Read Bhaibhiri Idzva rechiShona Habhakuku 3 Bible Online

Habhakuku 3 - Bhaibhiri Idzva rechiShona bible

Habhakuku 3

¹Munamato womuporofita Habhakuku wokuita neShigionoti[4] akati,

²TENZI ndakanzwa nezvenyu uye basa renyu TENZI rinondityisa. Rivandudzei mukati memakore muite kuti rizivikanwe mukati memakore, kana mukushatirwa rangarirai tsiye nyoro.

³Mwari akabva kuTemani uye Anoera achibva kuGomo reParani, mbiri yake yakakwidibira matenga nyika ikazara nokurumbidzwa kwake. Dzepfunde

⁴Kupenya kwake kwakanga kuchiita sechiedza, mirazvo ichipenya mumaoko make, akahwandisa simba rake imomo.

⁵Mberi kwake denda rakanga rakatungamira; zvirwere zvakatsikana tsoka naro.

⁶Akasimuka akapima nyika akatarisa akadederesa marudzi, makomo apakatikati ndokuati mwarara, makomo apasichigare akati ndondondo kunyura pasi. Maitiro ake aya akanga akaita saapasichigare.

⁷Ndakaona misasa yamatendhe yokuKushi yapinda nhamo, machira okudzikatirisa enyika yeMidhia odedera.

⁸Nhai TENZI, makanga mashatirirwa nzizi here? Kana kuti hasha dzenyu dzakavirukira nzizi kana kuti makavirukira gungwa nehasha, pamakanga makatasva mabhiza enyu muri mungoro dzenyu dzehondo dzokukurira?

⁹Makasunungura hara pauta hwenyu mukaisa museve wenyu patambo yokukungisa mukatsemura nyika nenzizi. Dzepfunde

¹⁰Makomo akakuonai akazvongonyoka; mvura ine hasha ikakukura hwenje hukaunga; masaisai akasimuka mudenga.

¹¹Zuva nemwedzi zvakati mbikiti kumira panzvimbo pazvo kuchiedza chemiseve yenyu yaipembera kuenda pakuvaima kwepfumo renyu.

¹²Makatara nhanho pasi pano makatsamwa mukatsokodzera marudzi avanhu makashatirwa.

¹³Makabuda kundonunura vanhu venyu, kuponesa muzodzwa wenyu. Makapwanya musoro womuipi mukamupfekenura kusiya ava musvo kubvira kumakumbo kusvikira pamutsipa. Dzepfunde

¹⁴Makabaya varwi vake[5] musoro nemhayo dzenyu[6] vakanga vauya sechamupupuri kuzondimwararisa, vachifara kwazvo sokunge vanoda kuzhanya varombo muchivande.

¹⁵Makabvongodza gungwa namabhiza enyu, mvura yamafashafasha ine simba.

¹⁶Ndinonzwa muviri wangu uchigwagwadza, miromo yangu ichidedereswa noruzha. Ndatyorwa mapfupa ini, kufamba ndava kungodhadharika. Ndichamirira chinyararire zuva renhamo richawira vanhu vanotirwisa.

¹⁷Kunyange zvazvo mukuyu ukarega kupfumvudza, kunyange mugirepisi ukashaya michero kana pamuorivhi pakashaika michero mindawo isina kubereka chokudya zvipfuwo muzvirugu zvapera kufa mumatanga musisina mombe,

¹⁸zvakadaro zvazvo ndichafara muna TENZI. Ndichafara naMwari muponesi wangu.

¹⁹TENZI, Mwari ndiye simba rangu. Makumbo angu anoaita seemhara achindifambisa panzvimbo dzangu dzokumusoro. Izvi ndezvomuimbisi ane zvokuimbisa zvine tambo dzokuridza.