Read Bhaibhiri Idzva rechiShona Amosi 6 Bible Online

Amosi 6 - Bhaibhiri Idzva rechiShona bible

Amosi 6

¹Zvichakuwani imi mugere pamutambaratede muguta reZioni nevanozviti tigere zvakanaka mugomo reSamaria, vanhu vanozivikanwa kwazvo vokutangatanga verudzi rwavanhu, kunoenda imba yaIsiraeri.

²Yambukirai kuguta reKarine, muone zvenyu, mubvepo muende, kuguta reHamati, guta guru, muzodzika kuguta reGati ravaFirisitia. Maguta iwayo ari nani here pane nyika mbiri idzi? Kana kuti iyo nyika yavo, ihuru here pane yenyu?

³Nhaimi munoramba kuti zuva rakaipa richasvika muchitoita kuti utsinye hutonge,

⁴iyemi munorara pamibhedha yomunyanga wenzou, muchitambarara zvenyu muri mumitepfetepfe yezvigaro, muchidya zvenyu nyama, yehwayana dzomuzvirugu, neyemhuru dzomudanga rezvipfuwo;

⁵iyemi munoumba nziyo itsva dzokuimba namadimbwa; saDhavhidhi muchizvigadzirirawo zvokuridzisa mumhanzi nazvo zvitsva;

⁶iyemi munodutira kunwa waini negate muchizvizora mafuta amandiriri asi kuparara kwevokwaJosefi kusingakurwadzei mwoyo!

⁷Saka imimi ndimi muchava vokutanga chaivo kuenda kuutapwa, iyemi vokutambarara imi, kudyiririra ikoko nehohoho yenyu iyoyo, zvichapera.

⁸TENZI Mwari apika naiye pachake, (zvanzi naTENZI, Mwari wehondo nehondo): “Kuzvikudza kwevokwaJakobho ndinokuzvonda, uye nhare dzake dzokuzvidzivirira nadzo muhondo ndinodzivenga saka guta racho nezvose zvirimo ndichazviisa mumaoko evavengi.”

⁹Kana vanhu gumi vakasara mumba imwechete, vachatopafa.

¹⁰Hama yomunhu yomumba chaiyo inomuviga yacho, paichauya kuzotakura zvitunha mumba imomo, ikabvunza anenge akahwandamo mukatikati kuti, “Muchine mumwe here asara?” Iye achati, “Kwete.” Uyewo uya achabva ati, “Taurira pasi! Kana kudoma zita raTENZI, ngatiregei.”

¹¹Nokuti chionai TENZI atema kuti, zimba guru richaparadzwa kuti warara, kamba kaduku kachisarawo kangova zvimedu.

¹²Ko mabhiza anomhanya paruware here? Ko munhu angarime here nenzombe pagungwa? Asi imi munosandura ruenzaniso muchiruita chepfu, muchero woururami muchiaita gavakava kuvava,

¹³iyemi munofarira zvinhu zvisina maturo,[2] muchitozviti, “Hatisirisu here isu pano, takatora guta reKarinaimu[3] tikatoriita redu pachedu here?”

¹⁴Saka chinzwai munzwe, TENZI Mwari wehondo nehondo ari kuti, “Imi vemba yaIsiraeri ndichakumutsirai rudzi rwavanhu vachakudzvanyirirai kubvira tava kuda kupinda muguta reHamati, kusvikira kuKakova keArabha.”