Read Bhaibhiri Idzva rechiShona Kuverengwa 12 Bible Online

Kuverengwa 12 - Bhaibhiri Idzva rechiShona bible

Kuverengwa 12

¹Miriamu naAroni vakatsoropodza Mosesi pamusana pomukadzi waakanga aroora, nokuti akanga aroora mukadzi wechiKushi.

²Vakati, “Ko Mosesi ndiye oga akangotaurirwa zvinhu naTenzi here? Ko isu hatina kutaurirwawo zvinhu naTenzi here?” Tenzi akanzwa zvavaitaura.

³Mosesi akanga ari munhu akazvirereka kupfuura vanhu vose vapanyika.

⁴Pakarepo Tenzi akataurira Mosesi naAroni naMiriamu achiti, “Uyai mose muri vatatu kutendhe rangu rokusanganira.” Vakabuda vari vatatu.

⁵Ipapo Tenzi akauya ari mugore rakasvikomira kumusuo wetendhe iroro. Mwari akadaidza achiti, “Aroni! Miriamu!” Vakaenda mberi vose vari vaviri.

⁶Iye ndokuti, “Chinzwai zvandinoreva! Kana mumwe wenyu ari muporofita ini Tenzi pachangu ndinozviratidza kwaari, kana kutaura naye muchiroto.

⁷Asi handidaro nomuranda wangu Mosesi nokuti zvinhu zvangu zvose ndakazviisa mumaoko ake.

⁸Ndinokurukura naye takatarisana tichinyatsotaurirana pasina zvamadimikira achiona chimiro changu ini Tenzi. Ko makarega sei kutya kutsoropodza muranda wangu Mosesi?”

⁹Tenzi akavashatirirwa ndokubva aenda.

¹⁰Gore rakanga rakafukidza tendhe iroro rakasimuka. Miriamu akava nechirwere chamapere akachena samazaya echando. Aroni akatarisa Miriamu wanei ava nechirwere chamapere.

¹¹Aroni ndokutaura naMosesi achiti, “Changamire ndapota! Regai kutirwadzisa muchitirangira kutadza kwatakaitira muupenzi hwedu.

¹²Musarege Miriamu achiita sowakafa, somwana anoberekwa ane muviri wakadyiwadyiwa.”

¹³Mosesi akachema kuna Tenzi achiti, “Nhai Mwari! Ndapota! Muporesei zvenyu!”

¹⁴Asi Tenzi ndokuti kuna Mosesi, “Dai vanga vari baba vake vamusvipira pauso angadai asina kunyara here kwamazuva manomwe achindogariswa kunze kwamatendhe ari oga here? Saka ngaandogara ari oga kunze kwamatendhe kwamazuva manomwe agozodzoserwa mumatendhe.”

¹⁵Naizvozvo Miriamu akanzi agare kunze kwamatendhe kwemazuva manomwe. VaIsiraeri havana kutama ipapo kusvikira Miriamu adzokera mumatendhe.

¹⁶Vakazobva paHezoroti vakandodzika matendhe avo murenje reParani.