Read Bhaibhiri Idzva rechiShona Hosea 12 Bible Online

Hosea 12 - Bhaibhiri Idzva rechiShona bible

Hosea 12

¹VokwaEfuremu vanoita ushamwari nemhepo, vachiswerodzingirirana zuva rese nemhepo yokumabvazuva zvayo. Nhema noutsinye, ndizvo zvavanowanza vachiita zvibvumirano neAsiria vachituta mafuta kuaenda kuIjipiti.

²Tenzi ane mhosva yaari kupa vokwaJudha, acharanga vokwaJakobho maererano nezviito zvavo achivatsividza maererano nezviito zvavo.

³Jakobho, achiri mudumbu, akanga akabata chitsitsinho chomukoma wake, kuzoti ava murume mukuru akaita tsimba naMwari.

⁴Jakobho akaita tsimba nomutumwa akabva akurira, akachema achimukumbira chikomborero. Akasangana naMwari paBhatieri ipapo Mwari akataura naye,[20]

⁵iye Tenzi, Mwari wehondo nehondo dzavarwi, zita rake raanodaidzwa naro izita rokuti Yahweh.

⁶Saka imimi, norubatsiro rwaMwari wenyu, tendeukai, mubatisise rudo noruenzaniso mumirire Mwari wenyu nguva dzose.

⁷“Munhu wemhindu dzokutengesa zvinhu ane chikero mumaoko chinonyengedza, chaanongoda chete kudzvanyirira vamwe.

⁸VokwaEfuremu vanotozviti zvavo, ‘Hauoneka, ndiri mupfumi, ndazozviwanira upfumi.’ Asi upfumi hwavo hwose ihwohwo haumbovapunyutsa pamhosva yavakapara.

⁹Ndini Tenzi, Mwari wenyu, ndakakubvisai kunyika yeIjipiti. Ndichaitazve kuti mugare mumisasa yamatendhe sezvinoitwa panguva yamazuva makuru akatemwa.

¹⁰Ndini ndaitaura kuvaporofita, ini ndini ndaionesa zviratidzo nezviratidzo,[21] ndichipawo nokuvaporofita mienzaniso.

¹¹MuGireadhi mune uipi, vanhu vasina maturo; muGirigari muchipirwa zvibayiro kuhandira, atari dzavo dzichaitawo semirwi zvayo yamatombo mumigero yomumunda.”

¹²(Jakobho akatizira kunyika yeAramu iye Isiraeri kwaakandoita ugariri achiitira mukadzi, akafudzira hwai mukadzi.)

¹³Tenzi akaburitsa Isiraeri kuIjipiti achizviita nomuporofita, nomuporofita akavachengetedza.

¹⁴VokwaEfuremu vakamudenha zvakaipisisa; nezvo Tenzi achamurega achipfukirwa nemhosva yokudeura ropa. Tenzi achamutsividza kutsvinya kwake ikoko.