Read Bhaibhiri Idzva rechiShona Amosi 5 Bible Online

Amosi 5 - Bhaibhiri Idzva rechiShona bible

Amosi 5

¹Teererai munzwe shoko rakanangana nemi randava kutaura ndichiungudza, kwamuri imi vemba yaIsiraeri rokuti,

²“Isiraeri, waparara, zvokumukazve hapasisina, wava mhandara yarambwa, uri munyika mako imomo usisina kana newokukusumudzawo.”

³Ndinodaro nokuti zvanzi naTENZI Mwari, “Guta rakabuda chiuru chavarwi, richasara rava nezana revarwi, uye rakabudawo zana revarwi richasara rava navarwi gumi vokumba kwaIsiraeri.”

⁴Nokuti TENZI ari kutaurira vemba yaIsiraeri kuti, “Nditsvakei mugorarama,

⁵asi regai kutsvaka kunamata zvokuBhetieri, kana kupinda zvenyu muGirigari kunyange kuyambukira kuBheerishevha pamusana pokuti Girigari ichatoenda chete muutapwa uyewo Bhetieri zvichaiperera.”

⁶Tsvagai TENZI, murarame, angadaro akaviruka somoto mumba yokwaJosefi, akaitsakatisa pasina kana anoidzimura achireverera Bhetieri.

⁷Hokoyoi imi munosandura ruenzaniso muchiruita gavakava chairo kuvava muchikanda pasi ururami.

⁸Iye akasika nyenyedzi dzechinyamutanhatu nedzegwara ravatonga; iye anosandura rima rakati kwirindindi kuti rive mangwanani zvavo achiita kuti masikati ave usiku, iye anodaidza mvura yegungwa achiidira pasi panyika, zita rake iyeyo, ndiYahweh,

⁹anoita kuti kuparadza vane simba, kurove semheni zvokuti umharadzi hunobva hwawira nhare dzokuzvidzivirira nadzo muhondo.

¹⁰Vanhu vanovenga munhu anovatsiura padare, vachizvonda anotaura chokwadi.

¹¹Naizvozvo, pamusana pokuti imi munotsokodzera pasi murombo muchimumanikidza kuti atokupai chete koroni, dzimba dzamakavaka dzamabwe akavezwa, hamudzigari mukasimaka imi munda yakanakisa yamagirepisi, asi hamusi kuzonwa waini yaiwo.

¹²Ndinodaro nokuti ndinoziva ini kuwanda kwezvamakakanganisa nokukura kwakaita zvitadzo zvenyu, iyemi munoonesa ndondo vakarurama, munogamuchira pfumbamuromo padare muchiti kumunhu ane nhuna dzaanadzo tibvire pano.

¹³Naizvozvo munhu akangwara anonyarara zvake panguva dzakaita saidzodzi idzi, nokuti inguva dzakaipa.

¹⁴Tsvakai zvakanaka, kwete zvakaipa kuitira kuti murarame, nezvo TENZI, Mwari wehondo nehondo, achava nemi, sokureva kwenyu.

¹⁵Vengai zvakaipa mude zvakanaka musimbise zvoruenzaniso padare. Zvimwe TENZI, Mwari wehondo nehondo, angaitire nyasha chitsama chakasara chevokwaJosefi.

¹⁶Naizvozvo zvanzi naTENZI, Mwari wehondo nehondo iye TENZI, “Munhandare dzose zvadzo muchange muchihwihwidzwa kuchema, mumigwagwa yomuguta yose zvayo vachati, ‘Yowe maiwe-e!’ Vachadaidza varimi kundochema vachadaidzawo vebasa rokuhwihwidza kuzoungudza,

¹⁷nomuminda yose yamagirepisi muchava nokuhwihwidza kuchema nokuti ndichapfuura nomukati menyu,” ndizvo zviri kutaura TENZI.

¹⁸Zvichakuwanai imi munoti dai zuva raTENZI rachingosvika. Chamunodira chaizvo kuti zuva raTENZI risvike, chii? Izuva rerima kwete rechiedza

¹⁹rakaita somunhu anoti, uku ari kutiza shumba obva anowira mukanwa mebere; kana kuti somunhu anoti pindei mumba ozendama zvake noruoko kumadziro nyoka yobva yamuruma.

²⁰Ko handiti zuva raTENZI, izuva rerima here, kwete rechiedza, zuva rakati kwirindindi kusviba, risina kana nekanopenya mariri.

²¹“Ndinovenga, uye ndinozvidza mazuva enyu makuru, handisi kumbofarira zvangu misangano yenyu yezvokunamata.

²²Kunyange zvenyu mukapira kwandiri mipiro yenyu yokupisa nemipiro yenyu yembesanwa handisi kuzoigamuchira. Kanawo mipiro yokuwadzana yezvipfuwo zvenyu zvakakodzwa, handisi kuzoitarisa.

²³Ndinyararirei mheremhere yenziyo dzenyu, mumhanzi wamadimbwa enyu handisi kana kuzombouteerera.

²⁴Asi ruenzaniso ngarudirane kuyerera semvura uye kururama kuitewo sorukova runogarosaruka ruchingoyerera.

²⁵“Ko makambouya here kwandiri nezvibayiro kana nemipiro kwamakumi mana amakore amakanga muri murenje, nhaimi vemba yaIsiraeri?

²⁶Imi muchatakura zvifananidzo zvenyu zvokunamata zvamakazvigadzirira zvinoti Sakuti, mambo wenyu naKaiwani, mwari wenyu wenyenyedzi.

²⁷Naizvozvo ndichakutorai ndichikuendesai muutapwa mberi kupfuura guta reDhamasikusi.” Ndizvo zviri kutaura TENZI anonziwo Mwari wehondo nehondo.