Read Bhaibhiri Idzva rechiShona Zekariya 11 Bible Online

Zekariya 11 - Bhaibhiri Idzva rechiShona bible

Zekariya 11

¹Zurura misuo yako iwe Rebhanoni moto uroromese miti yako yemisidhari.

²Iwe muti womusaipurasi ungudza nokuti miti yemisidhari yawa nokuti miti ine mbiri yaparara. Hwihwidzai kuchema imi mioku yeBhashani nokuti sango dema rarizhaniswa.

³Terera unzwe mhere yavafudzi nokuti mbiri yavo yaparadzwa. Heko kudzvova kweshumba nokuti jokotywa resango, sango raJorodhani raparara.

⁴Zvanzi naTENZI, Mwari wangu, “Iva zvako mufudzi wedanga rezvipfuwo zvakatemerwa kuuraiwa.

⁵Vanenge vadzitenga vanodziuraya voenda havo vasina kurangwa, uye vanodzitengesa vanotozviti, ‘TENZI ngaarumbidzwe!’ Ndazopfuma ini, uye vafudzi vavo chaivoivo havana tsitsi navo.

⁶Ndinodaro nokuti handisisina tsitsi navagari venyika iyi, ndizvo zviri kutaura TENZI. Rega zvako uone! Ndichaitisa vanhu kuti mumwe nomumwe awire mumaoko omufudzi wake, mumwe nomumwe achiwira mumaoko amambo wake. Vachapwanya nyika, handina wandinonunura mumaoko mavo.”

⁷Saizvozvowo ini ndakabva ndava mufudzi wedanga rezvipfuwo zvakatemerwa kuuraiwa navanoita mhindu dzokutengeserana makwai. Ipapo ndakatora tsvimbo mbiri, imwe ndakaitumidza zita rokuti, “Nyasha.” Imwewo ndikaipa zita rokuti, “Kuwirirana.” Ndakafudza hwai dzacho.

⁸Nomwedzi mumwechete chaiwo, ndakaparadza vafudzi vatatu. Asi ndakazodzamara ndotsamwa kwazvo nadzo, idzo dzaiita daka neni.

⁹Nokudaro ndakati handichava mufudzi wenyuzve. “Chafa chafa, chaparara chapararawo, zvinenge zvasara regai zvidyane kunyanya zvazvo.”

¹⁰Ndakatora tsvimbo yangu iya inonzi “Nyasha,” ndikaityora kuri kutotyora chibvumirano chandakanga ndaitirana namarudzi avanhu ose zvawo.

¹¹Nezvo chibvumirano chacho chakabvawo chadzimwa pazuva iroro. Izvozvo vaya vemhindu dzokutengeserana makwai vakanga vakaisa maziso pandiri vakabva vazviziva kuti iroro rakanga riri shoko raTENZI.

¹²Ini ndokuti kwavari, “Kana maona zvakanaka nditambiriseiwo zvenyu mubayiro wangu, asi kana zvisina uchengetei henyu.” Saka vakayera makumi matatu emari yamashekeri yesirivha.

¹³TENZI akandiudza kuti, “Iise munochengeterwa[6] upfumi,” iwo mazimari acho omubayiro wavakanditambirisa. Saizvozvo ini ndakatora makumi matatu emari yamashekeri yesirivha ndikaiisa munochengeterwa upfumi mumba yaTENZI.

¹⁴Ndakatyorawo tsvimbo yangu yechipiri iya inonzi, Kuwirirana, ndichitoparadza ukama huri pakati pevokwaJudha nevokwaIsiraeri.

¹⁵TENZI akabva ati kwandiri, “Chimbotorazve iye zvino zvombo zvomufudzi asina maturo.

¹⁶Nokuti, chinzwa, ini ndava kumutsa munyika iyi mufudzi asina hanya nedzinoparara, kana kutsvakawo dzinorasika, kunyange kurapa dzakakuvara, kana kupa chokudya dzakagwinya. Asi kuti anotodya dzakakora, achikwachura mazondo adzo.

¹⁷“Ane nhamo, mufudzi wangu, mufudzi asina maturo anotiza danga rezvipfuwo. Bakatwa ngaribaye ruoko rwake, neziso rake rorudyi. Ruoko rwake ngarubva rwanyatsoti rukutu. Ziso rake rorudyi ribve ranyatsopofomara.”