Read Bhaibhiri Idzva rechiShona Amosi 1 Bible Online

Amosi 1 - Bhaibhiri Idzva rechiShona bible

Amosi 1

¹Aya ndiwo mazwi okusuma aAmosi mumwe wavafudzi vokuTekowa, chaiva chiri chioneso chaitaura nezveIsiraeri. Izvozvo maive muri munguva yaUziya mambo wokwaJudha, uyewo muri munguva yaJerobhoamu, mwanakomana waJoashi mambo wokwaIsiraeri makore maviri kundengendeka kwapasi kusati kwaitika.

²Akati, “TENZI ari kudzvova ari kuZioni, ari kudaidzira ari kuJerusaremu mafuro avafudzi ari kuchema mvura, pamusoro pegomo reKarimero paomerwa.”

³TENZI ari kuti, “Pamusana pokutadza rutatu rutatu kweDhamasikusi kutosvika runa handimborega kuiranga, nokuti vakakuya vanhu vokuGireadhi nezvirhei zvesimbhi.

⁴Saka ndichatumira moto kumba yaHazaeri, ucharoromesa nzvimbo dzaBhenihadhadhi dzokuzvidzivirira nazvo muhondo.

⁵Ndichatyora zvihuri zveDhamasikusi ndigotsakatisa vagari vomubani reAvheni[1] naiye ane umambo kuBhetiedheni. Vanhu veSiria vachatapwa vachiendeswa kunyika yeKiri,” ndizvo zviri kutaura TENZI.

⁶Zvanzi naTENZI, “Pamusana pokutadza rutatu rutatu kweguta reGaza kutosvika zvaro runa, handimborega kuriranga nokuti vakatapa vanhu rudzi rwose zvarwo rwavanhu vakaenda narwo kundovati kuche mumaoko eEdhomu.

⁷Saka iniwo ndichatumira moto kurusvingo rweGaza, ucharoromesa nzvimbo dzaro dzokuzvidzivirira nadzo muhondo.

⁸Ndichatsakatisa vagari veAshidhodhi naiye ane umambo kuAshikeroni. Nesimba roruoko rwangu, ndicharanga guta reEkironi, marimbirimbi akasara avaFirisitia achaparara,” ndizvo zviri kutaura TENZI Mwari.

⁹Zvanzi naTENZI, “Pamusana pokutadza rutatu rutatu kweguta reTire kutosvika runa, handimborega kuriranga; nokuti vakakukura kutapa vanhu, rudzi rwose rwavanhu vakaenda narwo kuEdhomu vachirega kurangarira chibvumirano chavakaitirana paukama.

¹⁰Naizvozvo ndichatumira moto parusvingo rweguta reTire ugororomesa nhare dzaro dzokuzvidzivirira nadzo muhondo.”

¹¹Zvanzi naTENZI, “Pamusana pokutadza rutatu rutatu kwenyika yeEdhomu kutosvika zvayo runa, handimborega kuiranga, nokuti yakaronda hama dzayo namapakatwa, zvetsitsi yakakanda pasi, yakaramba achingoviruka nehasha yakaramba iine pfundipfundi mumwoyo.

¹²Naizvozvo ndichatumira moto kuTemani ugororomesa nhare dzokuBhozira dzokuzvidzivirira nadzo muhondo.”

¹³Zvanzi naTENZI, “Pamusana pokutadza rutatu rutatu kwevokwaAmoni kutosvika zvavo runa, handimborega kuvaranga; nokuti vakatumbura madzimai akazvitakura okuGireadhi vachiitira kukudza-kudza nyika yavo.

¹⁴Nezvo ndichatungidza moto murusvingo rweguta reRabha uroromese nhare dzaro dzokuzvidzivirira nadzo muhondo. Pachava nejemedzanwa pazuva rehondo iyoyo ichaita sedutu remhepo pazuva rechamupupuri.

¹⁵Mambo wavo achatapwa agoendwa naye, iye pamwechete namachinda ake,” ndizvo zviri kutaura TENZI.