Read Bhaibhiri Idzva rechiShona Ezekieri 8 Bible Online

Ezekieri 8 - Bhaibhiri Idzva rechiShona bible

Ezekieri 8

¹Mugore rechitanhatu mumwedzi wechitanhatu pazuva reshanu romwedzi iwoyo pandakanga ndakagara pasi mumba mangu, vakuru vakuru vokwaJudha vagere pamberi pangu, simba roruoko rwaTenzi Mwari rakaturukira pandiri.

²Ipapo ndakatarisa ndiye onei chimwe chine chimiro chinenge chomunhu.[5] Kubvira mainge muchiuno make zvichienda pasi wakanga uri moto uye kubvira muchiuno zvichikwira kumusoro kwaitarisika sokupenya kuchingarikira sendarira.

³Iye akatambanudza chainge ruoko akandibata zhumu romusoro wangu. Izvozvo Mweya wakandisumudza mudenga pakati pedenga nenyika akandiendesa muzviratidzo zvaMwari kuJerusaremu pokupinda napo peSuo Guru renhandare yomukati yakatarisa kuchamhembe pakanga paine paigara chimufananidzo chokunamata cheshanje chaikonzera Mwari shanje.

⁴Ndakaona mbiri yokuvapo kwaMwari weIsiraeri iripo sezvandakanga ndamboona muchiratidzo chomubani.

⁵Akanditi, “Iwe mwanakomana womunhu simudza musoro wakatarisa kuchamhembe.” Saizvozvo ndakasimudza musoro ndakatarisa kuchamhembe, onei kuchamhembe kweSuo Guru rokuAtari pamusuo pakanga paine chimufananidzo chiya chokunamata cheshanje.

⁶Akanditi, “Iwe mwanakomana womunhu, uri kuona here zvavari kuita izvi zvinondisemesa kwazvo zviri kuitwa muno nemba yaIsiraeri? Vari kuzviitira here kuti vanditandanisire kure neNzvimbo yangu Inoera? Uchatoona zvinosemesa kwazvo kupinda izvozvi.”

⁷Akaenda neni kumusuo wenhandare pandakatarisa ndakaona kuti paive neburi murusvingo.

⁸Akanditi, “Iwe mwanakomana womunhu, tiginura murusvingo imomu.” Ndakati tigunurei murusvingo imomo wanei pane musuo,

⁹ndokunditizve, “Pinda uone zvakaipisisa kwazvo zvinosemesa zviri kuitwa muno.”

¹⁰Saizvozvo ndakapinda ndikaona imomo makanzi charavanda mumadziro kuatenderedza, zvinhu zvinokambaira zvemhando nemhando dzose nemhuka dzinosemesa nezvifananidzo zvose zvokunamata zvemba yaIsiraeri.

¹¹Pamberi pazvo pakanga pamire makumi manomwe avarume vari vakuru vakuru vemba yaIsiraeri vaina Jaazaniya mwanakomana wokwaShafani amire pakati pavo. Mumwe nomumwe wavo aiva nebisiro rorusenzi muruoko. Izvozvo gore routsi hworusenzi hwaitogoka mudenga.

¹²Iye akabva anditi, “Iwe mwanakomana womunhu waona here zviri kuitwa murima navakuru vakuru vemba yaIsiraeri, munhu oga oga ari mumba make memifananidzo? Chiripo ndechokuti vari kutozviti, ‘Tenzi haatione, Tenzi akafuratira nyika ino.’ ”

¹³Akatiwo kwandiri, “Uchatoonawo zvimwe zvinosemesa zvakakurisa zvavanoita.”

¹⁴Akandiunza pokupinda napo peSuo Guru rokuchamhembe remba yaTenzi ndikaona vakadzi vakati mbwe-e kugara vachihwihwidza kuchema Tamuzi.[6]

¹⁵Akati kwandiri, “Wazviona here izvi nhai iwe mwanakomana womunhu? Uchaona zvimwe zvinosemesesa zvakakura kupinda izvi.”

¹⁶Akapinda neni munhandare yomukatikati memba yaTenzi, onei pamusuo weTemberi yaTenzi pakati pekamba kepamusuo neatari paine varume vaikarosvika makumi maviri navashanu vakapira gotsi Temberi yaTenzi vakatarisa kumabvazuva vachipfugamira zuva kumabvazuva.

¹⁷Iye akabva anditi, “Wazviona here izvi nhai mwanakomana womunhu? Inyaya diki here iyi yokuti imba yokwaJudha kuita zvinosemesa zvavari kuita muno izvi kutozadza zvavo nyika noutsinye uye kundishatirisa? Chitarisa uone vanoisa bazi kumhuno dzavo.

¹⁸Naizvozvo zvandava kuita ndavakuita ndakashatirwa ndisingaite tsiye nyoro kana kunzwa tsitsi kunyange vakabongomora kuchema handisi kuzovateerera.”