Read Bhaibhiri Idzva rechiShona Kuverengwa 9 Bible Online

Kuverengwa 9 - Bhaibhiri Idzva rechiShona bible

Kuverengwa 9

¹Tenzi akataurira Mosesi murenje reSinai pamwedzi wokutanga wegore rechipiri rokubuda kwavaIsiraeri munyika yeIjipiti achiti,

²“VaIsiraeri ngavachengete zuva guru rePasika panguva yayo yakatemwa.

³Richengetei pazuva regumi nechina romwedzi uno, kubvira zuva rodoka muchitevedza mirao nezvirongwa zvaro zvose.”

⁴Naizvozvo Mosesi akandoudza vaIsiraeri kuti vachengete zuva guru rePasika.

⁵VaIsiraeri vakachengeta zuva guru rePasika pamwedzi wechiposhi murenje reSinai kubvira zuva rodoka pazuva regumi nechina romwedzi iwoyo. Vakaita zvose zvakaudzwa Mosesi naTenzi.

⁶Asi kwakava navamwe varume vakanga van'ora nokuti vakanga vabata chitunha. Varume ivavo vakanga vasisakwanisi kuchengeta Pasika pazuva iroro. Vakaenda kuna Mosesi naAroni

⁷vakandoti, “Isu takan'ora nokuti takabata chitunha. Asi tinorambidzirweiko kupira Tenzi mipiro panguva yakatemwa pamwechete navamwe vedu vaIsiraeri.”

⁸Mosesi ndokuti, “Chimbomirai kusvikira ndanzwa zvandichapiwa naTenzi.”

⁹Tenzi akataurira Mosesi achiti,

¹⁰“Taurira vaIsiraeri uchiti ani naani wenyu kana mumwe wechizvarwa chenyu anenge abata chitunha chikamun'oresa, nyangwe anenge ari kure, ari parwendo, kana achida kuchengeta Pasika yaTenzi,

¹¹anofanira kuzoichengeta. Ngavaichengete mumwedzi wechipiri pazuva regumi nechina zuva rodoka, vaidye pamwechete nemiriwo inovava nechingwa chisina mbiriso,

¹²havafanire kusiya kana chii zvacho chayo kusvikira mangwana. Hapana pfupa rechibayiro rayo rinofanira kutyorwa. Ngavaichengete vachitevedza mirao yayo yose.

¹³Asi ani naani anenge asina kun'ora anenge asiri parwendo anenge arega kuchengeta Pasika atozvichekanisa ukama novokwake nokuti haana kundipa mupiro wake panguva yakatemwa, acharangirwa chitadzo chake.

¹⁴“Kana mutorwa wamugere naye akada kuchengeta zuva guru rePasika, ngaachengetewo mirao nezvirongwa zvayo zvose. Murao iwoyo ngauchengetwe nemunhu wose, muIsiraeri kana mutorwa.”

¹⁵Pazuva rakadzikwa tendhe rinoera gore rakauya rikafukidza tendhe rouchapupu. Usiku gore raitarisika somoto kusvikira kwaedza.

¹⁶Saka nguva dzose tendhe iroro rainge rakafukidzwa negore masikati, usiku nechainge moto.

¹⁷Paingosimuka gore iroro patendhe, vaIsiraeri vaibva vatama vachindodzika matendhe avo paraindomirira.

¹⁸Kutama kwavaIsiraeri panzvimbo nokudzika matendhe kwavo pane imwe nzvimbo kwaitoitwa kana kwabva shoko kuna Tenzi. Kwaiti gore rikaramba rakafukidza tendhe rinoera, vaIsiraeri vairambawo vakadzika matendhe avo ipapo.

¹⁹Kunyange gore parairamba rakafukidza tendhe rinoera kwenguva ndefu vaiteerera Tenzi vachiramba varipo.

²⁰Dzimwe nguva gore raifukidza tendhe rinoera kwamazuva mashoma; vaIsiraeri vaitama kana kuramba varipo maererano neshoko rainge rabva kuna Tenzi.

²¹Dzimwe nguva gore raingorifukidza kubvira manheru kusvikira mangwanani. Paisimuka gore mangwanani vaibva vasimudzirao rwendo rwavo, kana rainge raramba riripo masikati nousiku; parainge razosimuka, ndopavaibva vasimudzirawo rwendo rwavo.

²²Kana dai kwaipera mazuva maviri, kana mwedzi, kana gore kana nguva ndefu gore rakafukidza tendhe rinoera, vaIsiraeri vairamba vari pamatendhe avo, vasingasimudzire rwendo rwavo. Asi paraisimuka vaibva vasimudzira rwendo rwavo.

²³Kudzika matendhe kwavo nokutama kwavo, kwaitoitwa kana kwabva shoko kuna Tenzi vachiteerera zvainge zvatemwa naTenzi sokutaurirwa kwainge kwaitwa Mosesi naTenzi.