Read Bhaibhiri Idzva rechiShona Nahumu 3 Bible Online

Nahumu 3 - Bhaibhiri Idzva rechiShona bible

Nahumu 3

¹Zvakuwana iwe guta reropa! Guta rose rizere manyepo, rizerewo nezvinhu zvokupamba, kupamba kwacho kusingaperi!

²Heko kurira kwetyava! Nokuvhiririka kwemavhiri nokukakatika kwamabhiza, nokunjanjarika kwengoro dzehondo.

³Ivo varwi vamabhiza vachiuya kuzorwisa, vachivhevhetedza bakatwa nepfumo rinopenya. Vafi hero zararira, mirwi nemirwi yezvitunha, zvitunha zvisingaverengeki vachitogumburwa nezvitunha!

⁴Zvose izvozvo izvo zvichikonzerwa noufeve husingatauriki hwechifeve yacho inoyevedza asi iine mazango anouraya. Inoisa ndudzi munhamo nohufeve hwayo ihwohwo ichiisawo mhuri dzavanhu kurufu namazango ayo.

⁵Chinzwa, ini ndanangana newe, ndizvo zviri kutaura Tenzi wehondo nehondo. “Ndichakufugura marokwe ako kusvika kuuso hwako marudzi akuonerere.

⁶Nyika dzikuonerere zvinonyadzisa zvako ndichakuti tsvina pororo ndikuite sechinhu chisina maturo uve chinhu chinokatyamadza.

⁷Vose vachakuona vachakukanuka vachikusuduruka vachiti, ‘Ninivhe yaparara. Ndiani achaichemawo ndichaiwanira kupikowo vokuinyaradza.’ ”

⁸Unokunda Tebhesi here iwe guta raive pedyo naNairi? Raive rakatenderedzwa nemvura gungwa riri iro rokuridzivirira mvura iri iyo rusvingo rwayo?

⁹Itiopia ndiyo yaiva musimboti waro, ndoda Ijipiti zvakanga zvisina magumo Puti nevekuRibhia vaivawo vabatsiri varo.

¹⁰Asi iyo yakatotorwa ikaenda kuutapwa pwere dzayo dzikapwatitsirwa pasi pakona yomugwagwa wose wose chin'ange chakakandirwa vanhu vayo vanoremekedzeka vakuru vakuru vayo vose vasungwa nengetani.

¹¹Newewo uchadhakwa zvokutonyatsokundwa chaizvo ugotsvaga kwokupotera wotiza zvino muvengi.

¹²Maguta enyu etsvingo ose zvawo akaita semiti yemionde ine maonde okutanga kuibva, anoti kungoati zunzei anobva awira mukanwa momudyi.

¹³Chiona zvikwata zvako zvavarwi vava vakadzi zvavo mukati mako. Misuo mikuru yenyika yako, yakatoti hayo haradada kuzarukira zvayo vavengi vako moto waroromesa zvihuri zvako.

¹⁴Chitotekai mvura hondo zvayakukombai kudai simbaradzai zvokuzvidzivirira nazvo. Pindai mumatope! Kanyai ivhu! Batai zvikombore zvezvidhina!

¹⁵Pachaita moto uchakuparadzai bakatwa richakutsakatisai richakuparadzai semhashu. Chizviwanzai semhashu muwande sevana vemhashu.

¹⁶Wakawanza vanhu vako vemhindu dzokutengeserana kupfuura nyenyedzi dzedenga. Mhashu inotambanudza mapapiro ayo yobva yabhururuka kuenda kure.

¹⁷Machinda ako akaita semhashu, nyanzvi dzako dzezvomutemo dzava kuita semhashu dzomhara zvadzo paruzhowa nezuva rakunenge kuchitonhora. Panobuda zuva idzo dzinobhururuka dzoenda kusina anoziva kwadzinenge dzaenda.

¹⁸Vafudzi vako vakavata iwe mambo weAsiria kumbahuru kwako vakakotsira. Vanhu vako vapararira nomumakomo pasina anovakokorodza.

¹⁹Wakuvara zvingarapike ronda rako rakaipisisa kwazvo. Vose zvavo vachanzwa nezvako vacharova makwa vachiitira iwe nokuti ndiani chaizvo asina kuwirwa nohuipi hwako husingaperi?