Read Bhaibhiri Idzva rechiShona Kuverengwa 29 Bible Online

Kuverengwa 29 - Bhaibhiri Idzva rechiShona bible

Kuverengwa 29

¹“Pazuva rokutanga romwedzi wechinomwe ngakuitwe musangano mutsvene wezvokunamata, musaite basa rinorema. Ndiro zuva renyu ramunoridza tsuri,

²muchipira mupiro wenyu wokupisa unonhuhwirira zvinofadza Tenzi. Pirai handira ichiri duku imwechete, nehondohwe imwechete nehwayana hono nomwe dzine gore rimwechete. Dzose ngadzive dzisina chinoshoreka.

³Piraiwo mupiro wawo wembesanwa weupfu hwekoroni hwakanyatsokuyiwa hwakakanyiwa namafuta eorivhi. Pahandira pirai makirogiramu matatu oupfu, hwakanyatsokuyiwa pahondohwe makirogiramu maviri,

⁴pahwayana imwe neimwe kirogiramu rimwechete.

⁵Piraiwo gotora romupiro wokupfupira zvitadzo kuve kuripira kwenyu.

⁶Mipiro iyoyi ngaiwedzerwe pamusoro pemupiro wokupisa unopirwa pakugara kwomwedzi, nomupiro wawo wembesanwa unogaropirwa mazuva ose. Mipiro yacho ngaive nemipiro yayo yezvokunwa, sezvakatemwa. Ndiyo mipiro inopirwa ichiita zvokupiswa nomoto, inonhuhwirira zvinofadza Tenzi.

⁷“Pazuva regumi romwedzi wechinomwe ngakuitwe musangano mutsvene wezvokunamata, mutsanye, murege kuita basa.

⁸Asi pirai Tenzi mupiro wokupisa unonhuhwirira zvinomufadza, mupiro wehandira ichiri duku, nehondohwe imwechete, nehwayana hono nomwe dzine gore rimwechete. Dzose ngadzive dzisina chinoshoreka.

⁹Pirai mupiro wembesanwa unopirwa pamwechete nawo unenge uri weupfu hwekoroni hwakanyatsokuyiwa, hwakakanyiwa namafuta eorivhi. Pahandira yoga yoga pirai makirogiramu matatu oupfu, pahondohwe makirogiramu maviri,

¹⁰pahwayana imwe neimwe kirogiramu rimwechete.

¹¹Piraiwo gotora romupiro wokupfupira zvitadzo muchiwedzera pamupiro wokupfupira zvitadzo nomupiro wokupisa unogaroitwa zuva nezuva nomupiro wembesanwa unopirwa pamwechetewo nawo pamwechete nemipiro yayo yezvokunwa.

¹²“Pazuva regumi nechishanu romwedzi wechinomwe itai musangano mutsvene, wozvokunamata murege kuita basa renyu ramazuva ose. Asi chengeterai Tenzi mazuva makuru manomwe.

¹³Pirai mupiro wokupisa unoita zvokupiswa nomoto unonhuhwirira zvinofadza ini Tenzi. Pirai handira dzichiri duku gumi nenhatu, nehondohwe mbiri, nehwayana hono dzine gore rimwechete gumi neina. Dzose ngadzive dzisina chinoshoreka.

¹⁴Piraiwo mupiro wembesanwa unopirwa nawo weupfu hwekoroni hwakanyatsokuyiwa hwakakanyiwa namafuta eorivhi. Pahandira imwe neimwe makirogiramu matatu oupfu, pahandira dzose dziri gumi nenhatu. Pahondohwe mbiri pirai makirogiramu maviri pahondohwe.

¹⁵Pahwayana gumi neina, pirai kirogiramu rimwechete pahwayana.

¹⁶Piraiwo gotora romupiro wokupfupira zvitadzo wokuwedzera pamusoro pomupiro wokupisa unogaroitwa zuva nezuva pamwechete nomupiro wawo wembesanwa, nomupiro wawo wezvokunwa.

¹⁷“Pazuva repiri, pirai handira dzichiri duku gumi nembiri, nehondohwe mbiri, nehwayana hono dzine gore rimwechete gumi neina dzisina chinoshoreka.

¹⁸Piraiwo handira dziya nehondohwe dziya nehwayana dziya pamwechete nemipiro yembesanwa neyezvokunwa inokwanirana nouwandu hwadzo sezvakatemwa nomurayiro.

¹⁹Piraiwo gotora romupiro wokupfupira zvitadzo muchiwedzera pamusoro pomupiro wokupisa unogaroitwa pamwechete nomupiro wawo wembesanwa, nemipiro yayo yezvokunwa.

