Read Bhaibhiri Idzva rechiShona Kuverengwa 32 Bible Online

Kuverengwa 32 - Bhaibhiri Idzva rechiShona bible

Kuverengwa 32

¹Madzinza aRubheni naGadhi aiva nemombe dzakawanda kwazvo. Akaona nyika yeJazeri neyeGiriadhi dziri nyika dzina mafuro emombe,

²Naizvozvo vokwaGadhi nevekwaRubheni vakaenda kuna Mosesi nomupristi Ereazari navatungamiriri vegungano, ndokusvikoti,

³“KuAtaroti nokuDhibhoni nokuJazeri nokuNimura nokuHeshibhoni nokuEreare nokuSebhamu nokuNebho nokuBheoni

⁴kunyika dziya dzakakundwa naTenzi tichizviona, kuna mafuro emombe akanaka kwazvo. Zvino isu varanda venyu tine mombe.”

⁵Saka vakati, “Kana muchida tipei zvedu isu varanda venyu nyika iyoyi kuti ive nhaka yedu, murege zvenyu kuti tiyambuke kumhiri kwaJorodhani.”

⁶Asi Mosesi akapindura vokwaGadhi novokwaRubheni achiti, “Ko imi mungati hama dzenyu dziende dzoga kuhondo, imi mugere zvenyu kuno here?

⁷Ko munodireiko kuoresa mwoyo yavaIsiraeri kuti varege kuyambukira kunyika yavakapiwa naTenzi?

⁸Ndizvo zvakaitwa namadzibaba enyu pandakavatuma kubva kuKadheshibhanea kundoona nyika iyi.

⁹Vakandosvika kumapani eEshikoru vakaona nyika iyoyo, dzokei vooresa mwoyo yavaIsiraeri kuti varege kuyambukira kunyika yavakanga vapiwa naTenzi.

¹⁰Izvozvo zvakashatirisa Tenzi pazuva iroro akapika achiti,

¹¹‘Chokwadi hakuna mumwe wavarume vakabva kuIjipiti vane makore makumi maviri kana anopfuura iwayo vachaona nyika yandakapikira Abhurahamu naIsaki naJakobho nokuti havana kunditevera nomwoyo wose,

¹²kunze kwaKarebhu chete mwanakomana waJefune muKenezi naJoshuwa mwanakomana waNuni nokuti vakatevera Tenzi nomwoyo wose.’

¹³Tenzi akashatirirwa vaIsiraeri, akaita kuti vadzungaire murenje kwamakore makumi mana, kusvikira chizvarwa chose chakanga chatadzira Tenzi chapera kufa.

¹⁴Hezvika imi magara nhaka yamadzibaba enyu, muri chizvarwa chakaipa chinotonyanya kuti Tenzi ashatirirwe vaIsiraeri zvikuru.

¹⁵Kana imi mukatsauka pakumutevera achavasiyazve murenje. Ndimi muchaparadzisa vanhu ivava.”

¹⁶Vakasebera kwaari vakati, “Regai timbovakira pano zvipfuwo zvedu matanga, navana vedu maguta,

¹⁷tozotora zvombo zvedu tichienda kuhondo navaIsiraeri, tiri mberi kusvikira tavasvitsa kunzvimbo dzichava nhaka yavo. Izvozvo vana vedu vachange vagere mumaguta akakomberedzwa netsvingo vakadzivirwa kuvanhu vomuno.

¹⁸Hatizodzokeri kumisha yedu kusvikira muIsiraeri wose awana nyika ichava nhaka yake.

¹⁹Isu hatizopiwi nhaka pamwechete navo kumhiri kwaJorodhani zvichienda zvakadaro nokuti nhaka yedu taiwanira mhiri kuno kumabvazuva kwaJorodhani.”

