Read Bhaibhiri Idzva rechiShona Amosi 3 Bible Online

Amosi 3 - Bhaibhiri Idzva rechiShona bible

Amosi 3

¹Chinzwai shoko rinotaurwa naTENZI rokukuyambirai imi vanhu veIsiraeri, ndichiyambira mhuri yose zvayo yandakaburitsa munyika yeIjipiti:

²“Imimi chete ndimi vandinoziva pamhuri dzose dzapasi pano, naizvozvo ini ndichakurangirai uipi hwenyu hwose.”

³Ko vanhu vaviri vangafambe pamwechete vasina kurangana here?

⁴Ko shumba ingahon'e musango here iyo isina nyama yayabata? Ko shumba ichine simba rayo zvayo ingadhurume here mubako mayo iyo isina chayakabata?

⁵Ko ipo panyika pano shiri ingabatwe pamusungo pasina kuteiwa here? Ko musungo ungarapuka here usina chinhu chawabata?

⁶Ko tsuri ingaridzwe here muguta vanhu vakasatya? Ko guta ringawirwa nenhamo here TENZI asina kutoti zviitike?

⁷TENZI Mwari haana chaanomboita asina kutanga ambozivisa vaporofita, varanda vake.

⁸Kana shumba ikadzvova ndiani asingatyi? TENZI Mwari akataura ndiani angasaporofita.

⁹Daidzirai kumizinda yeAsiria nokumizinda yeIjipiti muti, “Unganai pagomo reSamaria muone zvenyu nyonganyonga iri mariri namabatirwo akaipa ari kuitwa vanhu mariri.”

¹⁰Zvanzi naTENZI, “Havazivi kuita zvinhu nemazvo, vanotopfimbika utsinye nokupamba mumizinda mavo.

¹¹Naizvozvo, zvanzi naTENZI Mwari, muvengi achakomba nyika ino agokoromora zvinokudzivirirai zvacho nhare yenyu yokuzvidzivirira nayo muhondo igopambwa.”

¹²Saka zvanzi naTENZI, “Sokununura kunoita mufudzi mukanwa meshumba, makumbo zvawo maviri echipfuwo kana kuti kadimbu kenzeve, ndozvichangoitwawo vanhu veIsiraeri vanogara muSamaria vachinunurwa vari pakakona kesofa kana pachidimbu chomubhedha.

¹³“Chinzwa, uzivise vemba yaJakobho,” ndizvo zviri kutaura TENZI Mwari, Mwari wehondo nehondo, “Kuti

¹⁴pazuva randicharangira Isiraeri kutadza kwayo, ndichavinga atari dzeBhetieri, zvinenge nyanga zvapaatari yacho zvichagwishurwa zvigoti kwatarara pasi.

¹⁵Ndichaparadza dzimba dzokugara mumwaka wechando nedzimba dzapazhizha nedzimbawo dzomunyanga wenzou dzichaparara, uye dzimba dzakawanda dzichaparara.” Ndizvo zviri kutaura TENZI.