Read Bhaibhiri Idzva rechiShona Kuverengwa 14 Bible Online

Kuverengwa 14 - Bhaibhiri Idzva rechiShona bible

Kuverengwa 14

¹Gungano rose ravaIsiraeri rakaridza mhere usiku ihwohwo vakarara vachichema.

²Gungano rose rakanyunyutira Mosesi naAroni vachiti, “Dai takafira zvedu kunyika yeIjipiti kana kuti tifire zvedu murenje muno!

³Seiko Mwari achida kuenda nesu kunyika iyoyo kundotiurayisa nehondo? Madzimai edu navana vedu vachatapwa. Hazvingatinakire here kana tikadzokera zvedu kuIjipiti?”

⁴Saka vakataurirana vachiti, “Ngatisarudzei mutungamiriri tidzokere kuIjipiti!”

⁵Ipapo Mosesi naAroni vakati pasi zvambarara pamberi pegungano rose ravaIsiraeri.

⁶Joshuwa mwanakomana waNuni naKarebhu mwanakomana waJefune, vamwe vavaya vakandosora nyika iya vakabvarura zvipfeko zvavo.

⁷Vakataurira mhomho yose yavaIsiraeri vachiti, “Nyika yatakaenda kundosora inyika yakanaka kwazvo kwazvo.

⁸Kana Tenzi achida, achatisvitsa ikoko achindotipa nyika iyoyo yakapfuma inoerera uchi nomukaka.

⁹Asi musapandukire Tenzi. Musatye vanhu venyika iyoyo. Tichavaita kanyama kanyama. Chinovadzivira chakabviswa asi Tenzi anesu. Saka musavatye!”

¹⁰Asi mhomho yose yavaIsiraeri yakada kuvatema namabwe. Pakarepo vaIsiraeri vose vakaona kupenya kwokuvapo kwaTenzi kutendhe rinoera.

¹¹Tenzi akataurira Mosesi achiti, “Ko vanhu ava vachandizvidza kusvikira riniko? Vachasvikira riniko vasingavimbe neni kunyange ndakaita zvishamiso pakati pavo?

¹²Ndichavarakatisa nedenda ndigovaita kuti vave vanhu vasingakodzere kuwana nhaka. Ndigokuita iwe rudzi rukuru rune simba guru kupfuura ivo.”

¹³Asi Mosesi akateterera Tenzi achiti, “VaIjipiti vachazvinzwa nokuti imi makabvisa vanhu ava nesimba renyu vachibva mukati mavo.

¹⁴Vachazviudza vanhu vomunyika ino vakanzwa kuti imi Tenzi muri pakati pavo, muchinyatsoonekwa uso nouso! Gore renyu rinomira riri pamusoro pavo, muchivatungamirira neshongwe yegore masikati, usiku muchivatungamirira nezirimi romoto.

¹⁵Zvino kana mukauraya vanhu venyu vose ndudzi dzakanga dzanzwa mukurumbira wenyu dzichati,

¹⁶‘Tenzi akakundikana kusvitsa vanhu ava kunyika yaakanga avatsidzira, saka akavaurayira murenje.’

¹⁷Zvino ndapota! Chiratidzai ukuru hwesimba renyu sokutsidza kwamakaita muchiti,

¹⁸‘Imi Tenzi hamukurumidze kushatirwa. Mune mwoyo wakachena. Munoregerera zvitadzo, munoregererawo kukanganisa. Kunyange zvakadaro hamuzorega kuranga vana nezvizukuru pamusana pezvitadzo zvavabereki vavo kusvikira kuchizvarwa chavo chechitatu nechechina.’

¹⁹Ndapota regererai waro zvitadzo zvavanhu venyu ava nokuti mune tsitsi dzakawanda. Chiitirai vanhu ava mwoyo murefu sezvamakavaitira kubvira vachiri Ijipiti kusvikira iye zvino.”

²⁰Tenzi akati, “Ndavaregerera sokukumbira kwako.

²¹Asi ndinopika neni pachangu. Ndinopika nembiri yangu izere pasi pose ndichiti,

²²‘Hakuna nomumwe wavanhu ava achapinda munyika iyoyo. Vakaona mbiri yangu nezvishamiso zvandakaita kuIjipiti nomurenje, asi vakandiedza kagumi kagumi vasinganditeerere.

