Read Bhaibhiri Idzva rechiShona Hosea 11 Bible Online

Hosea 11 - Bhaibhiri Idzva rechiShona bible

Hosea 11

¹“Isiraeri paakanga achiri mwana mudiki, ndaimuda. Ndakadaidza mwana wangu iyeyu kubva kuIjipiti.

²Pandaimudaidza ndopaainyanya kutsaukana neni. Vakaramba vachipira zvibayiro zvavo kuna Bhaari uye vachipisirawo rusenzi kuzvifananidzo zvokunamata.

³Asi iyeni ndini ndakadzidzisa vokwaEfuremu kufamba. Ndaivatakura mumaoko asi zvokuziva kuti ndini ndaivarapa, havana kuziva.

⁴Ndaivatungamirira netambo yengoni pamwe neyamabhande orudo. Ndakavasimudza somwana muduku pachipfuva changu ndikakotama ndichivapa chokudya.

⁵“KuIjipiti havachadzokera asi Asiria ndiyo ichavatongao nokuti vakaramba kudzokera kwandiri.

⁶Hondo ichatsviriridza mumaguta avo ichityoranisa zvihuri zvemisuo mikuru yavo, ichivaparadza mutsvingo dzavo dzokuzvidzivirira nadzo muhondo.

⁷Vanhu vangu vaomarara nenyaya yokutsaukana neni. Saka joko nderavo hapana anovakumura.

⁸“Ndingagokurasai seiko nhai vokwaEfuremu? Ndingagokutii kuche mumaoko avo seiko nhaimi vokwaIsiraeri? Ndingagokubatai somubatiro wandakaita guta reAdhima here, kana zvandakaita kuguta reZebhoimu? Mwoyo wangu unoramba mukati mangu. Mwoyo wangu wetsitsi uri kutoramba uchiwedzera kukudai.

⁹Handicharatidza hasha dzangu dzinotyisa, vokwaEfuremu, handichavaparadza zvakare nokuti ini ndiri Mwari handisi munhu, iye Anoera, ndiri pakati penyu uye handisi kuuya kuzoparadza.[18]

¹⁰Vachatevera Tenzi iye achidzvova seshumba, achidzvova kudaro vana vake vachauya vachidedera vachibva kumadokero.

¹¹Vachauya vachibhabhama seshiri vachibva kuIjipiti, senjiva, vachibva kunyika yeAsiria ndichivadzosera kumisha yavo, ndozviri kutaura Tenzi.”

¹²VokwaEfuremu vandikomberedza namanyepo, vembawo yokwaIsiraeri vachindikomberedza nounyengedzi. Asi vokwaJudha vanofamba naTenzi[19] uye vakatendeseka kuna iye Anoera.