Read Bhaibhiri Idzva rechiShona Hosea 10 Bible Online

Hosea 10 - Bhaibhiri Idzva rechiShona bible

Hosea 10

¹VokwaIsiraeri vaiva mugirepisi wakanyatsopasa kwazvo uchibereka michero yawo. Waiti ukawadzura kubereka michero, ivo ndopovovaka atari neatari. Sokubudirirawo kwaiita nyika yavo ndokunyatsogadziridzwawo kwavaiita shongwe dzamabwe dzakamisirwa vamwari vavo.

²Vane mwoyo wokunyengera; nokudaro vanofanira kupfukirwa nemhosva yavo. Tenzi achaparadza atari dzavo achipaza shongwe dzavo dzamabwe dzakamisirwa vamwari vavo.

³Ndinodaro nokuti iye zvino izvi vachati, “Hatina mambo nokuti hatityi Tenzi. Zvino mambo chaangatiitirewo pakadaro ndechipi?”

⁴Kutaura kwavo, ndezvepamuromo chete, kana voita zvitsidzirano vanoita mhiko dzechipameso. Saka kutonga kwakarurama kwava bise[14] runomera mumvinga dzomumunda.

⁵Vagari vomuSamaria vari kudedera vachityira zvimhuru zvokuBhetiavheni. Vanhu veko vachazvichema navapristi vazvo, vanamati vezvifananidzo vachazvichema, mbiri yazvo inenge yasasamuka.

⁶Naichowo chichatakurwa kuendwa nacho kuAsiria somutero kuna mambo mukuru. VokwaEfuremu vachanyadziswa, vokwaIsiraeri vachinyadziswa nezano[15] ravo ravanotevedza.

⁷Mambo weSamaria achaparara sakabanzu kanoyangarara pamvura.

⁸Nzvimbo dzakatunhumara dzokuteurira kuna Avheni, chitadzo chevokwaIsiraeri, dzichaparadzwa. Minzwa norukato zvichamera paatari dzavo, vachati kumakomo, “Tihwandisei,” kuzvikomo vachiti, “Tiwirei.”

⁹“Imi vaIsiraeri, kubvira pamazuva aye okuGibhea, makapara zvitadzo, kubvira ipapo makaramba muchingotadza. Hondo haichavasvikira here kuGibhea ikoko.

¹⁰Pandinenge ndada, nzenza dzevanhu idzodzo ndichadziranga, uye vachamomoterwa nevechirudzi pavanenge vachirangirwa zvitadzo zvavo zvakapetwa.

¹¹“VokwaEfuremu vainge vari tsiru rakapingudzwa raifarira kupura. Ndichaisa joko pamutsipa waro wakanaka, ndichabopa vokwaEfuremu; vokwaJudha ndivo vacharima vokwaJakobho vachatimbinura pasi.

¹²‘Zvidyirirei ururami mukohwe mwoyochena bandirai minda yenyu yakararira nokuti ino ndiyo nguva yokutsvaka Tenzi kuti auye kuzonayisa ruponeso pamuri.’

¹³Makarima uipi mukakohwa zvisina ruenzaniso, makadya muchero wenhema. Pamusana pokuti makavimba nengoro dzenyu dzehondo[16] nokuwanda kwavarwi venyu vehondo,

¹⁴naizvozvo mukati mevanhu venyu muchamuka manyongori ehondo, nzvimbo dzenyu dzokuzvidzivirira muhondo dzose zvadzo dzichaparadzwa, sokuparadzwa kwakaita Sharumani guta reBhetiaribheri pazuva rakarwiwa hondo, madzimai akaitwa kanyamakanyama pamwechete nevana vavo.

¹⁵Izvozvo ndozvichaitwawo kwamuri imi vemba yokuBhetieri,[17] pari pamusana pouipi hwenyu hwakakura kudai. Mambo wokwaIsiraeri achanyatsotsakatiswa mambakwedza.”