Read Bhaibhiri Idzva rechiShona Zefaniya 1 Bible Online

Zefaniya 1 - Bhaibhiri Idzva rechiShona bible

Zefaniya 1

¹Shoko rakauya kuna Zefaniya mwanakomana waKushi, mwana waGadharia mwanakomana waAmariya, mwanakomana waHezekiya, mumazuva aJosiya mwanakomana waAmoni mambo wokwaJudha.

²“Ndichanyatsotsvaira kutopedza zvose zviri pamusoro payo nyika. Ndizvo zviri kutaura Tenzi.

³Ndichatsvaira vanhu nemhuka uye ndichatsvaira shiri dzedenga nehove dzegungwa uye zvimhingamupini,[1] vanhu vakaipa, ndichatsakatisa vanhu pamusoro payo nyika. Ndizvo zviri kutaura Tenzi.

⁴“Ndichasumudzira vokwaJudha shamhu yoruoko rwangu uye vagari veJerusaremu vose zvavo. Ndichatsakatisawo munzvimbo ino vokwaBhaari vakasara uye nezita revapristi vanonamata zvifananidzo.[2]

⁵Ivo vanopfugama kunamata pamusoro pedzimba gurusvusvu rezvinhu zvomumatenga, vanopfugama pasi vachipika nezita raTenzi ivo vachipika zvavo nezita raMirikomu,

⁶navakafuratira Tenzi vasisatsvaki Tenzi kana kunzwa kuti anotii.”

⁷Chitotii zvenyu mwi-i pamberi paTenzi Mwari nokuti zuva raTenzi rosvika Tenzi akagadzirira chibayiro akazvitsaurira vaenzi vake.

⁸“Pazuva raTenzi rechibayiro ndicharanga vakuru vakuru navanakomana vamambo nevose zvavo vanopfeka hanzu dzechirudzi.

⁹Nezuva iroro ndicharanga munhu wose anodarika[3] chikumbaridzo napamusuo navanozadza dzimba dzatenzi wavo noutsinye nounyengedzi.

¹⁰“Pazuva iroro ndizvo zviri kutaura Tenzi kucharira mhere kuSuo Guru reHove kuungudza kuchibva kumana rechipiri, kungondomoka kukuru kuzvikomo.

¹¹Chemai imi vagari vokuMakiteshi nokuti vemhindu dzokutengeserana vose hapasisina ivo vokupima sirivha vose vakatsakatika.

¹²“Panguva iyoyo ndichatsvaka nerambi muJerusaremu ndichiranga vanhu ivavo vane manzvengeredzero avo vanozviti nechomumwoyo, ‘Tenzi hapana zvaanomboita, zvakanaka kana zvakaipa.’

¹³Zvinhu zvavo zvichapambwa dzimba dzavo dzichaparadzwa kunyange zvavo vakavaka dzimba havazombodzigari. Kunyange zvavo vakasima minda yemagirepisi, waini yacho havainwi.”

¹⁴Zuva guru raTenzi rosvika, rokasika chaizvo kusvika, bongozozo rezuva raTenzi rinorwadza, gamba chairo richatobongomora kuiridza mhere ipapo.

¹⁵Zuva iroro izuva rehasha musi wokutambura nokurwadzwa zuva repfumvu nokuparara musi werima nezarima zuva ramakore akati kwirindindi

¹⁶zuva rokurira kwehwamanda nokurira kwemhere yehondo yokurwisa maguta etsvingo nezvokuzvidzivirira nazvo zvakati dzu-u kureba.

¹⁷“Ndichaonesa vanhu nhamo zvokutofamba samapofu zvawo nokuti vakatadzira Tenzi. Ropa ravo richanyatsowodzvorwa seguruva uye nyama yavo sendove.”

¹⁸Kunyange sirivha yavo kana ndarama yavo haigoni kuvanunura, pamusi wehasha dzaTenzi. Nyika yose zvayo icharoromeswa mumoto wehasha dzake dzeshanje; achanyatsoyerekana avaparadza; ndozvaachaita kuvagari vapasi pano vose zvavo.