Read Bhaibhiri Idzva rechiShona Zekariya 2 Bible Online

Zekariya 2 - Bhaibhiri Idzva rechiShona bible

Zekariya 2

¹Ndakasimudza musoro ndikaona hoyo munhu ane tambo yokueresa muruoko rwake.[2]

²Ndakati, “Uri kuendepiko?” Iye akati kwandiri, “Kundoera Jerusaremu ndigoona kuti upamhi hwayo hwakadii uye kuti urefu hwayo hwakadii?”

³Ndiye onei mutumwa uya aitaura neni wauya ndokubva mumwe mutumwawo auyapo kuzosangana naye

⁴akati kwaari, “Mhanyira kumukomana uyo uti kwaari, ‘Jerusaremu ichagarwa semisha isina tsvingo zvakonzerwa nokuwanda kwavanhu nezvipfuwo mairi.’

⁵Zvichavapo ndezvokuti ini ndichava kwairi rusvingo rwomoto kuitenderera, ndizvo zviri kutaura TENZI, uye ini ndichava mbiri mairi.”

⁶“Hezvo! Hezvo iwe! Tizai kunyika yokuchamhembe ndizvo zviri kutaura TENZI nokuti ndakakuitai rumwe rumwe uyu kwake uyu kwake, kumativi mana emhepo yokumatenga, ndizvo zviri kutaura TENZI.

⁷Hezvo iwe tizirai kuguta reZioni imi mugere nomukunda iyeyo Bhabhironi

⁸nokuti zvanzi naTENZI wehondo nehondo, mushure momukurumbira wake iye akazondituma kumarudzi aya akakupambai nokuti anenge angokugunzvai watobata mboni yeziso rake,

⁹‘Chirega uone, ndichavazunzira ruoko rwangu vagova nhapwa kuna vaivashandira.’ “Ipapo ndipo pamuchazoziva kuti TENZI wehondo nehondo ndiye akandituma.

¹⁰“Imba upembere zvako iwe mukunda, guta reZioni nokuti ndichauya ndigoita musha mukati mako.” Ndizvo zviri kutaura TENZI.

¹¹Izvozvo marudzi akawanda achazvibatanidza naTENZI nomusi iwoyo uye vachavawo vanhu vangu. Ini ndichaita musha mukati mako. Ndipo pamuchazoziva kuti TENZI wehondo nehondo ndiye akandituma kwauri.

¹²Ipapo TENZI achagara nhaka vokwaJudha somugovewo wake munyika inoera achizosarudza zvakare Jerusaremu.

¹³Imi vanhuwe — e, mose zvenyu, itii mwiro kunyarara pana TENZI nokuti azvisumukira iye pachake kubva mumusha make munoera.