Read Bhaibhiri Idzva rechiShona Kuverengwa 34 Bible Online

Kuverengwa 34 - Bhaibhiri Idzva rechiShona bible

Kuverengwa 34

¹Tenzi akataurira Mosesi achiti,

²“Udza vaIsiraeri kuti, kana masvika kunyika yeKanani, nyika ichava yenhaka yenyu, nyika yeKanani nemiganho yayo ndeiyi inoti:

³rutivi rwenyika iyoyo rwokuchamhembe ruchatangira kurenje reZini, ruchitevedza nokurutivi rweEdhomu. Muganho wayo wokumaodzanyemba uchatangisira kunoperera gungwa Romunyu nechokumabvazuva.

⁴Muganho wayo uchapota napamukwidza weAkirabhimu uchipfuura nokurenje reZini, uchizondosvika kumaodzanyemba kweKadheshibharinea wozoenda kuHazariadhari, uchizondosvika kuAzimoni.

⁵Muganho wacho uchabva kuAzimoni wopota nokukakova kanonzi KakovakeIjipiti wozondogumira kugungwa.[6]

⁶“Muganho wavo wokumadokero uchava gungwa Dzvuku nemahombekombe aro. Iwoyu ndiwo muganhu wenyu wokumadokero.

⁷“Muganho wenyu wokuchamhembe ndouyu, muchautara uchibva kugungwa guru uchienda kugomo reHoru,

⁸wozobva kugomo reHoru, woita sewava kupinda muguta reHamati. Muganho iwoyu unozosvika kuZedhadhi.

⁹Wozobvapo woenda kuZifuroni, wondoperera wava Hazarenani. Iwoyu ndiwo uchava muganho wavo wokuchamhembe.

¹⁰“Muchatara muganho wenyu wokumabvazuva kubva paHazarenani kusvika kuShefamu.

¹¹Wozodzika uchibva Shefamu wosvika kuRibhura nechokumabvazuva kweAini. Wodzikazve kundosvika kumateru egungwa reKinereti[7] kuri kumabvazuva.

¹²Wozodzika kuna Jorodhani uchindoperera kuGungwa roMunyu.[8] Iyoyi ndiyo nyika yenyu nemiganhu yayo inoipoteredza.”

¹³Mosesi akaudza vaIsiraeri kuti, “Iyoyi ndiyo nyika yenhaka yenyu yamuchagovana nechin'ange sekutemwa kwayakaitwa naTenzi, ichipiwa madzinza mapfumbamwe nechikamu chapakati napakati cherimwe dzinza

¹⁴nokuti vedzinza rokwaRubheni nemhuri dzavo, nevedzinza rokwaGadhi nemhuri dzavo pamwechete nechikamu chapakati napakati chevedzinza rokwaManase vanenge vatowana kare nhaka yavo.

¹⁵Vamadzinza iwaya maviri, nechikamu chepakati nepakati cherimwe dzinza vanenge vatowana kare nhaka yavo kumhiri kwaJorodhani kwakatarisana neJeriko kunobuda nezuva kumabvazuva.”

¹⁶Tenzi akataurira Mosesi achiti,

¹⁷“Aya ndiwo mazita avanhu vachakugovanisai nyika yenyu kunoti: Mupristi Ereazari naJoshuwa mwanakomana waNuni.

¹⁸Munofanira kusarudza mutungamiriri mumwechete padzinza roga roga wokugova nyika.

¹⁹Aya ndiwo mazita avarume vacho: “Wedzinza rokwaJudha ndiKarebhu mwanakomana waJefune.

²⁰Wedzinza rokwaSimeoni ndiShemueri mwanakomana waAmihudhi.

²¹Wedzinza rokwaBhenjamini ndiEridhadhi mwanakomana waKisironi.

²²Wedzinza rokwaDhani ndiBhuki mwanakomana waJongiri.

²³VokwaJosefi, wedzinza rokwaManase ndiHanieri mwanakomana waEfodhi.

²⁴Wedzinza rokwaEfuremu ndiKemueri mwanakomana waShifutani.

²⁵Wedzinza rokwaZebhuruni ndiErizafani mwanakomana waParinaki.

²⁶Wedzinza rokwaIsakari ndiParitieri mwanakomana waAzani.

²⁷Wedzinza rokwaAsheri ndiAhihudhi mwanakomana waSheromi.

²⁸Wedzinza rokwaNafutari ndiPedhaheri mwanakomana waAmihudhi.”

²⁹Ava ndivo varume vakapiwa naTenzi basa rokugovanisa vaIsiraeri nyika yeKanani.