Read Bhaibhiri Idzva rechiShona Kuverengwa 2 Bible Online

Kuverengwa 2 - Bhaibhiri Idzva rechiShona bible

Kuverengwa 2

¹Tenzi akataurira Mosesi naAroni kuti,

²vaIsiraeri pavanodzika matendhe avo mumwe nomumwe ngaagare pane mureza wake ari mudzinza rake, rine mureza warowo. Matendhe ngaadzikwe akapoteredza tendhe rinoera.

³Vachadzika matendhe avo nechokumabvazuva ndovomureza wamatendhe edzinza rokwaJudha, vachange vari muzvikwata nezvikwata zvavo. Mutungamiriri wedzinza rokwaJudha iri anenge ari Nahishoni mwanakomana waAminadhabhu,

⁴chikwata chake sokuverengwa kwachakaitwa chinenge chine vanhu mazana makumi manomwe ezviuru ane zviuru zvina, zvina mazana matanhatu.

⁵Vachadzika matendhe avo padyo nevokwaJudha ndevedzinza raIsakari. Mutungamiriri wedzinza raIsakari anenge ari Netaneri mwanakomana waZuaru,

⁶chikwata chake sokuverengwa kwachakaitwa chinenge chine vanhu makumi mashanu ezviuru ane zviuru zvina namazana mana.

⁷Kouyawo vedzinza raZebhuruni, mutungamiriri wedzinza raZebhuruni anenge ari Eriabhu mwanakomana waHeroni,

⁸chikwata chake sokuverengwa kwachakaitwa chinenge chine vanhu makumi mashanu ezviuru ane zviuru zvinomwe zvina mazana mana.

⁹Vomumatendhe edzinza rokwaJudha, chikwata nechikwata, vose pamwechete vaisvika zana rimwechete rina makumi masere ezviuru ane zviuru zvitanhatu zvina mazana mana avanhu. Ivava ndivo dzinza rokutanga kusumuka kana moita rwendo.

¹⁰Vachadzika matendhe avo nechokumaodzanyemba ndowomureza wamatendhe edzinza raRubheni, vachange vari muzvikwata nezvikwata zvavo. Mutungamiriri wedzinza raRubheni iri anenge ari Erizuru mwanakomana waShedheuru.

¹¹Chikwata chake sokuverengwa kwachakaitwa chinenge chine vanhu makumi mana ezviuru ane zviuru zvitanhatu zvina mazana mashanu.

¹²Vachadzika matendhe avo pedyo naye ndevedzinza raSimeoni. Mutungamiriri wedzinza raSimeoni anenge ari Sherumieri, mwanakomana waZurishadhai.

¹³Hondo yake sokuverengwa kwayakaitwa inenge iri vanhu makumi mashanu ezviuru ane zviuru zvipfumbamwe zvina mazana matatu.

¹⁴Kouyawo vedzinza raGadhi, mutungamiriri wedzinza raGadhi iri, anenge ari Eriasafu mwanakomana waReueri.

¹⁵Chikwata chake sokuverengwa kwachakaitwa chinenge chine vanhu makumi mana ezviuru ane zviuru zvishanu zvina mazana matanhatu ana makumi mashanu.

¹⁶Vomumatendhe edzinza raRubheni vachange vari muzvikwata zvavo, vose pamwechete vaisvika zana rimwechete rina makumi mashanu ezviuru ane chiuru chimwechete china mazana mana ana makumi mashanu avanhu. Ivava ndivo dzinza rechipiri kusumuka kana moita rwendo.

¹⁷Tendhe rokusanganira rinobva ratevera rakatakurwa nevematendhe edzinza rokwaRevhi richange riri nechapakati pamatendhe amadzinza ose, sokudzika kwavanenge vakaita matendhe avo, ndokusumuka kwavanoitawo kana voita rwendo, vanenge vakati iri dzinza paro, iri dzinza paro, rimwe nerimwe riine mureza warowo.

¹⁸Vachadzika matendhe avo nechokumadokero, ndovomureza wedzinza raEfuremu, vachange vari muzvikwata zvavo. Mutungamiriri wedzinza raEfuremu anenge ari Erishama, mwanakomana waAmihudhi.

¹⁹Chikwata chake, sokuverengwa kwachakaitwa chinenge chiri vanhu makumi mana ezviuru ana mazana mashanu.

²⁰Vachadzika matendhe avo pedyo navo ndevedzinza raManase. Mutungamiriri wedzinza raManase iri anenge ari Gamarieri, mwanakomana waPedhazuru.

²¹Chikwata chake, sokuverengwa kwachakaitwa, chinenge chiri vanhu makumi matatu ezviuru ane zviuru zviviri zvina mazana maviri.

²²Kouyawo vedzinza raBhenjamini, mutungamiriri wedzinza raBhenjamini iri, anenge ari Abhidhani mwanakomana waGidheoni.

²³Chikwata chake, sokuverengwa kwachakaitwa chinenge chiri vanhu makumi matatu ezviuru ane zviuru zvishanu zvina mazana mana.

²⁴Vomumatendhe edzinza raEfuremu, vari muzvikwata zvavo, vose pamwechete izana rezviuru nezviuru zvisere zvina zana rimwechete ravanhu. Ivava ndivo dzinza rechitatu kusumuka kana moita rwendo.

²⁵Vachadzika matendhe avo nechokuchambembe ndowomureza wedzinza raDhani vachange vari muzvikwata zvavo. Mutungamiriri wedzinza raDhani iri, anenge ari Ahiezeri mwanakomana waAmishadhai.

²⁶Chikwata chake, sokuverengwa kwachakaitwa chinenge chiri vanhu makumi matanhatu ezviuru ane zviuru zviviri zvina mazana manomwe.

²⁷Vachadzika matendhe avo pedyo naye ndevedzinza raAsheri. Mutungamiriri wedzinza raAsheri iri anenge ari Pagieri mwanakomana waOkirani.

²⁸Chikwata chake, sokuverengwa kwachakaitwa chinenge chiri vanhu makumi mana ezviuru ane chiuru chimwechete china mazana mashanu.

²⁹Kouyawo vedzinza raNafutari. Mutungamiriri wedzinza raNafutari iri, anenge ari Ahira mwanakomana waEnani.

³⁰Chikwata chake, sokuverengwa kwachakaitwa, chinenge chiri vanhu makumi mashanu ezviuru ane zviuru zvitatu zvina mazana mana.

³¹Vomumatendhe okwaDhani, vari muzvikwata zvavo, vose pamwechete vaisvika zana rina makumi mashanu ezviuru nezviuru zvinomwe zvina mazana matanhatu avanhu. Ivava ndivo dzinza richasumuka kokupedzisera vari mureza nomureza.

³²Ivava ndivo vaIsiraeri vose vakaverengwa nedzimba dzamadzibaba avo, mumatendhe avo. Vakaverengwa muzvikwata nezvikwata zvavo vaisvika mazana matanhatu ezviuru ane zviuru zvitatu zvina mazana mashanu ana makumi mashanu avanhu.

³³Asi vaRevhi havana kuverengerwa mumadzinza mamwe ose avaIsiraeri sokurayirwa kwakaitwa Mosesi naTenzi.

³⁴VaIsiraeri vakaita zvose zvakanga zvarayirwa Mosesi naTenzi. Vaidzika matendhe pane mireza yavo saizvozvo vaisimudzira rwendo munhu wose ari mumhuri yokwake nemba yokwababa vake.