Read Bhaibhiri Idzva rechiShona Kuverengwa 1 Bible Online

Kuverengwa 1 - Bhaibhiri Idzva rechiShona bible

Kuverengwa 1

¹Tenzi akataurira Mosesi murenje reSinai mutendhe rokusanganira pazuva rokutanga romwedzi wechipiri, pagore rechipiri rokubuda kwavo muIjipiti akati,

²“Verengai vaIsiraeri vose imba nemba, dzinza nedzinza. Nyorai mazita avanhurume vose

³vane makore makumi maviri nevane anopfuura iwayo vangakwanise kuenda kuhondo muIsiraeri yose. Iwe naAroni munofanira kuvaverenga muzvikwata nezvikwata.

⁴Padzinza rimwe nerimwe torai murume mumwechete wokukubatsirai anenge ari mukuru weimba yamadzibaba ake.”

⁵Mazita avarume vokukubatsirai ndiwo aya: mudzinza raRubheni, torai Erizuru mwanakomana waShedheuru;

⁶mudzinza raSimeoni, torai Sherumieri mwanakomana waZurishadhai;

⁷mudzinza raJudha, torai Nashoni mwanakomana waAminadhabhu;

⁸mudzinza raIsakari, torai Netaneri mwanakomana waZuaru;

⁹mudzinza raZebhuruni, torai Eriabhu mwanakomana waHeroni;

¹⁰pavana vaJosefi mudzinza raEfuremu, torai Erishama mwanakomana waAmihudhi; mudzinza raManase, torai Gamarieri mwanakomana waPedhazuru;

¹¹mudzinza raBenjamini, torai Abhidhani mwanakomana waGidheoni;

¹²mudzinza raDhani, torai Ahiezeru mwanakomana waAmishadhai;

¹³mudzinza raAsheri, torai Pagieri mwanakomana waOkirani;

¹⁴mudzinza raGadhi, torai Eriasafu mwanakomana waDheueru;

¹⁵mudzinza raNafutari, torai Ahira mwanakomana waEnani.

¹⁶Ivava ndivo vakasarudzwa mugungano rose, vaiva vatungamiriri mumadzinza avo, variwo vakuru vakuru mudzimhuri dzavaIsiraeri.

¹⁷Mosesi naAroni vakagamuchira varume ivavo vakadomwa namazita.

¹⁸Vakandokokorodza vaIsiraeri vose pazuva rokutanga romwedzi wechipiri, ndokunyora vanhu mumadzinza avo nomumhuri dzavo. Vakanyora mazita vachiverenga mumwe nomumwe varume vose vaiva namakore makumi maviri navaiva namakore anopfuura iwayo,

¹⁹sokurayirwa kwakanga kwaitwa Mosesi naTenzi. Saka akavaverenga vari kurenje reSinai.

²⁰Mudzinza rokwaRubheni dangwe raIsiraeri makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

²¹Vakaverengwa mudzinza raRubheni vose vaisvika makumi mana ezviuru ane zviuru zvitanhatu namazana mashanu.

²²Mudzinza raSimeoni makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

²³Vakaverengwa mudzinza raSimeoni vose vaisvika makumi mashanu ezviuru ane zviuru zvipfumbamwe namazana matatu.

²⁴Mudzinza raGadhi makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

²⁵Vakaverengwa mudzinza raGadhi vose vaisvika makumi mana ezviuru ane zviuru zvishanu namazana matanhatu ana makumi mashanu.

²⁶Mudzinza raJudha makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

²⁷Vakaverengwa mudzinza raJudha vose vaisvika makumi manomwe ezviuru ane zviuru zvina namazana matanhatu.

²⁸Mudzinza raIsakari makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

²⁹Vakaverengwa mudzinza raIsakari vose vaisvika makumi mashanu ezviuru ane zviuru zvina namazana mana avanhu.

³⁰Mudzinza raZebhuruni makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

³¹Vakaverengwa mudzinza raZebhuruni vose vaisvika makumi mashanu ezviuru ane zviuru zvinomwe namazana mana.

³²Mudzinza raJosefi, dzinza rokwaEfuremu vakaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

³³Vakaverengwa mudzinza raEfuremu vose vaisvika makumi mana ezviuru ana mazana mashanu.

³⁴Mudzinza raManase makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

³⁵Vakaverengwa mudzinza raManase vose vaisvika makumi matatu ezviuru ane zviuru zviviri namazana maviri.

³⁶Mudzinza raBhenjamini makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

³⁷Vakaverengwa mudzinza raBhenjamini vose vaisvika makumi matatu ezviuru ane zviuru zvishanu namazana mana.

³⁸Mudzinza raDhani makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

³⁹Vakaverengwa mudzinza raDhani vose vaisvika makumi matanhatu ezviuru ane zviuru zviviri namazana manomwe.

⁴⁰Mudzinza raAsheri makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

⁴¹Vakaverengwa mudzinza raAsheri vose vaisvika makumi mana ezviuru ane chiuru chimwechete namazana mashanu.

⁴²Mudzinza raNafutari makaverengwa pazvizvarwa zvavo mhuri nemhuri nedzimba dzamadzibaba avo uye pauwandi hwamazita avo mumwe nomumwe wavarume vose vaiva namakumi maviri amakore okuberekwa navaipfuura iwayo vaikwanisa kuenda kuhondo.

⁴³Vakaverengwa mudzinza raNafutari vose vaisvika makumi mashanu ezviuru ane zviuru zvitatu namazana mana.

⁴⁴Ivava ndivo vanhu vakaverengwa naMosesi naAroni vachibatsirwa navatungamiriri vavaIsiraeri gumi navaviri, mumwe nomumwe achimiririra dzinza rake.

⁴⁵Saka vaIsiraeri vose vakaverengwa vaiva varume vane makumi maviri amakore navaipfuura iwayo vaikwanisa kuenda kuhondo, muIsiraeri.

⁴⁶Vose pamwechete vaikwana mazana matanhatu ezviuru ane zviuru zvitatu namazana mashanu ana makumi mashanu avanhu.

⁴⁷Asi vaRevhi havana kuverengwa pamwechete namamwe madzinza,

⁴⁸nokuti Tenzi akanga ataura naMosesi achiti,

⁴⁹“Asi vedzinza raRevhi usaverenge, usavaverengere mukati mavanhu veIsiraeri.

⁵⁰Asi vaRevhi ndivo vauchapa basa rapatendhe rechitenderano nazvose zvirimo. Ndivo vacharitakura pamwechete nazvose zvirimo. Ndivo vachashandamo. Vachadzika matendhe avo akaripoteredza.

⁵¹Pamunenge motamisa tendhe rinoera, vaRevhi ngavaripete vachindoridzikazve kwamuchazombogara. Mumwe munhuwo zvake asiri muRevhi anenge asvika padyo naro ngaaurayiwe.

⁵²Vamwe vaIsiraeri vose ngavadzike matendhe avo vagare vari mumapoka avo, mumwe nomumwe ari muchikwata chake nomureza wacho.

⁵³Asi vaRevhi ngavadzike matendhe avo vakapoteredza tendhe rechitenderano kuti ndirege kuitira hasha gungano ravanhu veIsiraeri. VaRevhi vanofanira kuchengeta tendhe rechitenderano.”

⁵⁴Saizvozvo vaIsiraeri vakaita zvose zvakanga zvatemerwa Mosesi naTenzi.