Read Bhaibhiri Idzva rechiShona Hosea 8 Bible Online

Hosea 8 - Bhaibhiri Idzva rechiShona bible

Hosea 8

¹“Nomuromo wako, chiridza bhosvo sezvo vemba yokwaTenzi vatova nyama yemagora nokuti vakatyora chitenderano changu ini navo vakatyora mutemo wangu.

²Kwandiri ndokwavanochema vachiti, ‘Nhai Mwari wangu! Inga isu vokwaIsiraeri tinokuzivai wani!’

³Asi vokwaIsiraeri ivavo, vakasema zvinhu zvakanaka, muvengi achavaronda.

⁴“Vakagadza madzimambo avo vasina kumboti ini ndive mukati mazvo; vakazvisarudzira machinda vasina kundizivisa nesirivha yavo, nendarama yavo, vakazvigadzirira zvifananidzo zvokunamata kuri kuzvitsvakira kuparadzwa.

⁵Ndinosema kwazvo mhuru yako yaunoeresa, iwe guta reSamaria. Ndinovirukira nehasha vanhu ivavo. Kuchasvika rinhi chaizvo kuti vokwaIsiraeri vazova vanhu vavatsvene.

⁶Inga wani zvakabva muIsiraeri. Zvakagadzirwa nemhizha mhuru iyoyo, haisi Mwari. Mhuru yacho inoereswa muSamaria ichapwanyiwa kuti mwarara[12]

⁷nokuti vanodyara mhepo vachakohwawo chamupupuri; mashanga zvawo akangomira asina hura asingape upfu. Dai aipa upfu, vatorwa ndovaitohudya zvavo.

⁸Asi Isiraeri yamedzwa iyi. Yatova zvayo somudziyo usina basa mukati mevechirudzi.

⁹VokwaIsiraeri idhongi zvaro, romusango riri kudzungaira roga nokuti vakakwira kuAsiria, vokwaEfuremu vakaita zvokutondotenga zvikomba.

¹⁰Kunyange zvazvo vakaita zvokubhadhara vatorwa vokuvakuta, mukati mevechirudzi ndichavakokorodza zvangu iye zvino uno vamborega kwakanguva kadiki zvokugadza mambo namachinda.

¹¹“Kunyange vokwaEfuremu vakavaka zvavo atari neatari dzokupfupirira zvitadzo, atari dzacho dzava atari dzokuparira zvitadzo.

¹²Ndikavanyorera zviuru zvemitemo yangu; ivo, vanotoshama kuti ndochii ichochi.

¹³Zvokupira zvibayiro ndizvo zvavanofarira vanoitaka chibayiro chenyama vodya nyama iyoyo asi Tenzi haambozvifarira iye zvino ava kutorangarira uipi hwavo agorangira zvitadzo zvavo. Vachapishinukira kwakare kuIjipiti,

¹⁴nokuti vokwaIsiraeri vakakanganwa Musiki wavo vakavaka mizinda. VokwaJudha vakavakawo maguta etsvingo akawanda asi ndichatuma moto pamaguta avo, ucharoromesa nzvimbo dzavo dzokuzvidzivirira muhondo.”