Read Bhaibhiri Idzva rechiShona Habhakuku 1 Bible Online

Habhakuku 1 - Bhaibhiri Idzva rechiShona bible

Habhakuku 1

¹Chirevo chaMwari chakaonekwa nomuporofita Habhakuku.

²Nhai TENZI, kusvikira rinhi chaizvo ndichingochemera rubatsiro, imi musingateereri? Kana kuchema kwamuri kuti, “Ko utsinyeka uhu!” Asi imi musinganunuri?

³Chamunondionesera zvakaipa chii imi kusarurama muchikuona zvenyu? Kuparadza noutsinye zvatarisana neni, gakava nokunetsana zvinomuka.

⁴Saka mutemo waita zinyekenyeke uye hapasisina ruenzaniso runoitwa nokuti vakaipa vanokomberana varurami saka ruenzaniso rwava kuminamiswa.

⁵“Zvino chitarisai muone mukati memarudzi zvichatokushamisai zvigokukatyamadzai nokuti ndiri kuita basa mumazuva enyu rokuti kana mukarinzwa hamumboribvumi.

⁶Nokuti chiripo ndechichi, kuti ndiri kunyandutsa vaKaridhea, rudzi rwakaipa mwoyo ruya, rudzi rwavanhu akarikiriki vanobvongodza nyika yose kundopamba misha isiyavo.

⁷Vanotyisa uye vanodederesa. Kutonga kwavo ndokwomusoro wavo. Ukuru hwavo ndohwokuzvipa.

⁸“Mabhiza avo, kumhanya, mbada dzinosara pasi achityisa kupinda mhumhi dzinofamba usiku varwi vavo vamabhiza vanokakatika vachizvikudza. Heeka, varwi vavo vamabhiza vanobva kure vachibhururuka segondo risingatani kudya.

⁹“Chavanovinga vose zvavo kuzorwisa, chavananga ndichocho, havadzokeri shure vanounganidza nhapwa sejecha.

¹⁰Vanofifida kuseka madzimambo, vatongi vanoita zvokutotamba navo. Vanotoseka guta rese retsvingo nokuti vanoriitira chimutundurundu chevhu chinenge musana wenzou vobva varitora zvavo.

¹¹Vobvapo, heyo mhepo kuenda mberi, vanhu vane mhosva, simba ravo vanoritora sokunge mwari wavo.”

¹²Inga wani ndimi Chidzachapo nhai TENZI, Mwari wangu, Anoera wangu. Isu hatisi kuzofa[1] Inga imi TENZI makavasarudzira kuti vaunze ruenzaniso imi Dombo, ndimi makaita kuti vasimbarare kuti vave vokuranga.

¹³Maziso enyu akaruramisisisa zvokuti hamufaniri kutarisa zvinhu zvakaipa. Haakwanisi kutarisa kuita kwakatsauka. Munodarirei kungotarisa zvenyu vanhu vasina kutendeka kana iko kunyarara kwenyu muipi achimedza akarurama kupinda iye?

¹⁴Nokuti vanhu munovaita kuti vave sehove dzegungwa, sezvinhu zvinokambaira zvisina mutongi.

¹⁵Anoraura nechirauro ozvikukudza nomumbure wavo anozviti unge unge mumambure avo agopembera kwazvo kufara.

¹⁶Naizvozvo anobayira chibayiro kumimbure yake, opisira rusenzi kumambure ake ndizvo zvinomupa kugarika uye nezvokudya zvakawanda.

¹⁷Ko ivo vacharambokutura mimbure yavo vachingouraya zvisina tsitsi marudzi avanhu nokusingaperi here?