Read Bhaibhiri Idzva rechiShona Mika 7 Bible Online

Mika 7 - Bhaibhiri Idzva rechiShona bible

Mika 7

¹Maiwe zvangu inga ndawira ini, nokuti ndaita senguva yezhizha iya yokunge michero yapera kutanhwa, senguva yokunge magirepisi apera kufuhwiwa, kusisina zvako kana chisumbu chokuti udye, kusisinawo maonde okutangisisa kuibva andinodisisa aya.

²Vanhu vanotya Mwari vapera pasi pano, muvanhu'mu hamusisina mutsvene. Vose zvavo vanohwandirana vachida kuurayana vachivhimana nomumbure hama nehama.

³Uipi ndohwavana maoko nahwo, ishasha chaidzo pakuhuita, gurukota nomutongi vose vanoda pfumbamuromo, mukuru mukuru chaiye anototaura zvake zvakaipa zviri mumwoyo make vobva vatoiruka nyaya yacho pamwechete.

⁴Wakanakisisa chaizvo pakati pavo akaita sorukato ari pachokwadi chaipo wacho akaita soruzhowa rweminzwa. Rasvika zuva riya rokurangwa zuva renharirire[14] zvokukangaidzwa kwenyu zvauya zvino.

⁵Rega kuvimba nomumwe wako kana kuvimba neshamwari zvayo, bata rurimi rwako kunyange kumudzimai wako chaiye

⁶nokuti mwanakomana haachambooni baba vake sechinhu mwanasikana achimukirawo amai vake muroora achipandukira vamwene vake. Mhandu dzomunhu dzava vanhu vomumba make chaimo.

⁷Asi kana ndiri ini, changu kutarisa kuna Tenzi. Ndichamirira Mwari, ruponesi rwangu, Mwari wangu achandinzwa.

⁸Muvengi wangu iwe, rega zvako kunditi toko waro. Kana dai ndikaputsikira pasi, ndichamuka, kana dai ndikagara zvangu murima Tenzi achava chiedza changu.

⁹Ndichatirira zvangu kushatirirwa kwandakaitwa naTenzi nokuti ndakamutadzira kusvikira iye Mwari ava kutondirevererawo andienzanisirawo mhosva yangu. Achandisvitsa kuchiedza ndichitozvionerawo kununura kwake.

¹⁰Ipapo vavengi vangu vachazviona, nyika igobatwa nenyadzi, nyika yaimbonditi, “Ko Tenzi, Mwari wako aripiko?” Ndichanyatsoitarisa nyika iyoyo izvozvo ichitsokodzerwa pasi samatope munzira.

¹¹Richasvika haro zuva rokuvaka masvingo ako. Pazuva iroro muganho wenyika uchasvika uko nokokoko.

¹²Pazuva iroro vanhu vachauya kwauri vachibva kuAsiria nokumaguta ekuIjipiti uye kubva kuIjipiti kundosvikawo kurwizi rweYufuratesi kubvawo kugungwa kundosvikawo kugungwa kubvawo kugomo kundosvika kune rimwe gomo.

¹³Asi nyika ichasara yava renje pamusana pavagari vayo uri mubayiro wezviito zvavo.

¹⁴Fudzai vanhu venyu nomudonzo wenyu, danga renyu renhaka vava kungogara zvavo voga musango mukati menyika yamapindu. Varegei vandofura zvavo muBhashani nomuGireadhi sapamazuva apasichigare.

¹⁵Sapamazuva aya amakabuda munyika yeIjipiti muvaratidze zvinhu zvinoshamisa.

¹⁶Marudzi avanhu achazvionerawo agonyara vaine simba ravo zvavo kudaro. Vachati nazvo muromo kapu vachitodzivira nzeve nazvo.

¹⁷Vachananzva guruva senyoka sezvinokambaira zvapasi pano. Vachabuda vachihuta kudedera munhare dzavo dzokuhwanda hondo. Vachatendeukira kuna Tenzi, Mwari wedu vachitya pamusana penyu.

¹⁸Ndiani Mwari akaita semi anoregerera uipi anokanganwira vanhu kukanganisa kuchitsama chavakasara chenhaka yake. Iye haarambi akashatirwa narini narini nokuti chaanofarira kuita mwoyochena.

¹⁹Achatinzwira ngoni zvakare agotsokodzera uipi hwedu pasi petsoka dzake. Muchakanda zvitadzo zvedu zvose pasi pasi pegungwa.

²⁰Imi mucharatidza vokwaJakobho kutendeseka kwenyu muchionesawo vokwaAbhurahamu mwoyochena wenyu sokupika nemhiko kwamakaita kumadzibaba edu kubvira pasichigare.