Read Bhaibhiri Idzva rechiShona Zekariya 7 Bible Online

Zekariya 7 - Bhaibhiri Idzva rechiShona bible

Zekariya 7

¹Mugore rechina rokutonga kwamambo Dhariusi, shoko raTENZI rakauya kuna Zekariya pamusi wechina wemwedzi wechipfumbamwe uri mwedzi waKisirevhu.

²Zvino vanhu vokuBhetieri vakanga vatumira Sharezeru naRegemereki navarume vokwavo kundoteterera kuti vaitirwe tsiye nyoro naTENZI,

³nokundobvunzawo vapristi vepamba yaTENZI wehondo nehondo navaporofita kuti, “Ndinofanira here kuchema nhamo kana kutsanya mumwedzi wechishanu sezvandanga ndichingoita kwamakore namakore?”

⁴Shoko raTENZI wehondo nehondo rakazouya kwandiri richiti,

⁵“Taura kuvanhu vose zvavo venyika iyi uye nokuvapristi uti: ‘Heya pamaitsanya muchichema nhamo mumwedzi wechishanu newechinomwe kwamakore makumi manomwe maitsanyira ini here?

⁶Kunyange napaya pamunodya napamunonwawo, handiti munenge muchitozvidyira nokuzvinwirawo zvenyu iyemi pachenyu?’ ”

⁷Jerusaremu payakange igere vanhu, zvinhu zvichibudirira zvakanaka pamwechete nemisha yayo yakaikomberedza uyewo iwo maodzanyemba nenyika yokumanhika pakwakanga kugere vanhu iwaya haasiri iwo mashoko aiparidzwa navaporofita vokutanga here?

⁸Shoko raTENZI rakauya kuna Zekariya richiti,

⁹“Zvanzi naTENZI wehondo nehondo tongai zviri pachokwadi chaipo muchiitirana mwoyo wakanaka muchinzwirana tsitsi hama nehama.

¹⁰Regai kuonesa nhamo chirikadzi nenherera nomuuyi kunyange murombo. Uye ngaparege kuva nomunhu anorongera mumwe wake mano akaipa mumwoyo.

¹¹“Asi ivo vakaramba kunzwa, vakagwikura mapfudzi vachityorera zvimiti munzeve dzavo kuti varege kunzwa.

¹²Vakaomesa mwoyo chaizvo vachiti vangadaro vakazonzwa mutemo namashoko akatumidzirwa naTENZI wehondo nehondo naMweya wake nomuromo wavaporofita vokutanga. Ndokusaka TENZI wehondo nehondo akashatirwa zvinotyisa kwazvo.

¹³Sokudaidza kwandakaita ivo vakaramba kunzwa, ndokudaidzawo kwavakazoita ini ndigokaregawo kuvateerera, ndizvo zviri kutaura TENZI wehondo nehondo.

¹⁴Uye ndakavati mwarara nechamupupuri chaicho mukati memarudzi ose avakanga vasingazivi, nezvo nyika yavakasiya yakava renje zvaro zvokushaya kana nomunhu aifamba — fambamo; saizvozvo, nyika yakanaka yaitwa renje zvino.”