Read Bhaibhiri Idzva rechiShona Joeri 1 Bible Online

Joeri 1 - Bhaibhiri Idzva rechiShona bible

Joeri 1

¹Shoko raTENZI iri rakauya kuna Joeri mwanakomana waPetueri richiti;

²Inzwai munzwe izvi, imi vechikuru chikuru, rerekerai nzeve mose, imi vagari venyika iyi! Ko zvakadai izvi zvakamboitikawo here mumazuva enyu, kana mumazuva amadzibaba enyu?

³Zvirondedzerei kuvana venyu, vana venyu vaudzewo vana vavo, vataurirewo chimwewo chizvarwa,

⁴kuti zvakasiiwa nomuteteni, vana vemhashu, zvadyiwawo nehwiza dzegwatakwata; uye zvakasiyiwamo zvasiyiwawo nemhashu dzegute, zvadyiwawo nehwiza dzegwatakwata; uye zvakasiyiwa nehwiza dzegwatakwata zvadyiwa nemhashu dzinorozva.

⁵Pepukai imi zvidhakwa muhwihwidze kuchema muridze mhere imi mose vanwi vewaini pamusana pewaini itsva nokuti maibvutirwa iri pamuromo.

⁶Nokuti kwaita rudzi rwavanhu vauya kuzorwisa nyika yangu, rudzi rune simba rusingaverengeki. Mazino arwo, mazino eshumba chaiwo, mbangura dzamazino arwo anenge mazino eshumba hadzi.

⁷Rwaparadza migirepisi yangu rukatsemura-tsemura mikuyu yangu. Rwakayikwatura ganda rayo rukarikanda pasi, matavi ayo akati ngwerewere kuchena.

⁸Ungudzai semhandara yakapfeka masaga iri kuchema chikomba chayo chousikana.

⁹Zvomupiro wembesanwa nomupiro wokuteura, pamba yaTENZI zvamiswa, vapristi vari kuchema, ivo vashandiri vaTENZI.

¹⁰Minda yaparara, ivhu riri kuchema nokuti mbesanwa dzaparadzwa. Waini yavakupera mafuta eorivhi avakupwa.

¹¹Ngazvikudumbirei imi varimi veminda. Ridzai mhere vachengeti vemigirepisi, chemai koroni nebhari nokuti zvokukohwa mumunda zvaparara.

¹²Mugirepisi wasvava, muonde warezuka. Mupomegiraneti nomurara nomuapuru nemiti yesango yose zvayo yauna. Rufaro muvanhu rwapera.

¹³Pfekai masaga muungudze imi vapristi, hwihwidzai kuchema, imi vashandi vepaatari. Pindai murare makapfeka masaga imi vashandiri vaMwari wangu nokuti zvomupiro wembesanwa nomupiro wokuteura zvamiswa mumba yaMwari wenyu.

¹⁴Tsaurai zuva rokutsanya kokerai musangano wezvokunamata muunganidze vakuru vakuru navagari vose zvavo venyika iyi kumba yaTENZI, Mwari wenyu mucheme kuna TENZI.

¹⁵Hameno zvenyu nezuva iroro nokuti zuva racho raTENZI rava kusvika rinouya sezuva rokuparadza kwaSamasimbaose.

¹⁶Handiti chokudya chatiperera takatarisa uye mhururu norufaro zvakatiperera mumba yaMwari wedu?

¹⁷Mbeu dzakauna mumavhinga akaoma, mokuchengetera mbesa maparara matura angova matongo zvawo nokuti mbesa dzashayikwa.

¹⁸Idzo mhuka rangove jemedzanwa! Matanga emombe azvishayira pazvo nokuti mafuro hapachisina kunyange namatangawo ehwai zvavakukangaidzikawo.

¹⁹Ndochema kwamuri TENZI nokuti moto waririmisa mafuro erenje rimi romoto rapisa miti yose zvayo yesango.

²⁰Kana nemhukawo dzesango dziri kuchema kwamuri nokuti hova dzemvura dzaoma motowo wakarorormesa mafuro erenje.