Read Bhaibhiri Idzva rechiShona Kuverengwa 4 Bible Online

Kuverengwa 4 - Bhaibhiri Idzva rechiShona bible

Kuverengwa 4

¹Tenzi akataurira Mosesi naAroni achiti,

²“Verengai vaRevhi vemhuri yokwaKohati, muverenge vanhu, vose mhuri nemhuri nedzimba dzamadzibaba avo.

³Verengai vanhurume vose vana makore makumi matatu neanopfuura kune vane makore makumi mashanu vanobvumirwa kushanda mutendhe rinoera.

⁴Iri ndiro basa revanakomana vaKohati mutendhe rokusanganira nderezvezvinhu zvinoeresesa zvomo.”

⁵Kana nguva yokutamisa matendhe yasvika, Aroni nevanakomana vake ngavapinde mutendhe iroro, vaturure jira rokudzikatirisa riri pakatarisana nebhokisi rechitenderano, vafukidze naro bhokisi rechitenderano.

⁶Ngavatore dehwe retahashi vafukidze naro pamusoro pejira iroro, vawaridze jira reruvara rwedenga pamusoro pedehwe iroro, vapfekere mapango okutakurisa bhokisi rinoera.

⁷Ngavawarire jira reruvara rwedenga patafura yechingwa chepana Mwari, varongedzere pajira iroro ndiro namadhishi orusenzi nemidziyo yokuisa zvinopirwa, nemidziyo yomupiro nezvokunwa. Chingwa chepana Mwari chinofanira kuva ipapo nguva dzose.

⁸Ngavatore jira dzvuku vafukidze naro midziyo iyoyo yose, vaise dehwe retahashi pamusoro payo, vapfekere mapango okutakurisa tafura iyoyo.

⁹Ngavatore jira reruvara rwedenga vaputire chigadzikiro chomwenje pamwechete namarambi acho nezvokuadzimisa netireyi dzesimbi, nemidziyo inochengeterwa mafuta eorivhi.

¹⁰Ngavachiputire pamwechete nemidziyo yacho yose mudehwe retahashi, vagadzikire zvose pamapango okutakurisa.

¹¹Ngavawarire jira reruvara rwedenga paatari yendarama, vaiputirewo nedehwe retahashi, vapfekere mapango okutakurisa atari iyoyo.

¹²Ngavatore jira reruvara rwedenga vaputire midziyo yose inoshandiswa munzvimbo inoera vaise dehwe rakanyatsosukutwa pamusoro payo, vagadzike izvozvo pamapango okutakurisa.

¹³Ngavabvise dota paatari, vawarire jira dzvuku pairi,

¹⁴varongedze pajira iroro midziyo yose yepaatari inoti mabisiro neforogo nefoshoro nembenge nemidziyo yose yepaatari. Ngavaifukidze nedehwe retahashi, vapfekere mapango okuitakurisa.

¹⁵Kana Aroni navanakomana vake vapedza kurongedza nokuputira zvose panotamiswa tendhe rinoera, vanhu vemhuri yokwaKohati vanozouya kuzotakura zvinhu zvinoera. Asi ngavarege kubata zvinhu zvinoera nokuti vangadaro vakafa. Ndiwo mabasa anoitwa navanhu vemhuri yokwaKohati mutendhe rokusanganira.

¹⁶Ereazari mwanakomana womupristi Aroni, ndiye ane basa rezvemafuta okuisa mumarambi, norusenzi noupfu hwomipiro yembesanwa, namafuta okuzodzesa nezvimwe zvose zvomutendhe rinoera nemidziyo yemo.

¹⁷Tenzi akataurira Mosesi naAroni achiti,

¹⁸“Musaite kuti vemba yokwaKohati vatsakatike pakati pedzinza raRevhi.

¹⁹Zvino, kuti vararame varege kufa pavanouya pedyo nezvinhu zvinoera zvamuchaita kwavari ndezvizvi; Aroni navanakomana vake vachapindamo vovagovera mabasa okuita.

²⁰Asi ngavarege kupindamo vachitarisa zvinhu zvinoera kana kwekanguva kaduku zvako kuti varege kufa.”

²¹Tenzi akataurira Mosesi achiti,

²²“Verenga vanhu vemhuri yokwaGerishoni verenga vanhu vose, mhuri nemhuri nedzimba dzamadzibaba avo,

²³vanhurume vose kubvira pana vana makore makumi matatu zvichikwira kusvikira pana vana makumi mashanu, vanokwanisa kushanda mutendhe rokusanganira.

²⁴Iri ndiro basa remhuri dzokwaGerishoni pavanoshanda nokutakura zvinhu.

