Read Bhaibhiri Idzva rechiShona Dhanieri 9 Bible Online

Dhanieri 9 - Bhaibhiri Idzva rechiShona bible

Dhanieri 9

¹Mugore rechiposhi raDhariusi mwanakomana waAhasuerusi wechizvarwa chavaMidhi akava mambo paumambo hwavaKaridhea,

²mugore rake rokutanga kutonga, ini Dhanieri ndakanzwisisa nomumabhuku uwandi hwamakore akanga ataurwa naTenzi nomuromo womuporofita Jeremiya kuti Jerusaremu inofanira kupedza makumi manomwe amakore iri dongo.

³Ipapo ndakatarisa kuna Tenzi Mwari ndichimutsvaka nomunamato neminyengetero nokutsanya ndakapfeka hanzu dzemasaga ndakazvidira dota.

⁴Ndakanamata kuna Tenzi, Mwari wangu ndichireurura ndichiti: “Imi Tenzi, Mwari mukurukuru anotyisa anochengeta chitenderano achiitira mwoyochena kuvanhu vanomuda vanochengeta mitemo yake;

⁵takatadza, takaita zvakaipa, takakanganisa. Takapanduka tikatsaukana nemitemo nemirao yenyu.

⁶Hatina kuteerera varanda venyu vaporofita vaitaura nomuzita renyu kumadzimambo edu nokumachinda edu nokumadzibaba edu uye kuvanhu vose zvavo venyika iyoyi.

⁷Imimi Tenzi, ndimi muridzi woururami asi isusu, uso inyadzi dzoga dzoga sezvazviri pari nhasi kuvanhu vokwaJudha kuvagari veJerusaremu nokuIsiraeri yose zvayo vari padyo navari kure chaiko kunyika dzose zvadzo kwamakavadzingira pamusana pounyengedzi hwavakaita kwamuri.

⁸Tenzi, kwatiri uso inyadzi dzoga dzoga uye nokumadzimambo edu nokumachinda edu nokumadzibaba edu pamusana pokuti takakutadzirai.

⁹Imimi Tenzi Mwari wedu ndimi muridzi wetsitsi nokuregerera nokuda kokuti isu takakupandukirai

¹⁰tikarega kuteerera zvamakareva imi Tenzi Mwari wedu tichitevera mitemo yenyu yamakatipa nomuromo wavaranda venyu, vaporofita.

¹¹Isiraeri yose zvayo yakatyora mutemo wenyu ikatsauka ichiramba kuteerera zvaunotaura. Ipapo rushambwa nemhiko zviya zvakanyorwa mumutemo waMosesi muranda waMwari zvakawodzvorerwa patiri pamusana pokuti takakutadzirai.

¹²Akatsigira shoko rake reyambiro yake yaakatipa isu navatongi vedu vaititonga nokutiunzira kwaakaita jambwa guru nokuti kwose zvako pasi pedenga hakuna kwakamboitwa zvakafanana nenhamo yakapinzwa Jerusaremu.

¹³Jambwa irori rakatiwira sokunyorwa kwazvakaitwa mumutemo waMosesi. Asi isu hatina kukutetai imi Tenzi, Mwari wedu tichipinduka kuuipi hwedu nokugamuchira chokwadi chenyu.

¹⁴Naizvozvo Tenzi akatichengetera jambwa ndokuriita kuti ritiwire nokuti Tenzi, Mwari wedu akarurama mumabasa ake ose aakaita asi isu hatina kuteerera izwi rake.

¹⁵“Saka zvino imi Tenzi Mwari wedu imi makaburitsa vanhu venyu munyika yeIjipiti nesimba roruoko rwenyu mukazviwanira zita sezvazviri nhasi uno, isu takatadza, takaita zvakaipa.

¹⁶Tenzi, hasha dzenyu ngadziserere, kushatirirwa guta renyu reJerusaremu chikomo chenyu chinoera kupore maererano namaitiro enyu akarurama nokuti pamusana pezvitadzo zvedu nouipi hwamadzibaba edu, Jerusaremu navanhu venyu vakava chiseko chenyika chavanhu vari munharaunda yatiri.

¹⁷Saka naizvozvo, imi Mwari wedu, rerekerai nzeve yenyu kumunamato womuranda wenyu nokumunyengetero wake uye muchizviitira iyemi Tenzi pachenyu, cheukaiwo Nzvimbo yenyu Inoera yakadai kuva dongo.

¹⁸Nhai Mwari wangu rerekerai nzeve yenyu munzwe, zarurai maziso enyu muone kuparara kwataita neguta rinodaidzwa nezita renyu. Chatinodariro ndechokuti kunyengetera kwatiri kuita kwamuri kudai hakusi kuti isu takarurama, asi kuti pamusana petsitsi dzenyu dzakawanda.

¹⁹Tenzi inzwai Tenzi regererai. Tirimukai muwane zvamungaite, musanonoke zvenyu, muchizviitiremi, Mwari wangu, nokuti guta renyu navanhu venyu zvinodaidzwa nezita renyu.”

²⁰Pandainamata ndichitaura kudaro ndichireurura kutadza kwangu nokutadza kwavanhu vokwangu, vaIsiraeri ndichisvitsa kuteterera kwangu pana Tenzi, Mwari wangu ndichinamatira chikomo chinoera chaMwari wangu

²¹ndichitaura kudaro mumunamato, munhu uya, Gabhurieri wandakanga ndaona muchiratidzo pokutanga paya, akauya kwandiri achibhururuka semhepo kumhanya panguva yechibayiro chamanheru.

²²Akanditsanangurira achiti: “Dhanieri, chandabudira iye zvino kuzokupa ungwaru nokunzwisisa.[14]

²³Pakutanga kwawaita kuteterera kwako ndipo pabuda shoko randauya kuzokutaurira nokuti iwe uri wapamwoyo chaiye saka wochirangarira shoko racho unzwisise chiratidzo ichi.

²⁴“Vanhu vokwako neguta rokwako rinoera makatemerwa makumi manomwe amakore akapetwa kanomwe okuti kukanganisa kupere nokugumisa chitadzo nokuripira uipi nokuunza ururami hunogara nokusingaperi uye nokutsinhira chiratidzo nomuporofita nokuzodza Nzvimbo Inoera.[15]

²⁵Saka wochiziva unyatsonzwisisa kuti kubvira panotaurwa shoko rokugadzirisa nokuvakazve Jerusaremu kusvikira panouya muzodzwa,[16] muchinda, pachaita masvondo manomwe. Richavakwa kwamasvondo makumi matanhatu nemaviri richivakwa patsva namabwe nenhandare nemigero yacho asi muchange muri munguva yenhamo.

²⁶Mushure memasvondo makumi matanhatu namaviri muzodzwa achagurwa pake pachimuperera. Ipapo vanhu vomuchinda achauya vachaparadza guta neNzvimbo Inoera. Kuguma kwacho kuchauya samafashamo iri hondo chete kusvikira kumagumo, zvokuparara zvakatotemwa.

²⁷Achaita chitenderano chakasimba navazhinji kwesvondo rimwechete. Kwechikamu chepakati napakati pesvondo racho, achaita kuti zvibayiro nemipiro zvimbomira. Panzvimbo pazvo zvinhu zvinosemesa Mwari parutii rweTemberi pachava nechinosemesa Mwari chiya kusvika kumagumo kusvikira chirevo chokuparadza mharadzi iyoyo chatemwa.”