Read Bhaibhiri Idzva rechiShona Nahumu 2 Bible Online

Nahumu 2 - Bhaibhiri Idzva rechiShona bible

Nahumu 2

¹Muparadzi akuvinga chengetedzaika nhare yokuzvidzivirira nayo muhondo garirirai mumugwagwa sungai dzisimbe kokai simba renyu rose.

²(Chikonzero ndechokuti Tenzi ari kudzosera pakare vokwaJakobho umambo soumambo hwokwaIsiraeri nokuti vapambi vakavarozva vakaparadza matavi avo).

³Nhoo dzamagamba ake itsvuku varwi vake vehondo vakapfeka hanzu dzakati piriviri kutsvuka, ngoro dzacho dzehondo dzinovakuma serimi romoto dzaunganidzwa dzaronganiswa, varwi vemabhiza vorimbinyuka.

⁴Ngoro dzacho dzehondo hero besanwa mumigwagwa dzichivhetemesewa kumhanya dzichipenya semwenje dzichipenya semheni.

⁵Vakuru vakuru vanodaidzwa vanotatarika vachiendako, vanomhanyira kurusvingo varonganisa zvokuzvidzivirira nazvo.

⁶Misuo yekurwizi yazarurwa muzinda wamambo, wadumbirwa nazvo.

⁷Vahosi varo vapfekenurwa hanzu vaendwa navo vasikana vanovashandira vachiungudza vachichema senjiva. Vachizvirova chipfuva.

⁸Ninivhe yakaita sedziva rine mvura yavhozhoka. Vanodaidzira kuti ngaimire ngaimire, asi hapana ari kudzokeramo.

⁹Pambai sirivha. Pambai ndarama zvinhu zvavo hazviverengeki kana upfumi hwezvose zvinokosha.

¹⁰Heko kuparara! Kuparara kuita dongo! Mwoyo yapera simba mabvi achirovana kudedera. Vanhu vose vaita musana, zviso zvese zvachiti surududu.

¹¹Riripiko zvino iro bako reshumba, bako[1] reshumba ichiri kuzvinzwa, kwayaiuyisa nyama yayo kwaiva navana vayo pasina chinovakanganisa?

¹²Shumba yacho yaibvamburira vana vayo nyama yakakwana ichidzipira hadzi yayo nyama; yaizadza mapako ayo nenyama uye mumba mayo nenyama yakadanzurwa-danzurwa.

¹³Chinzwa, Tenzi wehondo nehondo ari kuti ndanangana newe zvino. “Ngoro dzako dzehondo ndichadzipwitititsa kupisa. Shumba dzako dzichiri kuzvinzwa dzicharozvwa nebakatwa. Ndichaparadza panyika nyama yako iyoyo uye mazwi enhumwa dzako haachazonzwikazve.”