Read Bhaibhiri Idzva rechiShona Kuverengwa 13 Bible Online

Kuverengwa 13 - Bhaibhiri Idzva rechiShona bible

Kuverengwa 13

¹Tenzi akataurira Mosesi achiti,

²“Tuma varume vanoenda kundosora nyika yeKanani, yandiri kupa vaIsiraeri. Padzinza rimwe nerimwe ravaIsiraeri tora mumwe wavatungamiriri vavo.”

³Mosesi akatuma vose vakanga vari vatungamiri vavaIsiraeri sokuudzwa kwaakanga aitwa naTenzi. Vakanga vakadai: Aya ndiwo mazita avo,

⁴Mudzinza rokwaRubheni, mutungamiriri akatorwamo ndiShamua mwanakomana waZakuri.

⁵Mudzinza rokwaSimeoni, makatorwa Shafati mwanakomana waHoru.

⁶Mudzinza rokwaJudha, makatorwa Karebhu mwanakomana waJefune.

⁷Mudzinza rokwaIsakari, makatorwa Igari mwanakomana waJosefi.

⁸Mudzinza rokwaEfuremu, makatorwa Hoshea mwanakomana waNuni.

⁹Mudzinza rokwaBhenjamini, makatorwa Pariti mwanakomana waFaru.

¹⁰Mudzinza rokwaZebhuroni, makatorwa Gadhieri mwanakomana waSodhi.

¹¹Mudzinza rokwaJosefi, dzinza rokwaManase, makatorwa Gadhi mwanakomana waSusi.

¹²Mudzinza rokwaDhani, makatorwa Amieri mwanakomana waGemari.

¹³Mudzinza rokwaAsheri, makatorwa Seturi mwanakomana waMikaeri.

¹⁴Mudzinza rokwaNafutari, makatorwa Nahibhi mwana waVhofusi.

¹⁵Mudzinza rokwaGadhi, makatorwa Geueri mwanakomana waMachi.

¹⁶Ndiwo mazita avasori vakatumwa naMosesi kundosora nyika iyoyo. Mosesi akatumidza Hosea mwanakomana waNuni kuti Joshuwa.

¹⁷Mosesi akavatuma kundosora nyika yeKanani akati kwavari, “Endai nokuNegevhu uko mukwire kunyika yamakomo.

¹⁸Endai mundoona kuti nyika iyoyo yakaita sei, navanhu vageremo kuti vane simba here kana kwete, kuti vazhinji here kana kuti vashoma.

¹⁹Endai mundoona kuti nyika yavagere inyika yakanaka here kana kuti yakaipa. Muonewo kuti maguta avagere akakomberedzwa nerusvingo here kana kuti kwete.

²⁰“Ongororai ivhu reko kuti rakanaka here kana kuti rakaipa, kuti kune miti here kana kuti hakuna. Itai chivindi muuye nemichero yomunyikamo.” Yakanga yava nguva yokutanga kuibva kwamagirepisi.

²¹Varume vaya vakaenda vakandosora nyika iyoyo, kubvira parenje reZini, kundosvika kuguta rainzi Rehobhu tavakuda kupinda muguta reHamati.

²²Vakatanga kusora kumaodzanyemba kwayo ndokuzosvika kuguta reHebhuroni kwaigara marudzi aAhimani naSheshai naTarumai zvizukuru zverudzi rwehofori dzavanhu dzainzi vaAnaki. Guta reHebhuroni rakavakwa makore manomwe guta rokuIjipiti rainzi Zoani risati ravakwa.

²³Vakasvika kubani reEshikoru vakatanha bazi raiva nesumbu ramagirepisi yaitoitwa zvokutembedzanwa pamafudzi navarume vaviri pamutanda. Vakauyawo nemichero yamapomugiraneti namaonde.

²⁴Nzvimbo iyoyo yakatumidzwa kuti bani reEshikoru[3] pamusana pesumbu remagirepisi rakachekwapo navaIsiraeri.

²⁵Shure kwamazuva makumi mana vachimema nyika iyoyo vakazodzokera.

²⁶Vakafamba vakasvika kwaiva naMosesi naAroni navaIsiraeri vose kunzvimbo inonzi Kadheshi iri kurenje reParani. Vakavataurira zvavakanga vaona ivo negungano rose vakavaratidza michero yenyika iyoyo.

²⁷Vakarondedzera Mosesi vachiti, “Takasvika kunyika yamakatituma. Ichokwadi kuti nyika iyoyo yakapfuma inoerera uchi nomukaka. Heino michero yayo yatauya nayo.

²⁸Asi vanhu vageremo vane simba. Maguta avo makuru kwazvo akanyatsokomberedzwa netsvingo. Kunyange hofori dzorudzi rwavaAnaki takadziona ikoko.

²⁹Rudzi rwaAmareki rugere nechokumaodzanyemba kwayo. VaHiti navaJebhusi navaAmori vanogara mumakomo. VaKanani vari kumadokero pedyo negungwa nepedyo perwizi rwaJorodhani.”

³⁰Asi Karebhu akanyaradza vanhu vaiva pana Mosesi achiti, “Handeiko izvozvi, tindoitora. Chokwadi, tinokwanisa kuzviita.”

³¹Varume vaya vakanga vaenda naye vakati, “Hatikwanisi kundomirisana navo nokuti vakasimba kupinda isu.”

³²Naizvozvo shoko ravakauya vava naro kuzopa vaIsiraeri, vadzoka kundosora nyika iya, raiti, “Nyika yatakasora haikwanise kupa vagari vemo zvokudya zvakakwana. Vanhu vose vatakaonako varefu chaizvo.

³³Takaonawo hofori dzavanhu vorudzi rwaAnakimu. Isu takanga takaita sehwiza ndiko kutiona kwavaitiita.”