Read Bhaibhiri Idzva rechiShona Hosea 14 Bible Online

Hosea 14 - Bhaibhiri Idzva rechiShona bible

Hosea 14

¹Imi vaIsiraeri, dzokerai kuna Tenzi, Mwari wenyu nokuti makadhadharika pamusana pouipi hwenyu.

²Chidzokerai kuna Tenzi namazwi okuteterera mundoti kwaari, “Tibvisireiwo uipi hwose mugamuchire waro zvinenge zvakanaka tichipira muromo watinotaura kwamuri sehandira.

³Nyika yeAsiria haimbotiponesa zvamabhiza, hatisiri kuzoatasva. Hatisiri kuzombotaura kuzvinhu zvatakagadzira namaoko edu tichizviti, ‘Nhai Mwari wedu.’ ” Mamuri imimi, nherera ndomadzinowana nyasha.

⁴“Umhandupandu hwavo ihwohwo ndichahurapa, ndichavada zvangu pachena nokuti kuvashatirirwa kwandanga ndakaita, ndazvidzora.

⁵Ndichaita sedova kuIsiraeri igotumbuka seruva rejongwe igodzika midzi somupopura

⁶nhungirwa dzayo dzichipasa uko nokoko, kuyevedza kweIsiraeri kuchaita sekwemuorivhi, kunhuwirira kwayo, kuchiita sekwenyika yeRebhanoni.

⁷Vachadzoka kuzogara mumumvuri wangu vagoita sebindu rizere nezvirimwa. Vachapfumvudza somugirepisi kunhuwirira kwavo kuchiita sewaini yeRebhanoni.

⁸Nhaimi vokwaEfuremu Munei nezvifananidzo zvokunamata? Inini ndini ndinokupai mhinduro ndini ndinokuchengetai. Ini ndakaita somusaipurasi unogara wakasvibira, kwandiri ini ndokunobva michero yenyu.”

⁹Munhu wose ano ungwaru, ngaanzwisise zvinhu izvozvi, ani naani zvake anofunga ngaazive zvinhu izvi, nokuti makwara aTenzi makwara akarurama, uye vakarurama vanofamba maari asi vakaipa vanogumburwa nawo.