Read Bhaibhiri Idzva rechiShona Mika 2 Bible Online

Mika 2 - Bhaibhiri Idzva rechiShona bible

Mika 2

¹Zvichavawana, avo vanorangarira kuita zvakaipa vachironga kuita zvouipi vari pamibhedha yavo! Kukangochena chete vobva vatozviita nokuti simba rokuzviita vanaro.

²Vanochiva minda voitora nechisimba, vanochiva dzimba vachidzibvuta. Vanokukucha munhu pamwechete nemhuri yake, munhu nezvinhu zvake zvenhaka.

³Naizvozvo Tenzi anoti, “Chinzwai ini ndava kurongera mhuri iyoyi zvinhu zvakaipa zvamusingagoni kuzvitakanura pamutsipa. Zvokufamba muchizvikudza zvichakupererai nokuti inenge yava nguva yakaipa.

⁴Munguva iyoyo kuchaimbwa rumbo rwokukusekai imi muchihwihwidza kuchema muchiungudza zvinosiririsa muchiti: ‘Tanyatsoparara isu, nhaka yevokwangu, yasandurwa, ndikaitorerwa. Minda yokwedu yagoverwa zvayo kuvanhu vakatipamba.’ ”[2]

⁵Saka ipapo mugungano raTenzi, munenge musisina munhu anokupimirai migove yenyu netambo.

⁶Vanoparidza vachiti, “Musaparidze. Rega kuparidza zvinhu zvakadaro. Hapana chinotinyadzisa chichatiwira.”

⁷Imba yokwaJakobho ingapinde rushambwa[3] nhai? Tenzi haasisina mwoyo murefu here? Ndiwo maitiro ake here? Handiti ndinototaura zvakanaka kune vanotevedza ururami?

⁸Imi ndimi matova mhandu yacho kuvanhu vangu munobvutira munhu asina mhaka batye rake, munhu anenge avarairwa achiti hapana chinouya kwaari momupa nhamo yokunge ari muhondo.[4]

⁹Munodzinga imi madzimai avanhu vangu mudzimba dzavo dzavanoda kwazvo, vana vavo munovabvutira nokusingaperi chikomborero chandakavapa.

¹⁰Simukai muende nokuti pano hapasisiri pokugara pamusana pokun'ora kunoparadzwa zvikuru kwazvo kuchaita kuti iparadzwe zvachose.

¹¹“Kana munhu akafamba zvake achitaura mwando zvawo enhema achiti, ‘Regai ndikutaurirei kuti waini nedoro zvichabooka,’ iyeyo ndiye angatova zvake ava muporofita wavanhu ava.

¹²“Imi vokwaJakobho ndichanyatsokukokorodzai mose zvenyu, ndichinyatsounganidza chitsama chakasara chevokwaIsiraeri. Ndichavaisa pamwechete sedanga rehwai, sedanga rezvipfuwo zviri mumafuro azvo, vari mhomho chaiyo yavanhu.

¹³Iye achavavhurira nzira, ndiye achavatungamirira vachityora napasuo guru vobuda napo. Mambo wavo, Tenzi ndiye achavatungamirira ari mberi.”