Read Bhaibhiri Idzva rechiShona Kuverengwa 19 Bible Online

Kuverengwa 19 - Bhaibhiri Idzva rechiShona bible

Kuverengwa 19

¹Tenzi akataurira Mosesi naAroni achiti,

²“Iyi ndiyo mirao yakatemwa naTenzi: taurirai vaIsiraeri kuti vakuvigirei tsiru dzvuku risina kuremara risinawo chinoshoreka risati rambosungwa pajoki.

³Ipai tsiru iroro kumupristi Ereazari. Tsiru iroro ngaritorwe riendwe naro kunze kwenharaunda yamatendhe, riurayirweko, Ereazari aripo.

⁴Ipapo Ereazari ngaanyike munwe wake muropa retsiru riya arisase kudivi kune tendhe rokusanganira kanomwe.

⁵Tsiru iroro ngaripiswe Ereazari achiona. Ngaripiswe rose, nyama yaro, nedehwe raro, neropa raro pamwechete nendove yaro.

⁶Mupristi ngaatore chimuti chomusidhari nekabazi komuhisopi neshinda tsvuku akande izvozvo mumoto mune tsiru riya.

⁷Kana mupristi apedza kuita izvozvo atova munhu akan'ora kusvikira zuva radoka. Ngaasuke hanzu dzake, ashambe muviri nemvura adzokere zvake kumatendhe.

⁸Munhu uya apisa tsiru riya atovawo munhu akan'ora kusvikira zuva radoka. Ngaasuke hanzu dzake nemvura, ashambe muviri nemvura.

⁹Ipapo mumwe murume anenge asina kun'ora ngaaunganidze madota etsiru riya rakapiswa andoaisa kunze kwenharaunda yematendhe panzvimbo isina kun'ora. Madota iwayo ngaachengeterwe vaIsiraeri kuti vazoaisa mumvura iya inosaswa pakuchenura zvinhu napakubvisa zvitadzo.

¹⁰Murume uya atakura madota etsiru riya atovawo munhu akan'ora kusvikira zuva radoka. Ngaasuke hanzu dzake, ashambe muviri. Murao iwoyu uchagara uripo unofanira kuchengetwa navaIsiraeri navatorwa vagere navo.

¹¹“Ani naani anobata chero chitunha chomunhu, achapedza mazuva manomwe akan'ora.

¹²Ngaazvinatse nemvura iya yokuchenurisa zvinhu pazuva retatu napazuva rechinomwe. Ipapo achava munhu achenurwa. Asi kana asina kuzvinatsa saizvozvo pazuva retatu napazuva rechinomwe achange ari munhu akan'ora.

¹³Ani naani anobata chero chitunha chomunhu asingazozvinatsi anon'oresa tendhe raTenzi rinoera. Munhu iyeyo ngaachekaniswe ukama navaIsiraeri. Acharamba akan'ora nokuti haana kusaswa nemvura yokuchenurisa.

¹⁴“Uyu ndiwo murao kana munhu afira mutendhe. Ani naani anenge ari mutendhe iroro, uye ani naani zvake achapindamo achapedza mazuva manomwe akan'ora.

¹⁵Midziyo yose inenge yakashama isina chokukwidibirisa inobva yan'ora.

¹⁶Ani naani anobata chitunha chomunhu akaita zvokuurayiwa nebakatwa kana chitunha chomunhu akangofawo zvake achifira kunze, kunyange anobata bvupa romunhu, kana anobata guva, achapedza mazuva manomwe akan'ora.

¹⁷“Pakuchenura munhu iyeyo torai madota aye emupiro wokupfupira zvitadzo, muaise mumudziyo, mudiremo mvura yakachena.

¹⁸Munhu anenge asina kun'ora ngaatore kabazi komuhisopi, akanyike mumvura iya, asase tendhe racho chairo nepazvinhu zvose navanhu vaiva mutendhe muya makafira munhu. Mvura iyoyo ngaisaswewo saizvozvi pamunhu anenge akabata chitunha chomunhu angofawo zvake kana munhu akaurayiwa, kana pamunhu akabata bvupa romunhu, kana pamunhu akabata guva.

¹⁹Munhu asina kun'ora ngaasase mvura pamunhu uya akan'ora pazuva retatu napazuva rechinomwe. Saka ndiwo machenuriro aanomuita pazuva rechinomwe. Ipapo nyakuchenurwa iyeyo ngaasuke hanzu dzake ashambe muviri wake mumvura. Achazochenurwa kana zuva radoka.

²⁰“Asi kana munhu achinge an'ora akarega kuzvichenura gungano renyu rose ngarichekane ukama naye nokuti akan'oresa tendhe rinoera raTenzi zvaasina kusaswa mvura yokuchenurisa munhu anenge akan'ora.

²¹Kwamuri imi murao iwoyu, murao uchagara uripo narini wose. Munhu anosasa mvura yokuchenurisa ngaasuke zvipfeko zvake. Ani naani anobata mvura iyi yokuchenurisa achaswera akan'ora kusvikira zuva radoka.

²²Chinhu chose chinobatwa nomunhu akan'ora chinon'ora kusvika manheru. Ani naani anobata chinhu chakan'ora achava munhu akan'ora kusvikira zuva radoka.”