Read Bhaibhiri Idzva rechiShona Kuverengwa 3 Bible Online

Kuverengwa 3 - Bhaibhiri Idzva rechiShona bible

Kuverengwa 3

¹Ava ndivo vanakomana vaAroni naMosesi panguva yakataura Tenzi naMosesi pagomo reSinai.

²Aya ndiwo mazita avanakomana vaAroni. Wedangwe aiva ari Nadhabhu achiteverwa naAbhihu naEreazari naItamaru.

³Aya ndiwo mazita avana vaAroni vakagadzwa upristi vachiita zvokuzodzwa mafuta.

⁴Asi Nadhabhu naAbhihu vakafa pavakapisira Tenzi rusenzi pamoto usingabvumirwe vari kurenje reSinai. Vakafa vasina kumboita vana. Saka Ereazari naItamaru ndivo vaiita basa roupristi pamwechete naAroni, baba wavo.

⁵Mwari akataurira Mosesi achiti,

⁶“Unganidza vanhu vedzinza raRevhi uvaise pana Aroni uvape basa rokubatsira Aroni mupristi.

⁷Ngavaite mabasa ose omutendhe rinoera vachishandira Aroni negungano rose.

⁸Ngavachengete zvose zvomutendhe rokusanganira vachiitira vaIsiraeri mabasa ose omutendhe rinoera.

⁹Kubva mukati mavaIsiraeri vose unofanira kuturira vaRevhi mumaoko aAroni navanakomana vake vanofanira kunyatsopirwa kwaari.

¹⁰Gadza Aroni navanakomana vake kuti vaite mabasa avo oupristi, asi kana mumwe munhu zvake akaswedera ngaaurayiwe.”

¹¹Tenzi akataurira Mosesi achiti,

¹²“Chinzwa, ndasarudza vaRevhi kuti vave vanhu vangu panzvimbo yavose vanotanga kuberekwa, matangwe, pakati pavaIsiraeri. Saka vaRevhi vava vangu.

¹³Ndinodaro nokuti kubvira musi wandakarakasha matangwe ose eIjipiti ndakanga ndazvitsaurira matangwe ose omuIsiraeri kuti ave angu, kubvira matangwe avanhu neemhuka, ndeangu. Ndini Tenzi.”

¹⁴Tenzi akataurira Mosesi murenje reSinai achiti,

¹⁵“Verenga vanakomana vaRevhi nedzimba dzamadzibaba avo, mhuri nemhuri, munhurume wose kubvira parusvava rune mwedzi mumwechete zvichikwira.”

¹⁶Naizvozvo Mosesi akavaverenga sezvakanga zvataurwa naMwari.

¹⁷Ava ndivo vana vaRevhi, kunoti Gerishoni naKohati naMerari.

¹⁸Aya ndiwo mazita avana vaGerishoni nemhuri dzavo kune yaRibhini neyaShimei.

¹⁹VokwaKohati nemhuri dzavo ndevaAmuramu naIzhari naHebhuroni naUzieri.

²⁰Vana vokwaMerari nemhuri dzavo ndevaMahiri naMushi. Idzi ndidzo mhuri dzavaRevhi, mudzimba dzamadzibaba avo.

²¹VokwaGerishoni vaisanganisira mhuri yavaRibhini neyavaShimei. Idzodzi ndidzo mhuri dzokwaGerishoni.

²²Uwandi hwavanhurume vavo vakaverengwa vaye kubvira parusvava runo mwedzi mumwechete zvichikwira, vaisvika zviuru zvinomwe zvina mazana mashanu.

²³Vemhuri yaGerishoni ndivo vaizodzika matendhe avo kuseri kwetendhe rinoera nechokumadokero.

²⁴Eriasafu mwanakomana waRaeri anenge ari mutungamiriri wemhuri yaGerishoni.

²⁵Patendhe rokusanganira, basa remhuri yaGerishoni nderokuchengeta tendhe rinoera, namachira okudzikatirisa nejira rokudzikatirisa pamusuo wetendhe rokusanganira,

²⁶namachira okudzikatirisa ruvanze rwomukati metendhe rinoera, nejira rokudzikatirisa pamusuo weparuvanze rwakatenderera tendhe rinoera, neatari, netambo dzaro, nebasa rose repo.

²⁷VokwaKohati vaisanganisira mhuri yaAmuramu nemhuri yaIzhari neyaHebhuroni neyaUzira. Idzodzi ndidzo mhuri dzaKohati.

²⁸Uwandi hwavanhurume vose vakaverengwa vaye kubvira parusvava rune mwedzi mumwechete zvichikwira, vaisvika zviuru zvisere zvina mazana matanhatu. Ava ndivo vaiva vachengeti vetendhe.

