Read Bhaibhiri Idzva rechiShona Hosea 7 Bible Online

Hosea 7 - Bhaibhiri Idzva rechiShona bible

Hosea 7

¹Ndichiporesa vokwaIsiraeri, kuipa mwoyo kwevokwaEfuremu kuchaiswa pachena, nezviito zvakaipa zveSamaria zvichange zvichiiswawo pachena nokuti vanoita ujarijari uku mbavha dzinopaza kunze uku, mabhinya achipamba.

²Asi havambofungi kuti inini ndinoyeuka zvakaipa zvavo zvose. Zvino zvitadzo zvavo zvakavakomberedza ini ndiri kuzviona zvangu.

³“Vanotobata mambo kumeso nouipi hwavo vachibata kumeso machinda nounyengedzi hwavo.

⁴Vose zvavo, imhombwe, dzinoita sehovhoni yapisa, ine mubiki amborega zvake kukuchidzira moto, achimbokanya mukanyiwa kusvikira watutumuka nembiriso.

⁵Pazuva guru ramambo, machinda akarwara nomudumbu, vakabva vadziirwa newaini mambo akatobatana zvake maoko nevashonhi.

⁶Ndinodaro nokuti sokupisa kunoita hovhoni, ivo vanotorwa mwoyo netwavanoronga, usiku hwose zvahwo hasha dzavo dzinorariropfumbuka, mumangwanani umu dzichin'anduka serimi romoto.

⁷Vose zvavo vanopisa sehovhoni vanoparadza vatongi vavo. Madzimambo avo ose akaurayiwa hapana kunyange mumwechete wavo anonamata kwandiri.

⁸“VokwaEfuremu vava kudyidzana nevechirudzi, vokwaEfuremu vava kunge mbodza zvayo yechingwa.

⁹Vatorwa vari kuvasveta simba asi ivo havasi kumbozviziva, vhudzi ravo rava neimvi, asi havasi kuzviziva.

¹⁰Kuzvitutumadza kwevokwaIsiraeri kwavapfukira zvino asi havasi kudzoka kuna Tenzi, Mwari wavo, kunyange kumutsvaka pamusana pezvose izvozvi.

¹¹VokwaEfuremu ava vakaita senjiva yakazungaira inoita zvisina musoro, vanoridzira mhere yorubatsiro kuIjipiti pedzepo voenda kuAsiria.

¹²Vachiendako kudaro, ndichati pamusoro pavo mumbure wangu ware ware ndivarakatise seshiri dzedenga ndichivarangira zviito zvavo zvakaipa.[10]

¹³“Zvichavawana zvavo ivo vakatetereka vachibva kwandiri, kuparadzwa ndokwavo, nokuti vakandipandukira. “Kuvanunura, ndaigona zvangu kuvanunura asi vanotaura manyepo nezvangu.

¹⁴Havanamati kwandiri nemwoyo wose asi vanohwihwidza kuchema vari pamibhedha yavo. Pavanokumbira mbesanwa newaini vanonamata vachizvicheka-cheka muviri vachitondipandukira zvavo.[11]

¹⁵Kunyange zvazvo, ndiri ini zvangu, ndakavadzidzisa ndichivasimbaradza, asi ivo vakaita bangano rokutondipandukira zvavo.

¹⁶Vanotendeukira kundonamata Bhaari vachiita souta hwakakombama-kombama. Machinda avo achafa nehondo yebakatwa pamusana pokuzvizuwidza kwavanoita nomuromo wavo. Izvozvi izvi zvichavaita kuti vave chiseko chaicho kunyika yeIjipiti.”