Read Bhaibhiri Idzva rechiShona Maraki 4 Bible Online

Maraki 4 - Bhaibhiri Idzva rechiShona bible

Maraki 4

¹[5] “Chinzwai, hero zuva rinouya, “Zuva rinopisa sechoto. Ipapo vanhu vanozvikudza navaiti vezvakaipa vachava zvidzitsi zvazvo zvemashanga. Zuva iroro richauya racho richavaroromesa zvokuti harivasiyire mudzi kana bazi zvaro. Ndizvo zviri kutaura Tenzi wehondo nehondo.

²Asi imi munotya zita rangu muchabudirwa nezuva roururami, zuva rine kuporesa mumapapiro maro. Muchaita chomurambamhuru semhuru dzinobuda muchirugu.

³Izvozvo muchatsokodzera pasi vakaipa nokuti vachava madota zvawo pasi petsoka dzenyu pazuva racho randichaita zvandichaita. Ndizvo zviri kutaura Tenzi wehondo nehondo.

⁴“Rangarirai mutemo womuranda wangu Mosesi murao uya nezvirevo zvandakamutemera kuHorebhu zvinosunga Isiraeri yose zvirevo nemirawo.

⁵“Chinzwai, ndichakutumirai muporofita Eriya, zuva guru raTenzi rinotyisa iroro risati rasvika.

⁶Iye achapindutsa mwoyo yamadzibaba kuti vanzwanane navana vavo uyewo kupindutsa mwoyo yavana kuitira kuti vanzwanane namadzibaba avo; nokuti ndingadaro ndikauya ndikapinza nyika murushambwa.”