Read Bhaibhiri Idzva rechiShona Hosea 5 Bible Online

Hosea 5 - Bhaibhiri Idzva rechiShona bible

Hosea 5

¹“Chinzwai, imi vapristi, muteerere imi vemba yokwaIsiraeri, muteye nzeve imi vemba yokwamambo, nokuti mhosva yacho ndeyenyu pamusana pokuti imi, ndimi makava chokuteya nacho vanhu kuMizipa'ku, mumbure zvawo wakachinzi wareware kuteyewa paGomo reTabhori,

²mukaita hunza yakadzika kuShitimu asi ndichakurangai mose zvenyu.

³VokwaEfuremu ndinovaziva hapanawo chokwaIsiraeri chakavanzika kwandiri nokuti kutaura kuno imi vokwaEfuremu makaita ufeve imi vokwaIsiraeri man'ora.”

⁴Twavanoita twava kuvatadzisa kudzokera kuna Mwari wavo nokuti mweya woufeve uyu uri mavari, uye havazivi Tenzi.

⁵Kuzvitutumadza kwevokwaIsiraeri, kwava kuvapfukira, vokwaEfuremu vachadzedzereka nemhosva yavo iyoyo, vokwaJudhawo vachadzadzarika pamwechete navo.

⁶Nezvibayiro zvemombe nezvimwewo zvipfuwo vachaenda kundotsvaka Tenzi, asi havazi kuzomuwana nokuti kwavari akabva.

⁷Havana kuva pachokwadi naTenzi nokuti vakaita vana vomusango. Zvino Zuva guru rokugara kwomwedzi ndorichava kuparara kwavo iyemi neminda yenyu.

⁸Ridzirai hwamanda muGibhea, nebhosvo muRama, muridze huhwi muBhetiavheni. Narwoyi rwokurwisa imi vokwaBhenjamini

⁹Efuremu ichasara yangova nyika zvayo, isina chinhu pazuva rayo rokurangwa. Zvandiri kutaura ini ichokwadi ichocho mukati memadzinza okwaIsiraeri.

¹⁰“Machinda okwaJudha angovawo savanhu vanobvisa hoko yomuganhu, hasha dzangu dzichadirana pavari semvura.

¹¹VokwaEfuremu vari kudzvinyirirwa kutongwa kwavo ndokwekumbunyikidzwa, pamusana pokuti vakaramba voda zvisina maturo.[7]

¹²Naizvozvo ini ndava sechipfukuto kune vokwaEfuremu uye sechiundudzi kune vemba yokwaJudha.

¹³“VokwaEfuremu pavakaona chirwere chavo, vokwaJudha vachionawo ronda ravo, ipapo vokwaEfuremu vakaenda kuAsiria votuma nhume kuna mambo mukuru uya. Asi zvokukurapai haasi kuzokwanisa kana kuporesa ronda renyu.

¹⁴Ndinodaro nokuti kune vokwaEfuremu ndichaita seshumba chaiyo, kune vemba yokwaJudha ndichaita semhondoro ichiri kuzvinzwa. “Ini iyeni pachangu ndichavabvambura ndigoenda zvangu ndichizvuzvurudza pasina anogona kununura.

¹⁵“Ndichadzokerazve kunzvimbo yangu kusvikira vabvuma mhosva yavo vachizonditsvaga, vapindwa nenhamo kudaro vava kunditsvaga vachiti.”