Read Bhaibhiri Idzva rechiShona Amosi 2 Bible Online

Amosi 2 - Bhaibhiri Idzva rechiShona bible

Amosi 2

¹Zvanzi naTENZI, “Pamusana pokutadza rutatu rutatu kwenyika yeMoabhu kutosvika zvayo runa, handimborega kuiranga nokuti vakapisa zvokurotesa mapfupa amambo wokuEdhomu.

²Nokudaro ndichatumira moto panyika yeMoabhu ugozhirimisa nhare dzeguta reKerioti dzokuzvidzivirira nadzo muhondo. VaMoabhu vachafira mukati mebongozozo iroro muruzha imomo, mabhosvo achirira.

³Ndichapfuudza mutongi wacho mukati maro ndigouraya machinda ose omo,” ndizvo zviri kutaura TENZI.

⁴Zvanzi naTENZI, “Pamusana pokutadza rutatu rutatu kwenyika yokwaJudha kutosvika zvayo runa, handimborega kuiranga; nokuti vakaramba mutemo waTENZI vakarega kuchengeta mirao yake. Asi zvifananidzo zvavo zvenhema zvokunamata izvi, zvaitevedzwa namadzibaba avo, zvakavarasisa.

⁵Naizvozvo ndichatumira moto panyika yokwaJudha uririmise nhare dzeJerusaremu dzokuzvidzivirira nadzo muhondo.”

⁶Zvanzi naTENZI, “Pamusana pokutadza rutatu rutatu kwenyika yevokwaIsiraeri kutosvika zvayo runa, handimborega kuiranga; nokuti vanototengesa nemari vanhu vakarurama, vachitotengesa varombo neshangu mbiri.

⁷Vanotsokodzera varombo musoro muvhu renyika, vachisaidzira varombo kurutivi. Baba nomwanakomana wavo vachitadza nomushandi wechisikana mumwecheteyo, kun'oresa zita rangu rinoera.

⁸Vanoti pasi rare rare pedyo neatari yose yose pahanzu dzavakafanobatiswa navarombo somuripo vachinwira mumba yamwari wavo waini yavanhu vanenge varipiswa.

⁹“Asi ini ndakavatsakatisira vaAmori vakanga vakareba semiti yemisidhari, uye vakanga vakasimba somioku. Iyeni ndini ndakaparadza michero yake mudenga'mu nemidzi yawo pasi'pa.

¹⁰Uye ndakakuburitsai munyika yeIjipiti ndikakutungamirirai kwamakore makumi mana murenje, kuti mundotora nyika yavaAmori muiite yenyu.

¹¹Ndakaita kuti vamwe vevana venyu vakomana vave vaporofita, uye kuti mamwe majaya enyu ave vaNazari. Hazvisiri izvo chaizvoizvo izvi here, nhaimi vanhu veIsiraeri?” Ndizvo zviri kutaura TENZI.

¹²“Asi munotoita kuti vaNazari vanwe waini muchirambidza vaporofita kuporofita.

¹³Ndichakutsikirirai pasi panzvimbo penyu chaipo sokutsikirira pasi kunoita ngoro izere nezvisote.

¹⁴Vanozviti ndivo vamhanyi chaivo, zvokumhanya izvozvo zvichavaperera, vane simba, simba racho richapera, kunyangewo negamba chairo richatadza kuzviponesa upenyu.

¹⁵Iye anopakata uta haambopamira. Shasha yokumhanya semhepo ichakoniwa kuzviponesa, kanawo wokumhanya namabhiza kuzviponesa upenyu, haambozviponesa

¹⁶kunyange mumwe wamagamba chaiye ane mwoyo chaiwo wechivindi, achati gumbo ndibereke asina chaakapfeka zuva iroro,” ndizvo zviri kutaura TENZI.