Read Bhaibhiri Idzva rechiShona Obhadhiya 1 Bible Online

Obhadhiya 1 - Bhaibhiri Idzva rechiShona bible

Obhadhiya 1

¹Zvakaoneswa Obhadhiya. Zvanzi naTENZI Mwari nezveEdhomu takanzwa shoko richibva kuna TENZI uye nhumwa iri kutumwa mukati memarudzi ichiti, “Simukai, ngatimumukirei timurwise.”

²Chinzwai, “Ndichakuitai mudiki pakati pamarudzi. Muchashorwa zvikuru.

³Mwoyo wenyu wokuzvikudza wakakurasisai imi mune musha womumapako mumikaha, mune musha uri pamusoro, imi munozviti nechomumwoyo. ‘Ndianiwo zvake angatikoromorere pasi.’

⁴Kunyange zvazvo muri muchadenga imomo segondo, nyange movakira zvenyu dendere renyu pakati penyenyedzi, ikoko ndichakukoromorerai pasi. Ndizvo zviri kutaura TENZI.

⁵“Kana mbavha dzikakuvinga kana kuti vapambi vousiku, handiti vanongotora chete zvinokwanirana navo? Kana vokukohwa magirepisi vakakuvinga handiti vanotosiyawo mamwe okufuhwa zvawo? Asi kuparadzwa kwamuchaitwa imi, aiwaiwa!

⁶Tarisaiwo muone zvenyu kuparadzwa kwaitwa nyika yaEsau, upfumi hwayo hwapambwa.

⁷Vamwe venyu vose vakakufurirai vakakudzingirai kumuganhu, shamwari dzenyu chaidzo dzakupandukirai zvino. Madzisahwira enyu chaiwo amunovimba nawo akuisirai chokukuteyai nacho hazvichambonzwisisiki.

⁸“TENZI ari kuti nezuva iroro handisi kuzoparadza vangwaru muEdhomu here noruzivo muGomo rokwaEsau?

⁹Magambawo enyu avarwi, imimi wokwaTemani, achadumbirwa zvokuti munhu wose wokuGomo rokwaEsau achapfuudzwa nebakatwa.

¹⁰“Imi vokwaEsau[1] pamusana poutsinye hwamakaita kuvanun'una venyu vokwaJakobho muchanyara imi nokusingaperi uye muchaparadzwa zvachose.

¹¹Pamusi uya wamakamirira kure vatorwa vachipamba upfumi hwevokwaJakobho, vatorwa vacho vachitopinda mumaguta avo, vachiitira Jerusaremu chin'ange imi maitoita somumwe wavo.

¹²Asi mungadai musina kutonakidzwa nokuonerera zvenyu zuva ravanun'una venyu pazuva renyatwa dzavo mungadai musina kupembera kwazvo kufara nezvevanhu vokwaJudha nezuva rokuparara kwavo, mungadai musina kutozvitutumadza pamusi wenhamo iyoyo.

¹³Hamaifanira kumbopinda henyu muguta ravanhu vangu pazuva repfumvu yavo. Hamaifanira kutonakidzwa nokuonerera kuparara kwavo pamusi wepfumvu yavo. Mungadai musina kumbopamba zvinhu zvavo pazuva repfumvu yavo.

¹⁴Mungadai musina kundomirira pamharadzano muchipfuudza vainge votiza. Hamaifanira kudzosera kwakare vainge vapunyuka pamusi wenhamo yavo.

¹⁵“Chiripo ndechichi chokuti zuva raTENZI riri kuzosvikira marudzi ose avanhu. Zvamunenge maitawo imi ndizvo zvichaitwawo kwamuri, zviito zvenyu zvichakupfukirai

¹⁶nokuti sokudhakwa kwamakaita imi pagomo rangu rinoera, marudziwo ose omunharaunda imomo achararadzawo nawo. Vachanwa zvokudutira vagosara vava kunge vanhu vasina kana kumbovapo zvavo.

¹⁷“Asi muGomo reZioni muchava navanenge vapunyuka uye richava gomo rinoera. Imbawo yokwaJakobho ichatora hayo zvinhu zvayo zvizova mumaoko mayo.

¹⁸Imba yokwaJakobho ichava moto imba yokwaJosefi ichiva murazvo womoto imba yokwaEsau ichiva zvidzitsi zvamashanga. Ivo vachavapisa vagovaroromesa. Hapazova navanopunyuka kune vemba yokwaEsau nokuti TENZI ataura.

¹⁹“Vanhu vokuNegevhu vachatora Gomo rokwaEsau kuriita ravo vanhuwo vokumanhika kuShefera vachitorawo nyika yavaFirisitia kuita yavo. Nyikawo yokwaEfuremu nenyikawo yeSamaria vachadzitora kuva mumaoko mavo uyewo vokwaBhenjamini vagotora havo dunhu rokwaGireadhi.

²⁰Hondo yenhapwa dzokwaIsiraeri iri kuHara ichatora hayo nyika yeFonisia kusvikira kuZarifati kuita zvavo nyika yavo. Nhapwawo dzokuJerusaremu dziri kuSefaradhi dzichatorawo maguta okuNegevhu kuaita adzo.

²¹Vakundi vachakwira Gomo reZioni vachatonga gomo rokwaEsau umambo huchava hwaTENZI.”