²³Hakuna nomumwe wavo achapinda munyika yandakapikira madzitateguru avo, kana vose vakandishora havambofa vakakutsika.’

²⁴Asi muranda wangu Karebhu ane mwoyo wakasiyana navamwe anonditeerera nomwoyo wose ndiye wandichasvitsa kunyika iyoyo yaakasvika ichava nhaka yezvizukuru zvake.

²⁵Pamusana pokuti vaAmareki navaKanani vagere mumapani. Mangwana, imi tendeukirai kurenje mutore nzira inoenda kuGungwa Dzvuku.”

²⁶Tenzi akataurira Mosesi naAroni achiti,

²⁷“Ko vanhu ava vakaipa vacharamba vachindinyunyutira kusvikira riniko? Kundinyunyutira kwavaIsiraeri ndakunzwa.

²⁸Chivaudza kuti, Tenzi ati, ‘Ndinopika neni pachangu, zvamataura ndichinzwa ndizvo zvandichakuitirai.

²⁹Zvitunha zvenyu zvichaita murakatira murenje rino. Vose vamakaverenga vaiva namakore makumi maviri navaiva naaipfuura iwayo, vakandinyunyutira

³⁰hakuna nomumwe wavo achazopinda munyika yandakakupikirai kuti muzogaramo kusiya Karebhu mwana waJefune naJoshuwa mwana waNuni.

³¹Asi vana venyu vamati vachaitwa kanyama kanyama, ndivo vandichasvitsa ikoko. Vachaziva nyika yamakaramba.

³²Asi imi zvitunha zvenyu zvichaita murakatira murenje muno.

³³Vana venyu vachava vafudzi murenje kwamakore makumi mana vachatambudzika nokuda kwokusatendeka kwenyu kusvikira chitunha chenyu chokupedzisira chati rabada murenje muno.

³⁴Muchaona ndondo kwamakore makumi mana nokuti manditadzira. Handiti makapedza mazuva makumi mana muchisora nyika iyoyo? Saka zuva roga roga richava gore muchirangirwa zvitadzo zvenyu. Kwamakore makumi mana muchanyatsoziva kuti rushambwa rwokufuratirwa neni rwakaita sei.

³⁵Ini Tenzi, ndinotsidza kuti zvandataura ndizvozvo zvandichaita kwamuri; mhomho yavanhu vakaipa vaunganidzana kuzondipandukira. Imo murenje muno, ndimo mavachaperera. Imo muno ndimo mavachafira.’ ”

³⁶Naizvozvo varume vakatumwa naMosesi kundosora nyika vakadzoka vakakonzera kuti gungano rose rimunyunyutire nokutaura kwavo zvakaipa nezvenyika iyoyo.

³⁷Vanhu ivavo vakataura zvakaipa vakafa nedenda panaTenzi.

³⁸Asi pavarume vaye vakandosora nyika Joshuwa mwanakomana waNuni naKarebhi mwanakomana waJefune vakasara vari vapenyu.

³⁹Mosesi akataurira vaIsiraeri vose mashoko iwayo vakabva vachema zvikuru.

⁴⁰Vakafumomuka vakaenda kumusoro kunyika yamakomo vachiti, “Asi zvatava pano kudai ngatichiendai kunzvimbo yatakapikirwa naTenzi nokuti takatadzira Mwari.”

⁴¹Asi Mosesi ndokuti, “Ko munorambireiko zvataurwa naTenzi? Hazvimbobudirira izvi!

⁴²Regai kuendako nokuti Tenzi haasi nemi. Muchandokundwa navavengi venyu!

⁴³Kana vaAmareki navaKanani vouya kuzokurwisai vachakuurayai namapakatwa nokuti makafuratira Tenzi. Tenzi haazovi nemi.”

⁴⁴Asi ivo vakangoenda kunyika yokumakomo, kunyange bhokisi rechitenderano raTenzi rakasara mumatendhe naMosesi asinawo kuenda navo.

⁴⁵VaAmareki navaKanani vakanga vagere munyika yamakomo vakaburuka vakabva vavakunda ndokuvadzingirira kusvikira kuHorima.