²⁹Vemhuri yaKohati ndivo vaizodzika matendhe avo kumaodzanyemba kwetendhe rinoera.

³⁰Erizafani mwanakomana waUzieri anenge ari mutungamiriri wemhuri yaKohati.

³¹Ndivo vaiva nebasa rokuchengeta bhokisi rechitenderano netafura nechigadziko chomwenje nedziatari mbiri nemidziyo yaishandiswa mumupanda unoera neketeni rechidzikatiro nezvose zvebasa razvo.

³²Ereazari mwanakomana womupristi Aroni, ndiye aiva mutungamiriri wavaRevhi vose. Ndiye aiva mutariri wevose vaiita mabasa mutendhe rinoera.

³³Merari ndiye tateguru wemhuri yaMahiri neyaMushi. Iwaya ndiwo madzinza okwaMerari.

³⁴Uwandi hwavanhurume vavo vaikwana zviuru zvitanhatu namazana maviri kubvira pavana vano mwedzi mumwechete.

³⁵Vanhu vose vemhuri yaMerari ngavadzike matendhe avo zvichienda nechokuchamhembe kwetendhe rinoera. Zurieri mwana waAbhihairi ndiye aiva mutungamiriri wemhuri dzamadzibaba avo.

³⁶Vemhuri yaMerari ndivo vakapiwa basa rokuchengeta zvemapango etendhe rinoera nembariro, nembiru dzaro nezvigadzikiro nezvose zvinofambirana nazvo. Ndivo vaiita basa rose raienderana nezvinhu izvozvi.

³⁷Ndivo vaichengetawo mbiru nezvigadzikiro nehoko netambo zvokukomberedza ruvanze.

³⁸Vaizodzikawo matendhe avo pamberi petendhe rinoera, kumabvazuva pakatarisana netendhe rokusanganira nechokumabvazuva ndiMosesi naAroni navanakomana vake. Zvemipiro yomunzvimbo inoera zvaiva mumaoko avo zvose zvaifanira kuitirwa vaIsiraeri. Mumwewo munhuwo zvake anofemera kuita basa iroro ngaaurayiwe.

³⁹Vose vedzinza rekwaRevhi vakaverengwa naMosesi naAroni mhuri nemhuri sokurayirwa kwavakaitwa naTenzi. Uwandi hwavanhurume kubvira pavana vano mwedzi mumwechete zvichienda mberi vaiva makumi maviri ezviuru ane zviuru zviviri.

⁴⁰Tenzi akataurira Mosesi achiti, “Verenga matangwe ose echirume pakati pavaIsiraeri, kubvira parusvava runo mwedzi mumwechete zvichikwira, unyore mazita avo ose.

⁴¹Zvino panzvimbo yamatangwe avaIsiraeri iwaya namatangwe ezvipfuwo zvavo, nditsaurire vaRevhi kuti vave vanhu vangu, ini Tenzi.”

⁴²Naizvozvo Mosesi akaverenga matangwe iwaya ose pakati pavaIsiraeri sokuudzwa kwaakaitwa naTenzi.

⁴³Matangwe echirume ose akaverengwa kubvira parusvava runo mwedzi mumwechete zvichikwira, aisvika makumi maviri ezviuru ane zviuru zviviri zvina mazana maviri ana makumi manomwe navatatu.

⁴⁴Tenzi akataurira Mosesi achiti,

⁴⁵“Zvino panzvimbo yamatangwe avaIsiraeri, nditsaurire vaRevhi. Panzvimbowo yamatangwe ezvipfuwo zvavo, nditsaurire matangwe ezvipfuwo zvavaRevhi. VaRevhi vachava vangu ini Tenzi.

⁴⁶Zvino kuti udzikinure matangwe mazana maviri namakumi manomwe avaIsiraeri huri ihwo uwandi hwavanopfuura nahwo kuwanda kwakaita vaRevhi makumi manomwe navanhu vatatu. Naizvozvo vana vakapfuuridza ivavo ngavadzikinurwe.

⁴⁷Mumwe nomumwe wevana ivavo anofanira kudzikinurwa nemari yesirivha iri pamurao yomunzvimbo inoera.

⁴⁸Mari yokudzikunura vanhu vakapfuuridza ivava, ngaipiwe Aroni navanakomana vake.”

⁴⁹Saka Mosesi akatora mari yakadzikinuriswa vaya vakanga vapfuuridza pauwandi hwavaRevhi.

⁵⁰Akaunganidza mari inoita chiuru chimwechete china mazana matatu ana makumi matanhatu ane shanu emari yesirivha iri pamurao yomunzvimbo inoera.

⁵¹Mosesi akapa mari iya yavakadzikinuriswa nayo kuna Aroni navanakomana vake sokutaurirwa kwaakanga aitwa naTenzi.