Read Bhaibhiri Idzva rechiShona Zekariya 8 Bible Online

Zekariya 8 - Bhaibhiri Idzva rechiShona bible

Zekariya 8

¹Shoko raTENZI wehondo nehondo rakauya kwandiri rikati,

²“Zvanzi naTENZI wehondo nehondo ndine shanje neguta reZioni, shanje chaiyo huru uye kuti ndiri kuriitira shanje ndakaviruka nehasha dzakakura kwazvo.

³Zvanzi naTENZI ndichadzokera kuZioni ndigoita musha mukati meJerusaremu. Jerusaremu richazodaidzwa kunzi guta rakatendeseka uye kunzi Gomo raTENZI wehondo nehondo, gomo rinoera.

⁴Zvanzi naTENZI wehondo nehondo harahwa nechembere dzichatoti zvadzo mboya mboya kugara munhandare dzeJerusaremu mumwe nomumwe aine mudonzvo muruoko pari pamusana pokunyatsokwegura.

⁵Migwagwawo yeguta ichange yakazaridzana vakomana navasikana vachitamba havo mumigwagwa mayo.

⁶“TENZI wehondo nehondo ari kuti kana zvikashamisa zvazvo chitsama cheverudzi urwu chakasara mumazuva ano aya ndipo pazvingandishamisewo ini here, ndizvo zviri kutaura TENZI wehondo nehondo?

⁷Zvanzi naTENZI wehondo nehondo regai zvenyu muone, ndichanunura vanhu vangu ndivabvise kunyika yokumabvazuva nokunyika yokumadokero

⁸ndichivadzosera kuzogara mukati meJerusaremu. Ivo vachava vanhu vangu, ini ndiri Mwari wavo pachokwadi uye nomukururama.

⁹“Zvanzi naTENZI wehondo nehondo simbisai maoko imi muri kunzwa mazwi aya anobva mumiromo wavaporofita mazuva ano aya kubvira musi wakavakwa ugaro hwemba yaTENZI wehondo nehondo kuiitira kuti Temberi ivakwe.

¹⁰Ndinodaro nokuti mazuva iwayo asati asvika kwakanga kusina chaitambiriswa munhu kana chaitambirisirwa chipfuwo. Kunyange mukufamba makanga musina kuchengetedzeka kwakanaka kumuvengi nokuti ndakanga ndaita kuti vanhu vavengane.

¹¹Asi parizvino handichaitira chitsama chavanhu ava chakasara sapamazuva akare aya ndizvo zviri kutaura TENZI wehondo nehondo

¹²nokuti kuchadyarwa rugare, mugirepisi uchabereka muchero wawo ivhu richipa zvinobva mariri, matenga achadonhesawo dova rawo. Ini ndichaita kuti zvose izvozvo zvive zvevechitsama chakasara chavanhu ava.

¹³Uye sezvo imi manga mava chitukiso mukati memarudzi imi vemba yokwaJudha nemi vemba yokwaIsiraeri, saka ini ndichakununurai muve chikomborero. Regai kutya, simbisai maoko.”

¹⁴Chiripo ndechokuti zvanzi naTENZI wehondo nehondo, “Sokuronga kwandakamboita kukupinzai nhamo paya pandakatsamwiswa namadzibaba enyu ndikarega kudzora mwoyo, ndizvo zviri kutaura TENZI wehondo nehondo

¹⁵saizvozvo ndarongawo mazuva ano kuti ndichiitira Jerusaremu zvakanaka nemba yokwaJudha. Regai kutya!

¹⁶Hezvinoi zvamunofanira kuita: “Tauriranai chokwadi. Mumatare enyu, tongai zviri pachokwadi muite zvinouyisa rugare.

¹⁷“Kandai pasi zvokurongerana mano akaipa mumwoyo, murege kuda mhiko dzenhema nokuti zvose izvozvi ini ndinozvivenga. Ndizvo zviri kutaura TENZI.”

¹⁸Shoko raTENZI wehondo nehondo rakauya kwandiri richiti,

¹⁹“Zvanzi naTENZI wehondo nehondo kutsanya kwapamwedzi wechina, nokutsanya kwapamwedzi wechishanu, nokutsanya kwewechinomwe uye nokutsanya kwewechigumi kunofanira kuva mwaka yokupembera kufara namazuva makuru okupembera kune vemba yokwaJudha, naizvozvo idai chokwadi norugare.”

²⁰Zvanzi naTENZI wehondo nehondo, “Kuchati kwouya mamwe marudzi vagari vamaguta mazhinji chaivo.

²¹Vagari verimwe guta vachaenda kune rimwe racho vachiti, ‘Ngatibvei tatoenda kundoteterera kuti tiitirwe tsiye nyoro naTENZI tindotsvaka TENZI wehondo nehondo, ini ndava kuenda!’

²²Marudzi mazhinji nendudzi dzakasimba dzichauya kuzotsvaga TENZI wehondo nehondo muJerusaremu vachizoteterera kuti TENZI avanzwirewo ngoni.

²³Zvanzi naTENZI wehondo nehondo namazuva iwayo gumi ravanhu vokumarudzi endimi dzose richabata muJudha hanzu yake richiti ngatiendei nemi nokuti takanzwa kuti Mwari anemi.”