kuti vanhu vagon'oresa nzvimbo yangu yakakosha. Makororo achapindamo vagoin'oresa

²³vagoita nyonganyonga. “Pamusana pokuti nyika yazara nemhosva dzokudeura ropa, gutawo rizere noutsinye.

²⁴Ndichaunza rudzi rwakaipisisa kuzovatorera dzimba dzavo. Zvokuzvikudza kwavo ndichazvipedza, nzvimbo dzavo dzinoera dzichin'oreswa.

²⁵Kudandaura nenhamo pakuchauya vachatsvaga rugare asi pachange pasina.

²⁶Nhamo dzichaita mututemutute, marehwarehwa asingaperi. Vachatsvagira chiporofita kumuporofita pasina; kumupristi zvomutemo zvinenge zvaparara, kuvakuru vakuru mazano kunenge kusisina.

²⁷Mambo achachema nhamo, jinda rozanga kuora mwoyo uye vanhu munyika varukutiswa maoko nokutya. Ndichavaitira zvinofambirana nokuita kwavo uye ndichavatonga nekatongero kavo. Ipapo ndipo pavachazoziva kuti ini ndini Tenzi.”