²⁰Pazuva retatu, pirai handira dzichiri duku gumi neimwechete nehondohwe mbiri, nehwayana hono dzine gore rimwechete gumi neina. Dzose ngadzive dzisina chinoshoreka.

²¹Piraiwo handira dzacho nehondohwe dzacho nehwayana dzacho pamwechete nemipiro yembesanwa yezvokunwa inokwanirana nouwandu hwadzo sezvakatemwa nomurao.

²²Piraiwo gotora romupiro wokupfupira zvitadzo muchiwedzera pamusoro pomupiro wokupisa unogaroitwa zuva nezuva pamwechete nomupiro wawo wembesanwa nomupiro wawo wezvokunwa.

²³“Pazuva rechina pirai handira dzichiri duku gumi, nehondohwe mbiri, nehwayana hono dzine gore rimwechete gumi neina dzisina chinoshoreka.

²⁴Pamwechete nehandira dzacho nehondohwe dzacho nehwayana dzacho mupirewo mipiro yembesanwa neyewaini inokwanirana nouwandu hwadzo sezvakatemwa nomurao.

²⁵Piraiwo gotora romupiro wokupfupira zvitadzo muchiwedzera pamusoro pomupiro wawo wokupisa unogaroitwa pamwechete nomupiro wawo wembesanwa newezvokunwa.

²⁶“Pazuva reshanu pirai handira dzichiri duku pfumbamwe, nehondohwe mbiri, nehwayana hono dzine gore rimwechete gumi neina dzisina chinoshoreka.

²⁷Piraiwo handira dziya nehondohwe dziya, nehwayana dziya pamwechete nemipiro yembesanwa neyewaini inokwanirana nouwandu hwadzo, sezvakatemwa nomurao.

²⁸Piraiwo gotora romupiro wokupfupira zvitadzo muchiwedzera pamusoro pomupiro wokupisa unogaroitwa zuva nezuva pamwechete nomupiro wawo wembesanwa newezvokunwa.

²⁹“Pazuva rechitanhatu pirai handira dzichiri duku tsere, nehondohwe mbiri, nehwayana hono dzine gore rimwechete, gumi neina dzisina chinoshoreka.

³⁰Piraiwo handira dzacho, nehondohwe dzacho, nehwayana dzacho pamwechete nemipiro yembesanwa neyewaini inokwanirana nouwandi hwadzo, sezvakatemwa nomurao.

³¹Piraiwo gotora romupiro wokupfupira zvitadzo muchiwedzera pamusoro pomupiro wokupisa unogaroitwa zuva nezuva pamwechete nomupiro wawo wembesanwa nowezvokunwa.

³²“Pazuva rechinomwe pirai handira dzichiri duku nomwe, nehondohwe mbiri, nehwayana hono dzine gore rimwechete, gumi neina dzisina chinoshoreka.

³³Pirai nehandira dzacho nehondohwe dzacho, nehwayana dzacho, pamwechete nemipiro yembesanwa neyezvokunwa inokwanirana nouwandu hwadzo, sezvakatemwa nomurao.

³⁴Piraiwo gotora romupiro wokupfupira zvitadzo muchiwedzera pamupiro wokupisa unogaroitwa pamwechete nomupiro wawo wembesanwa nomupiro wawo wezvokunwa.

³⁵“Pazuva rorusere unganidzanai muite musangano mukuru mutsvene wozvokunamata, musaite basa rinorema.

³⁶Asi pirai mupiro wokupisa unoita zvokupiswa nomoto, unonhuhwirira zvinofadza ini Tenzi. Pirai handira nehondohwe, nehwayana hono dzine gore rimwechete nomwe, dzisina chinoshoreka.

³⁷Piraiwo handira yacho nehondohwe yacho nehwayana dzacho pamwechete nemipiro yembesanwa neyewaini inokwanirana nouwandu hwadzo sezvakatemwa nomurao.

³⁸Piraiwo gotora romupiro wokupfupira zvitadzo muchiwedzera pamusoro pomupiro wokupisa unogaroitwa zuva nezuva pamwechete nomupiro wawo wembesanwa nomupiro wawo wezvokunwa.

³⁹“Iyi ndiyo mipiro yamunofanira kupira kuna Tenzi pamazuva enyu makuru akatemwa ichiwedzerwa pamusoro pemipiro yamunopira nechido chenyu nomupiro wokuzvisarudzira neyokupisa neyembesanwa neyezvokunwa neyokuwadzana.”

⁴⁰Mosesi akaudza vaIsiraeri zvose zvaakanga audzwa naTenzi.