Read Bhaibhiri Idzva rechiShona Nahumu 1 Bible Online

Nahumu 1 - Bhaibhiri Idzva rechiShona bible

Nahumu 1

¹Chirevo chinonangana neNinivhe. Bhuku rezvakaoneswa Nahumu wokuErikoshi.

²Tenzi ndiMwari weshanje anotsividza, Tenzi anotsividza, anoviruka nehasha, Tenzi anotsividza vavengi vake, anodzvokora vavengi vake.

³Tenzi haakurumidzi kushatirwa asi simba anaro guru uye Tenzi haaregi kuranga munhu ane mhosva. Muchamupupuri nedutu remhepo ndimo mune nzira yake makore ari huruva yetsoka dzake.

⁴Anotsiura gungwa achiriomesa anopwisa nzizi dzose kuBhashani nokuKarimero kuchisvava pfumvudza yeRebhanoni ichinava.

⁵Pamberi pake makomo anodedera zvikomo zvichinyongodeka, pamberi pake nyika inonyandurwa, pasi pose nezvose zvigere mairi.

⁶Ndiani chaizvo angamirisane nehasha dzake? Chaizvo ndiani angapamire paanenge aviruka nehasha? Hasha dzake dzinoita zvokuviruka somoto matombo achitsemurwa-tsemurwa naye.

⁷Tenzi akanaka, inhare yokuhwanda pazuva rokutambudzika. Iye anozivawo vanotizira kwaari.

⁸Asi nemafashamo achanyatsoritsvaira panzvimbo paro achironda vavengi vake kusvikira murima.

⁹Ibanganoi ramunoitira Tenzi? Achanyatsotsvaira kupedza vavengi vake. Haapamhidzi ruviri kunyatsovatsividza

¹⁰savanhu vakadhakwa nezvokunwa vacharoromeswa seminzwa yakakochekerana uye sezvidzitsi zvemashanga zvakaoma.

¹¹Handiti mamuri makabva mumwe akarongera Tenzi chimwe chinhu chakaipa akapa mazano asina maturo?

¹²Zvanzi naTenzi Mwari, “Kunyange zvavo vaine simba uye vakawanda, vachapfuudzwa vakatsakatika. Kunyange zvangu ndakambokurwadzisa handichakurwadzisazve.

¹³Saka zvino ndava kutyora joko rake riri pauri ndigodambura-dambura tambo dzako.”

¹⁴Tenzi atema chirevo nezvako chokuti “Zita rako harichafanira kuramba richiyeukwa. Zvifananidzo zvako zvokunamata zvemabwe akavezwa nezvoutare hwakanyungurutswa ndichazviparadza mumba yavamwari vako. Ndichakuitira guva nokuti hauna maturo.”

¹⁵Inzwai munzwe tsoka dzenhumwa inouya namashoko akanaka ichiparidza nezvorugare! Imi vokwaJudha, chengetai mazuva enyu makuru itai zvamakatsidza nokuti hazvizoitika zvakare nokuti muipi haachauyezve kuzokurwisa, anyatsoparadzwa chaizvo.