Read Bhaibhiri Idzva rechiShona Kuverengwa 7 Bible Online

Kuverengwa 7 - Bhaibhiri Idzva rechiShona bible

Kuverengwa 7

¹Mosesi akati apedza kumisa tendhe rinoera akarizodza akariturira kuna Mwari pamwechete nezvose zvomo akazodza akaturirawo atari nemidziyo yayo.

²Vatungamiriri vavaIsiraeri navatungamiriri vavo vedzimhuri nevemadzinza vaitungamirira kuverengwa kwavanhu,

³vakauya nezvipo zvavo kuna Tenzi. Zvaiva ngoro nhanhatu dzakafukidzwa uyewo nzombe gumi nembiri. Vatungamiriri vaviri vaiunza ngoro imwechete, mumwe nomumwe wavo achiunza nzombe imwechete. Vakazviunza kutendhe rinoera

⁴Tenzi akataurira Mosesi achiti,

⁵“Gamuchira izvi kwavari zvishandiswe pabasa romutendhe rinoera. Upe zvinhu izvozvo mumwe nomumwe wavaRevhi maererano nebasa raanoita.”

⁶Naizvozvo Mosesi akatora ngoro dziya nenzombe akapa vaRevhi.

⁷Akapa vemhuri yokwaGerishoni ngoro mbiri, nenzombe ina maererano nebasa ravaiita.

⁸Akapa vemhuri yokwaMerari ngoro ina nenzombe tsere maererano nebasa ravaiita vachitungamirirwa naItamaru mwanakomana womupristi Aroni.

⁹Asi hapana chaakapa vemhuri yokwaKohati nokuti ndivo vaiva nebasa rezvinhu zvinoera zvaifanira kutakurwa pamafudzi.

¹⁰Vatungamiriri vakauyawo nezvipo zvokupira nazvo atari kuna Mwari pazuva rayakazodzwa, vakauya nazvo kuatari.

¹¹Tenzi akataurira Mosesi kuti vanhu ivavo, ngavauye kuzopira zvipo zvavo zvokuturira atari kuna Mwari vachiita mumwechete, mumwechete pazuva.

¹²Akapira mupiro wake zuva rokutanga ndiNahishoni mwanakomana waAminadhabhu wedzinza rokwaJudha.

¹³Mupiro wake waiva neizvi zvinoti: mbenge yesirivha yairema kirogiramu rimwechete namagiramu makumi mashanu, kwouya ndiro yesirivha yairema mazana masere amagiramu maererano nomwero weshekeri romunzvimbo inoera, dzose dziri mbiri dzakanga dzizere noupfu hwekoroni hwakatsetseka hwakakanyiwa namafuta hwomupiro wembesanwa;

¹⁴kwoti dhishi rimwechete rendarama rairema zana ramagiramu rina magiramu gumi rizere rusenzi;

¹⁵kwotiwo handira ichiri duku, imwechete, nehondohwe imwechete yomupiro wokupisa;

¹⁶uye gotora rimwechete romupiro wokupfupira zvitadzo;

¹⁷kuchizoti zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Uyu ndiwo mupiro waNahishoni mwanakomana wavaAminadhabhu.

¹⁸Pazuva rechipiri racho, Nataneri mwanakomana waZuaru, mutungamiriri wevokwaIsakari, akapirawo mupiro.

¹⁹Mupiro wake waakapira waiva wezvizvi zvinoti: mbenge yesirivha yairema kirogiramu rimwechete namagiramu makumi mashanu; kwouya ndiro yesirivha yairema mazana masere amagiramu, maererano nomwero weshekeri romunzvimbo inoera, dzose dziri mbiri dzakanga dzizere noupfu hwekoroni hwakatsetseka hwakakanyiwa namafuta omupiro wembesanwa;

²⁰kwoti dhishi rendarama rairema zana ramagiramu rina magiramu gumi, rizere rusenzi;

²¹kwotiwo handira ichiri duku imwechete, nehondohwe imwechete, nehwayana hono imwechete ine gore rimwechete zvomupiro wokupisa;

²²uye gotora rimwechete romupiro wokupfupira zvitadzo;

²³kwozoti zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu, dzine gore rimwechete. Uyu ndiwo mupiro waNataneri mwanakomana wavaZuaru.

²⁴Pazuva retatu racho, akauya ndiEriabhu mwanakomana waHeroni, aiva mutungamiriri wavanhu govero rokwaZebhuruni.

