Read Bhaibhiri Idzva rechiShona Mateu 14 Bible Online

Mateu 14 - Bhaibhiri Idzva rechiShona bible

Mateu 14

¹Panguva iyoyo Herodhi, mumwe wavatongi vana[15] akanzwa zvomukurumbira waJesu akati kumakurukota ake,

²“Uyu ndiJohani Muombeki akamutswa muvafi, ndokusaka achigona kuita zvishamiso izvi”

³nokuti Herodhi akanga abata Johani akamusunga ndokumuisa mujeri pamusana paHerodhiasi mudzimai womunun'una wake Firipi.

⁴Chikonzero ndechokuti Johani akanga amuti, “Hazvibvumirwi, pamutemo, kuti agare naye.”

⁵Kunyange zvazvo aida kumuuraya aitya vanhu nokuti vaimutora somuporofita.

⁶Asi pakasvika zuva rokupemberera kuberekwa kwaHerodhi, mukunda waHerodhiasi akatamba pamberi pechikwata chose chavanhu akafadza Herodhi

⁷zvokuti akatsidza nemhiko kumupa chose zvacho chaangakumbire.

⁸Asokwa mashoko naamai vake akati, “Ndipei, musoro waJohani Muombeki mudhishi iye zvino.”

⁹Mambo zvakamutambudza mwoyo asi nokuda kwemhiko dzake uye pamusanawo pavaenzi vake akati ngaapiwe.

¹⁰Akatuma munhu kuti andodimura musoro waJohani mujeri.

¹¹Musoro wake wakaunzwa uri mudhishi ukapiwa kumusikana. Iyewo akaenda nawo kuna amai vake.

¹²Vadzidzi vaJohani vakauya vakatora chitunha ichocho vakachiviga. Vakaenda vakandotaurira Jesu.

¹³Jesu paakanzwa izvi, akabva ipapo negwa akaenda kunzvimbo isina vanhu, kwake oga. Voruzhinji rwavanhu pavakazvinzwa vakatevera ikoko netsoka vachibva mumaguta.

¹⁴Paakabuda mugwa pamahombekombe, akaona chita chikuru chavanhu. Akavanzwira tsitsi akaporesa varwere vavo.

¹⁵Zuva parakanga rava kuda kudoka, vadzidzi vake vakauya kwaari vakati, “Muno murenje uye kwava kudoka. Dai machiendesa vanhu vaende mumisha vandozvitengera zvokudya.”

¹⁶Jesu akati, “Havafaniri kuenda. Vapei iyemi zvokudya.”

¹⁷Vakati kwaari, “Pano tinongova nezvingwa zvishanu nehove mbiri chete.”

¹⁸Iye akati, “Uyai nazvo kuno kwandiri.”

¹⁹Akati vanhu ngavagare pasi pauswa. Akatora zvingwa zviya zvishanu nehove mbiri. Akatarisa kudenga, ndokukomborera, ndokumedura, akapa zvingwa zviya kuvadzidzi. Vadzidzi vakazvipa kuvanhu.

²⁰Vose vakadya vakaguta. Vakaunganidza tswanda gumi nembiri dzizere dzezvimedu zvakasara.

²¹Vanhu vakadya vaiva zviuru zvishanu zvavarume tisingaverengi zvedu vakadzi navana.

²²Pakarepo akagombedzera vadzidzi kuti vakwire mugwa kuti vafanotungamira kumhiri; iye oonekana negungano riya ravanhu.

²³Paakapedza kuonekana negungano riya ravanhu akakwira mugomo ari oga kundonamata. Paakanga ava madeko, akanga arimo ari oga.

²⁴Asi igwa, panguva iyoyo, rakanga rava makiromita akawanda kubva kumahombekombe[16] richiitwa suku nasai namafungu nokuti mhepo yakanga yakanangana navo.

²⁵Kuzoti yava nguva yomurirakamwe akauya kwavari achifamba pamusoro pegungwa.

²⁶Asi vadzidzi pavakamuona achifamba pamusoro pegungwa vakatya zvikuru vachiti, “Idzimudzangara.” Vakaridza mhere nokutya.

²⁷Pakarepo Jesu akabva ataura kwavari achiti, “Tsungai mwoyo, ndini. Musatye.”

²⁸Ipapo Pita akati, “Tenzi kana murimi, itii ndiuye kwamuri ndichifambawo pamusoro pemvura.”

²⁹Iye akati, “Uya.” Pita akabuda mugwa akafamba napamusoro pemvura achienda kuna Jesu.

³⁰Pita paakaona mhepo, akatya. Akatangisa kunyura ndokudaidzira achiti, “Tenzi ndiponesei.”

³¹Pakarepo Jesu akabva atambanudza ruoko rwake akamubata achiti kwaari, “Inga une chitendero chiduku. Wakahadzikireiko.”[17]

³²Pavakakwira mugwa, mhepo yakabva yanyarara.

³³Vaya vaiva mugwa vakamugwadamira vachiti, “Zvechokwadi imi muri Mwanakomana waMwari.”

³⁴Zvino kuzoti vayambuka mhiri, vakasvika kuGenezareti.

³⁵Varume voko pavakamuziva, vakatuma nhume kunharaunda iyoyo yose vakaunza kwaari vose vairwara.

³⁶Vakamukumbirisa kuti vangobatawo mupendero wehanzu yake. Vose vakaibata vakaporeswa.