Read Bhaibhiri Idzva rechiShona Hosea 13 Bible Online

Hosea 13 - Bhaibhiri Idzva rechiShona bible

Hosea 13

¹Painge vokwaEfuremu votaura, vanhu vaidedera, vairemekedzwa kwazvo muIsiraeri asi vakapara mhosva, pamusana paBhaari, vakafa.

²Iye zvino vari kungoramba vachipara zvitadzo pamusoro pezvimwe; vari kuzviumbira zvifananidzo zvesimbi, zvifananidzo zvokunamata zvakanyatsogadzirwa zvesirivha zvose zviri zvinhu zvakaitwa namaoko avanhu vachitoti kuvanhu, “Pirai zvibayiro kune zvizvi,” vanhu vachitotsvoda zvimhuru.

³Naizvozvo vachangoita semhute yamangwanani; kana sedova risingatani kupera, sehundi inondimuka paburiro, kana kuti soutsi hunobuda napahwindo.

⁴“Ndini Tenzi, Mwari wako kubvira kunyika yeIjipiti. Hakuna mumwe Mwari waunoziva kusiya ini, kunze kwangu hakunazve mumwe muponesi.

⁵Ini ndini ndaikuchengeta[22] murenje munyika yakaoma.

⁶Ndakakufudzai mukaguta. Pamakanga maguta, makabva mapindwa nomwoyo wokuzvikudza mukabva mandikanganwa.

⁷Saka ndichava seshumba kwavari, ndichavahwandira munyasi menzira sembada.

⁸Ndichavawira sebere rabvutirwa vana varo. Ndichavatsemura dundundu ndigovazhanya seshumba sokubvamburwa kwavangaitwe nechikara chesango.

⁹“Ndakakuparadzai, imi vaIsiraeri ndiani achakununurai?

¹⁰Zvino iye mambo wenyu aripiko kuti akuponesei? Machinda enyu ose aripiko kuti akudzivirirei? Ivo vamaiti, ‘Tipeiwo mambo namachinda.’

¹¹Ndakakupai madzimambo ndakashatirwa nehasha, ndikavabvisawo nehasha.

¹²“Uipi hwevokwaEfuremu hwakapfundirwa, chitadzo chavo chakachengetwa mupfimbi.

¹³Zvaita semimba yarwadza yokuberekwa kwavo, mwana wacho oita zungairwa otadza kuuya kumusuo wedumbu.

¹⁴Ndovanunura here mumaoko menzvimbo yavachakabvu? Ndovanunura here kurufu? Nhai rufu nhamo dzaunoonesa dziripiko? Nhai nzvimbo yavachakabvu kuparadza kwako kuripiko? Zvetsiyenyoro handichisina.

¹⁵Kunyange zvazvo akapasa setsanga dutu rokumabvazuva dutu raTenzi richauya richatutuka kubva kurenje; chitubu chavo chichaoma kuti papata, chisipiti chake chichaoma kuti gwa. Richarozva upfumi hwavo nechose zvacho chakakosha.

¹⁶Samaria ichapfukirwa nemhosva yayo nokuti yakapandukira Mwari wayo. Vacharakatiswa kufa nehondo yepfumo, pwere dzavo dzichipwatitsirwa pasi madzimai avo akazvitakura achitumburwa.”