²⁵Ndivo vanotakura machira maviri okudzikatirisa tendhe rokusanganira needenga rayo, romukati nerapamusoro, nedehwe rembudzi rokufukidza padenga paro nejira rokudzikatirisa repamusuo,

²⁶namachira okudzikatirisa ruvanze rwomukati metendhe rinoera, nejira rokudzikatirisa pamusuo wokupinda muruvanze mune atari, netambo dzayo, nemidziyo yose yebasa ravo. Vanofanira kuita basa rose rinodiwa pazviri.

²⁷Basa rose richaitwa nevekwaGerishoni ibasa ravanenge vatumwa naAroni nevana vake, zvose zvavanotakura nazvose zvavanoita. Ndimi muchavapa basa rokutakura.

²⁸Saka mabasa iwaya ndiwo avanhu vemhuri yokwaGerishoni avanoita mutendhe rinoera. Vachaaita vachitungamirirwa naItamaru mwanakomana womupristi Aroni.

²⁹“Verenga vaRevhi vemhuri yokwaMerari uchiverenga vanhu vose mhuri nemhuri nedzimba dzamadzibaba avo.

³⁰Verenga vanhurume vose kubvira pana vana makore makumi matatu zvichikwira kusvikira pana vana makumi mashanu vanokwanisa kushanda mutendhe rokusanganira.

³¹Iri ndiro basa ravo rokutakura ndiro basa rose mutendhe rokusanganira basa rokutakura mbiru nezvigadziko namapango nembariro zvetendhe rokusanganira,

³²nembiru dzenhandare yose kuitenderedza nezvigadzikiro zvadzo nehoko netambo nenhumbi dzavo nezvose zvadzinoshanda nadzo.

³³Iri ndiro basa revemba yokwaMerari, basa rose ravanoita mutendhe rokusanganira. Vachariita vachitungamirirwa naItamaru mwanakomana womupristi Aroni.”

³⁴Mosesi naAroni navatungamiriri vegungano ravaIsiraeri vakaverenga vanhurume vemba yokwaKohati, mhuri nemhuri nedzimba dzamadzibaba avo,

³⁵kubvira pana vana makumi matatu amakore zvichikwira kusvikira kuna vana makumi mashanu, vose vaikwanisa kuita basa romutendhe rokusanganira.

³⁶Pamhuri dzavo dzose vaikwana zviuru zviviri namazana manomwe ana makumi mashanu avanhu.

³⁷Ihwohwu ndihwo uwandi hwevemba yokwaKohati, vose vaiita basa remutendhe rokusanganira vaya vakaverengwa naMosesi naAroni sokuudzwa kwakanga kwaitwa Mosesi naTenzi.

³⁸Vechirume vemba yokwaGerishoni vakaverengwa, mhuri nemhuri nedzimba dzamadzibaba avo,

³⁹kubvira pana vana makumi matatu amakore zvichikwira kusvikira kuna vana makumi mashanu, vose vaikwanisa kuita basa romutendhe rokusanganira.

⁴⁰Pamhuri dzavo dzose nedzimba dzamadzibaba avo vaikwana zviuru zviviri namazana matanhatu ana makumi matatu avanhu.

⁴¹Ihwohwu ndihwo uwandi hwevemba yokwaGerishoni, vose vaiita basa romutendhe rokusanganira vakaverengwa naMosesi naAroni sokuudzwa kwakanga kwaitwa Mosesi naTenzi.

⁴²Vanhurume vemba yokwaMerari vakaverengwa, mhuri nemhuri nedzimba dzamadzibaba avo,

⁴³kubvira pana vana makumi matatu amakore zvichikwira kusvikira kuna vana makumi mashanu, vose vaikwanisa kuita basa romutendhe rokusanganira.

⁴⁴Pamhuri dzavo dzose nedzimba dzemadzibaba avo vaikwana zviuru zvitatu namazana maviri.

⁴⁵Ihwohwu ndihwo uwandi hwevechirume hwevemba yokwaMerari vakaverengwa naMosesi naAroni sokuudzwa kwakanga kwaitwa Mosesi naTenzi.

⁴⁶VaRevhi vose zvavo vakaverengwa naMosesi naAroni navatungamiriri vavaIsiraeri, vaiverengwa mhuri nemhuri, nedzimba dzamadzibaba avo.

⁴⁷Vaibvira kuverenga pana vana makumi matatu amakore zvichikwira kusvikira kuna vana makumi mashanu, vose vaikwanisa kupinda basa rokushanda nokutakura mitoro yomutendhe rokusanganira.

⁴⁸Vose vakaverengwa vaikwana zviuru zvisere namazana mashanu ana makumi masere avanhu.

⁴⁹Vose vakaverengwa sokutaurirwa kwakaitwa Mosesi naTenzi. Mumwe nomumwe akapiwa basa rokuita kana kuudzwa zvokutakura, ndokuverengwa kwavakaitwa sokuudzwa kwakaitwa Mosesi naTenzi.