Read Bhaibhiri Idzva rechiShona Joeri 3 Bible Online

Joeri 3 - Bhaibhiri Idzva rechiShona bible

Joeri 3

¹“Ndinodaro nokuti, tarisai mumazuva iwayo, panguva iyoyo pandichadzosera pakare vokwaJudha neveJerusaremu makomborero avo,

²ndichakokorodza ndudzi dzose dzavanhu ndidzidzikise kubani reJehoshafati ndigovagadza dare ikoko ndichiitira vanhu vangu, ivo nhaka yangu, Isiraeri, nokuti vakavamwararisa mukati memarudzi uye vakaganhura-ganhura zvavo nyika yangu.

³Vakatoitirawo vanhu chi'ange; mukomana chaiye vachimutsinhanisa nepfambi; musikana vachimutengesa newaini vakatoinwa.

⁴“Ndochii chamuri kundiitira ichochi? Nhaiwe Tire newe Sidhoni nemi matunhu ose avaFirisitia? Mune chamuri kunditsividza here? Kana kuti muri kunditsividza? Ndichakasikawo kuita kuti zviito zvenyu zvibva zvakupfukirai nenguva isipi

⁵nokuti makatoraka imi sirivha yangu nendarama yangu mukatakura henyu upfumi hwangu hwakakosha kutemberi dzenyu.

⁶Makatengesaka imi vanhu vokwaJudha neJerusaremu kuvaGiriki muchivaendesa kure nenyika yavo.

⁷Asi zvino ndichavamutsa kuti vachibva kunzvimbo dzacho kwamakavatengesa uye ndichaita kuti mupfukirwe nezviito zvenyu.

⁸Ndichatengesawo vana venyu vakomana navasikana kuvaJudha, ivowo vagovatengesa kuvanhu veSabia kurudzi rwokure nokuti TENZI ataura.

⁹“Zivisai zvinhu izvi mukati memarudzi zvokuti, ‘Gadzirirai kurwa hondo, mutsai magamba mwoyo, varwi vehondo vose ngavaswedere padyo, ngavakwidze kuno.

¹⁰Pfurai miromo yenyu yamagejo muiite mapakatwa mupfure zvigero zvenyu zvokupemhenesa kuita mapfumo. Ndonda ngaazvitiwo, ndiri gamba rehondo ini.

¹¹Itai chipatapata muuye, imi mose marudzi ari munharaunda'mu, unganidzanai ikoko. Burutsai magamba enyu ehondo imi TENZI.’ ”

¹²“Marudzi ngaamuke akwire kubani reJehoshafati nokuti ikoko ndokwandichagadza dare marudzi ose omunharaunda'mu.

¹³Pinzai jeko nokuti kukohwa kwasvika. Pindai mutsike-tsike nokuti mokusvinira waini machiti shutu kuzara. Makate ari kufashukira nokuti uipi hwavo hwakura.”

¹⁴Gurumwandira, negurumwandira muBani rokutemera zvinofanira kuitwa nokuti zuva raTENZI roswedera muBani rokutemera zvinofanira kuitwa.

¹⁵Zuva nemwedzi zvichaora kusviba nyenyedzi dzigorega kupenya.

¹⁶Izvozvo TENZI achadzvova ari muguta reZioni achiburitsa izwi rake ari muJerusaremu matenga nenyika zvigondengendeka asi TENZI ndiye diziro ravanhu vake nhare chaiyo yokuhwanda hondo kuvanhu veIsiraeri.

¹⁷Nezvo muchaziva kuti ndini TENZI, Mwari wenyu akaita musha wake muguta reZioni gomo rangu rinoera uye Jerusaremu richava guta rinoera. Vatorwa havazofazve vakatsikanomo.

¹⁸Zvino pamusi iwoyo makomo achachucha waini inonaka zvikomo, zvichiyerera mukaka uye tukova twose twokwaJudha twuchayererawo mvura chitubu chichatubuka mumba yaTENZI chichindodiridza Bani reShitimu.

¹⁹Ijipiti ichava renje zvaro Edhomu ichiva renje risina chinhu kutsivawo utsinye hwakaitwa kuvanhu vokwaJudha nokuti vakadeura ropa risina mhosva munyika yavo.

²⁰Asi nyika yokwaJudha ichagara vanhu nokusingaperi Jerusaremuwo ichagarwa pazvizvarwa zvose zvazvo.

²¹Ndichatsividza ropa ravo uye handisi kuzombopembedza munhu ane mhosva, nokuti TENZI anogara muguta reZioni.