²⁵Mupiro wakewo waiva weizvi zvinoti: mbenge yesirivha yairema kirogiramu rimwechete namagiramu makumi mashanu, kwouya ndiro yesirivha yairema mazana masere amagiramu maererano nomwero weshekeri romunzvimbo inoera; dzose dziri mbiri dzakanga dzizere noupfu hwekoroni hwakatsetseka hwakakanyiwa namafuta hwomupiro wembesanwa;

²⁶kwouyawo dhishi rimwechete rendarama rairema zana ramagiramu rina magiramu gumi, rizere rusenzi,

²⁷kwoti handira ichiri duku imwechete, nehondohwe imwechete nehwayana hono imwechete ine gore rimwechete zvomupiro wokupisa;

²⁸kukati gotora rimwechete romupiro wokupfupira zvitadzo,

²⁹kuchizoti zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Uyu ndiwo mupiro waEriabhu mwanakomana wavaHeroni.

³⁰Pazuva rechina racho, kwakauyawo Erizuru mwanakomana wavaShedheuru, aiva mutungamiriri wevedzinza rokwaRubheni.

³¹Mupiro wake waiva wezvizvi zvinoti: mbenge yesirivha yairema kirogiramu rimwechete namagiramu makumi mashanu; kwoti ndiro yesirivha yairema mazana masere amagiramu maererano nomwero weshekeri romunzvimbo inoera, dzose dziri mbiri dzakanga dzizere upfu hwekoroni hwakatsetseka hwakakanyiwa namafuta, hwomupiro wembesanwa,

³²kukati dhishi rimwechete rendarama rairema zana ramagiramu rina magiramu gumi, rizere rusenzi,

³³kwotiwo handira ichiri duku imwechete nehondohwe imwechete nehwayana hono imwechete, ine gore rimwechete zvomupiro wokupisa;

³⁴kwotizve gotora rimwechete romupiro wokupfupira zvitadzo

³⁵kuchizouya zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu, dzine gore rimwechete. Iwoyu ndiwo mupiro waErizuru mwanakomana waShedheuru.

³⁶Pazuva rechishanu racho, kwakauyawo Sherumieri mwanakomana waZurishadhai, aiva mutungamiriri wevedzinza rokwaSimeoni.

³⁷Mupiro wake waiva wezvizvi zvinoti: mbenge imwechete yesirivha, yairema kirogiramu rimwechete namagiramu makumi mashanu; uye ndiro imwechete yesirivha yairema mazana masere amagiramu maererano nomwero weshekeri romunzvimbo inoera, dzose dziri mbiri dzakanga dzizere upfu hwekoroni hwakatsetseka hwakakanyiwa namafuta hwomupiro wembesanwa;

³⁸kwouya dhishi rimwechete rendarama rairema zana ramagiramu rina magiramu gumi, rizere rusenzi;

³⁹uyewo handira ichiri duku, imwechete nehondohwe imwechete, nehwayana hono imwechete ine gore rimwechete zvomupiro wokupisa;

⁴⁰uyezve gotora rimwechete romupiro wokupfupira zvitadzo;

⁴¹kukati zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Iwoyu ndiwo mupiro waSherumieri mwanakomana waZurishadhai.

⁴²Pazuva rechitanhatu racho, kwakauya Eriasafu mwanakomana waDheueri, aiva mutungamiriri wevedzinza rokwaGadhi.

⁴³Mupirowo wake waiva weizvi zvinoti: mbenge imwechete yesirivha yairema kirogiramu rimwechete namagiramu makumi mashanu; kwouya ndiro imwechete yesirivha yairema mazana masere amagiramu maererano nomwero weshekeri romunzvimbo inoera, dzose dziri mbiri dzakanga dzizere noupfu hwekoroni hwakatsetseka hwakakanyiwa namafuta hwomupiro wembesanwa;

⁴⁴kwoti dhishi rimwechete rendarama rairema zana ramagiramu namagiramu gumi, rizere rusenzi;

⁴⁵kukati handira ichiri duku imwechete nehondohwe imwechete nehwayana hono imwechete ine gore rimwechete zvomupiro wokupisa;

⁴⁶kukachiti gotora rimwechete romupiro wokupfupira zvitadzo;

⁴⁷kukatiwo zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Uyu ndiwo mupiro waEriasafu mwanakomana waDheueri.

⁴⁸Pazuva rechinomwe racho, kwakauyawo Erishama mwanakomana waAmihudhi, aiva mutungamiriri wevedzinza rokwaEfuraimu.