²⁰Mosesi akavapindura achiti, “Kana muchizoita saizvozvo zvokutora zvombo muchienda kuhondo norubatsiro rwaTenzi,

²¹mumwe nomumwe wenyu akapakata zvombo achiyambuka Jorodhani achitungamiririrwa naTenzi kusvikira adzinga iye vavengi vake,

²²kusvikira nyika iyoyi yakundwa yava pasi paTenzi, mungachizodzoka zvenyu musisina mhosva pana Tenzi navaIsiraeri. Naizvozvo nyika ino ichava yenyu nemvumo yaTenzi.

²³“Asi mukasaita saizvozvi, matotadzira Tenzi. Saka zivai izvi zvokuti chitadzo chenyu chichakupfukirai.

²⁴Chivakirai zvenyu pwere dzenyu maguta, nezvipfuwo zvenyu matanga, muzoita zvamavimbisa.”

²⁵Vedzinza rokwaGadhi nevedzinza rokwaRubheni vakataura kuna Mosesi vachiti, “Isu varanda venyu tichaita zvamareva changamire wangu.

²⁶Pwere dzedu namadzimai edu nembudzi nehwai nemombe dzedu dzose, zvichasara zviri mumaguta kuno kuGiriadhi.

²⁷Asi isu varanda venyu tichayambuka, munhu wose ane zvombo zvehondo achitungamirirwa naTenzi tichienda kuhondo sokutaura kwenyu changamire.”

²⁸Mosesi akaudza mupristi Ereazari naJoshuwa mwanakomana waNuni navatungamiriri vamadzinza avaIsiraeri zvokuita navanhu ava

²⁹akavati, “Kana vedzinza rokwaGadhi nevedzinza rokwaRubheni vakayambuka Jorodhani nemi, mumwe nomumwe wavo akapakata zvombo zvehondo vachitungamirirwa naTenzi, mukakunda nyika iyoyo, vapei zvenyu nyika yeGiriadhi kuti ive yavo.

³⁰Asi vakasayambuka nemi kundorwa hondo, vachazowana mugove wavo pamwechete nemi munyika yeKanani.”

³¹Vedzinza rokwaGadhi nevedzinza rokwaRubheni vakapindura vachiti, “Zvataurwa naTenzi kwatiri varanda venyu ndizvo zvatichaita.

³²Isu tichayambuka takapakata zvombo zvedu zvehondo kunyika yeKanani tichitungamirirwa naTenzi kuitira kuti nhaka yedu ive mhiri kuno kwaJorodhani.”

³³Saka Mosesi akapa vedzinza rokwaGadhi nevedzinza rokwaRubheni nechikamu chapakati napakati chevedzinza raManase mwanakomana waJosefi, nyika yaSihoni mambo wavaAmori, nenyika yaOgu mambo wavaBhashani. Akavapa nyika iyoyo namaguta ayo ose nemiganho yacho, kunyange namaguta ose ari munharaunda macho.

³⁴Vedzinza rokwaGadhi vakavakirira tsvingo maguta aya anoti: Dhibhoni neAtaroti neAroeri

³⁵neAtarotishofani neJazeri neJogubheha

³⁶neBhetinimura neBhetiharani. Maguta aya namatanga ehwai akakomberedzwa netsvingo.

³⁷Vedzinza rokwaRubheni vakavaka maguta aya anoti: Heshibhoni neEreare neKiriataimu

³⁸neNebho neBhaarimeoni (mazita awo akazosandurwa) neSibhuma. Maguta avakavaka vakatumidza mazita.

³⁹Vemhuri yaMakiri wedzinza raManase vakaenda kuGiriadhi vakaikunda ndokuibvutira vaAmori vakanga vageremo.

⁴⁰Mosesi akapa nyika yaGiriadhi kuna Makiri mwanakomana waManase akagaramo.

⁴¹Jairi wedzinza raManase akandopamba misha yavo akaitumidza kuti misha yaJairi.

⁴²Nobha akandopamba guta reKenati nemisha yavo, akaitumidza nezita rake kuti Nobha.