⁴⁹Mupiro wake waiva wezvizvi zvinoti: mbenge imwechete yesirivha yairema kirogiramu rimwechete namagiramu makumi mashanu; kwouya ndiro imwechete yesirivha yairema mazana masere amagiramu maererano nomwero weshekeri romunzvimbo inoera; dzose dziri mbiri dzakanga dzizere upfu hwekoroni hwakatsetseka hwakakanyiwa namafuta omupiro wembesanwa;

⁵⁰kwouyazve dhishi rimwechete rendarama rairema zana ramagiramu namagiramu gumi, rizere rusenzi;

⁵¹kwoti handira ichiri duku imwechete nehondohwe imwechete nehwayana hono imwechete ine gore rimwechete zvomupiro wokupisa;

⁵²kwotiwo gotora rimwechete romupiro wokupfupira zvitadzo;

⁵³kukati zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Uyuwo ndiwo mupiro waErishama mwanakomana waAmihudhi.

⁵⁴Pazuva rechisere racho, kwakauya Gamarieri mwanakomana waPedhahizuru, aiva mutungamiriri wevedzinza rokwaManase.

⁵⁵Mupiro wakewo waiva wezvizvi zvinoti: mbenge imwechete yesirivha yairema kirogiramu rimwechete namagiramu makumi mashanu; kwouya ndiro imwechete yesirivha yairema mazana masere amagiramu maererano nomwero weshekeri romunzvimbo inoera, dzose dziri mbiri dzakanga dzizere noupfu hwekoroni hwakatsetseka hwakakanyiwa namafuta hwomupiro wembesanwa;

⁵⁶kukati dhishi rimwechete rendarama rairema zana ramagiramu namagiramu gumi, rizere rusenzi;

⁵⁷kukachiti handira ichiri duku imwechete nehondohwe imwechete nehwayana honho imwechete ine gore rimwechete zvomupiro wokupisa;

⁵⁸kuchiti gotora rimwechete romupiro wokupfupira zvitadzo;

⁵⁹kuchizoti zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Iwoyu ndiwo mupiro waGamarieri mwanakomana waPedhahizuru.

⁶⁰Pazuva rechipfumbamwe racho, kwakauya Abhidhani mwanakomana waGidheoni, aiva mutungamiriri wevedzinza rokwaBhenjamini.

⁶¹Mupiro wake waiva weizvi zvinoti: mbenge imwechete yesirivha yairema kirogiramu rimwechete namagiramu makumi mashanu; uye ndiro imwechete yesirivha yairema mazana masere amagiramu maererano nomwero weshekeri romunzvimbo inoera; dzose dziri mbiri dzakanga dzizere noupfu hwekoroni hwakatsetseka hwakakanyiwa namafuta hwomupiro wembesanwa;

⁶²uyewo dhishi rimwechete rendarama rairema zana ramagiramu namagiramu gumi rizere rusenzi;

⁶³uyezve handira ichiri duku imwechete nehondohwe imwechete nehwayana hono imwechete ine gore rimwechete zvomupiro wokupisa;

⁶⁴kwouya gotora rimwechete romupiro wokupfupira zvitadzo;

⁶⁵kwozouya zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Uyu ndiwo mupiro waAbhidhani mwanakomana waGidheoni.

⁶⁶Pazuva rechigumi racho, kwakauyawo Ahiezero mwanakomana wavaAmishadhai, aiva mutungamiriri wevedzinza rokwaDhani.

⁶⁷Mupiro wake waiva wezvizviwo zvinoti: mbenge imwechete yesirivha yairema kirogiramu rimwechete namagiramu makumi mashanu; kwouya ndiro imwechete yesirivha yairema mazana masere amagiramu namagiramu gumi maererano nomwero weshekeri romunzvimbo inoera; dzose dziri mbiri dzakanga dzizere upfu hwekoroni hwakatsetseka hwakakanyiwa namafuta hwomupiro wembesanwa;

⁶⁸uyewo dhishi rimwechete rendarama rairema zana ramagiramu namagiramu gumi rizere rusenzi;

⁶⁹uyezve handira ichiri duku imwechete nehondohwe imwechete nehwayana hono imwechete ine gore rimwechete zvomupiro wokupisa;

⁷⁰kwouyawo gotora rimwechete romupiro wokupfupira zvitadzo;

⁷¹kwozouya zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Uyu ndiwo mupiro waAhiezero mwanakomana waAmishadhai.

⁷²Pazuva rechigumi nerimwe, kwakauya Pagieri mwanakomana waOkirani aiva mutungamiriri wevedzinza rokwaAsheru.

⁷³Mupiro wakewo waiva wezvizvi zvinoti: mbenge imwechete yesirivha yairema kirogiramu rimwechete namagiramu makumi mashanu; kwouya ndiro imwechete yesirivha yairema mazana masere amagiramu maererano nomwero weshekeri romunzvimbo inoera, dzose dziri mbiri dzakanga dzizere noupfu hwekoroni hwakatsetseka hwakakanyiwa namafuta hwomupiro wembesanwa;

⁷⁴kukati dhishi rimwechete rendarama rairema zana ramagiramu namagiramu gumi, rizere rusenzi;

⁷⁵kuchitiwo handira ichiri duku imwechete nehondohwe imwechete nehwayana hono imwechete ine gore rimwechete zvomupiro wokupisa;

⁷⁶kuchiti gotora rimwechete romupiro wokupfupira zvitadzo;

⁷⁷kuchizoti zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Uyu ndiwo mupiro waPagieri mwanakomana waOkirani.

⁷⁸Pazuva rechigumi namaviri racho, kwakauya Ahira mwanakomana waEnani, aiva mutungamiriri wevedzinza rokwaNafutari.

⁷⁹Mupirowo wake waiva wezvizvi zvinoti: mbenge imwechete yesirivha yairema kirogiramu rimwechete namagiramu makumi mashanu; kwouya ndiro imwechete yesirivha yairema mazana masere amagiramu maererano nomwero weshekeri romunzvimbo inoera; dzose dziri mbiri dzakanga dzizere upfu hwekoroni hwakatsetseka hwakakanyiwa namafuta hwomupiro wembesanwa;

⁸⁰kwoti dhishi rimwechete rendarama rairema zana ramagiramu namagiramu gumi, rizere rusenzi;

⁸¹kwouya handira ichiri duku imwechete nehondohwe imwechete nehwayana hono imwechete ine gore rimwechete zvomupiro wokupisa;

⁸²kwotiwo gotora rimwechete romupiro wokupfupira zvitadzo;

⁸³kwozouya zvechibayiro chomupiro wokuwadzana zvinoti: nzombe mbiri nehondohwe shanu namakotora mashanu nehwayana hono shanu dzine gore rimwechete. Uyu ndiwo mupiro waAhira mwanakomana waEnani.

⁸⁴Uyu ndiwo mupiro wakaunzwa wokuteketerera atari kuna Mwari pazuva rayakazodzwa wakabviswa navakuru vakuru vavaIsiraeri. Kwakaunzwa izvi zvinoti mbenge dzesirivha gumi nembiri nendiro dzesirivha gumi nembiri;

⁸⁵mbenge imwe neimwe ichirema kirogiramu rimwechete namagiramu makumi mashanu; ndirowo imwe neimwe ichirema mazana masere amagiramu. Naizvozvo pamwechete, midziyo yose yesirivha yakaita mwero wokurema unosvika makumi maviri amakirogiramu ana makirogiramu manomwe namagiramu makumi matanhatu, maererano nomwero weshekeri romunzvimbo inoera;

⁸⁶kwouya madhishi endarama gumi namaviri aye azere rusenzi, dhishi rimwechete rairema zana ramagiramu namagiramu gumi; pamwechete, madhishi ose endarama akaita mwero wokurema unosvika kirogiramu rimwechete rina makumi matatu amagiramu namagiramu maviri;

⁸⁷kwoti zvipfuwo zvose zvechibayiro chomupiro wokupisa zvinoti: handira gumi nembiri nehondohwe gumi nembiri nehwayana gumi nembiri hono dzine gore rimwechete pamwechete noupfu hwadzo hwomupiro wembesanwa; kwotiwo makotora gumi namaviri omupiro wokupfupira zvitadzo;

⁸⁸kwochiti zvipfuwo zvose pamwechete zvechibayiro chomupiro wokuwadzana zvakaita: handira makumi maviri ane ina namakumi matanhatu ehondohwe namakotora makumi matanhatu namakumi matanhatuwo ehwayana hono dzine gore rimwechete. Iwoyu ndiwo mupiro wokuteketera atari kuna Mwari wakaunzwa iyo yazodzwa.

⁸⁹Mosesi paakapinda mutendhe rokusanganira kundotaura naTenzi, akanzwa izwi raitaura kwaari richibva pahwidibiro yakanga yakakwidibira bhokisi rechitenderano, nechapakati pamakerubhu. Izwi iri rakataura kwaari iye.