Read Bhaibhiri Idzva rechiShona Mateu 15 Bible Online

Mateu 15 - Bhaibhiri Idzva rechiShona bible

Mateu 15

¹Kwakazouya vaFarisei nenyanzvi dzomutemo kuna Jesu vachibva kuJerusaremu vachiti,

²“Sei vadzidzi venyu vachidarika tsika dzamagamuchidzanwa dzamadzitateguru? Nokuti havashambi maoko avo pavanodya.”

³Jesu akavapindura achiti, “Ko imi munodarikirei mutemo waMwari nokuda kwamagamuchidzanwa enyu?

⁴Nokuti Mwari, akati, ‘Remekedza Baba naamai vako uye kuti munhu anotaura zvakaipa nezvababa kana amai vake anofanira kuti afe.’

⁵Asi imi munoti, kana munhu akataurira baba vake kana amai vake achiti, ‘Zvandakanga ndichigona kuzokubatsirai nazvo ndazvipira kuna Mwari, haazosungirwa kuremekedza baba vake.’

⁶Saizvozvo nokuda kwamagamuchidzanwa enyu, makaita kuti shoko raMwari[18] rishaye maturo.

⁷Imi vanyengedzi, Isaya akaporofita zvechokwadi nezvenyu paakati,

⁸“ ‘Vanhu ava vanondikudza zvapamuromo chete asi mwoyo yavo iri kure neni.

⁹Kundinamata kwavo ndekwenhando vachidzidzisa, sechokwadi, mitemo yavanhu.’ ”

¹⁰Jesu akadaidza vanhu ndokuti kwavari, “Teererai munzwisise, “Munhu haan'oreswe nezvinopinda mukanwa make

¹¹asi zvinobuda mukanwa make ndizvo zvinon'oresa munhu.”

¹²Vadzidzi vake vakauya vakati kwaari, “Munoziva here kuti vaFarisei vakagumbuka pavakanzwa zvamakataura zviya.”

¹³Iye akati, “Chose chisina kudyarwa naBaba vangu chichadzipurwa.

¹⁴Varegei vakadaro, mapofu avatungamiri. Zvino kana bofu, rikatungamirira rimwe bofu vachawira vose mugomba.”

¹⁵Asi Pita akati kwaari, “Titsanangurirei muenzaniso uyu.”

¹⁶Jesu ndokuti, “Nemiwo hamunzwisise nhai?

¹⁷Hamuoni here kuti chinhu chose chinopinda mukanwa chinopfuura[19] nomudumbu chichizobva chorasirwa kunze.

¹⁸Asi chinobuda mukanwa momunhu chinobva mumwoyo, ndicho chinon'oresa munhu.

¹⁹Nokuti mumwoyo ndimo munobva pfungwa dzakaipa dzinoti, umhondi noupombwe nokufeva nokuba nokurevera vamwe nhema uye kutaura zvakaipa nezvavamwe.

²⁰Izvi ndizvo zvinon'oresa munhu asi zvokudya usina kushamba maoko hazvin'orese munhu.”

²¹Jesu akabvapo akaenda kudunhu reTire neSidhoni.

²²Hoyo mumwe mudzimai wechiKanani, womudunhu iroro, akauya achichema achiti, “Ndinzwireiwo tsitsi, Tenzi, Mwanakomana waDhavhidhi; mwanasikana wangu akagarwa zvakanyanya nomweya wakaipa.”

²³Asi Jesu haana chaakamupindura. Vadzidzi vake vakauya vakamukumbira vachiti, “Mutaurirei aende nokuti ari kutitevera achichema.”

²⁴Iye akapindura achiti, “Ini ndakatumwa kuhwai dzakarasika dzemba yaIsiraeri.”

²⁵Asi mudzimai uya akauya akapfugama pamberi pake achiti, “Tenzi, ndibatsirei zvenyu.”

²⁶Jesu akamupindura achiti, “Hazvina kunaka kutora chingwa chavana uchichikanda kuimbwa.”

²⁷Mudzimai uya akati, “Hongu zvazvo Tenzi; asi kunyange mbwanana dzinodya tumedu tunodonha pateburu yavatenzi vadzo.”

²⁸Jesu akamupindura achiti, “Iwe mudzimai chitendero chako chikuru! Ngazviitwe sokuda kwako.” Mwanasikana wake akabva anaya pakarepo.

²⁹Jesu akabva ikoko akazopfuura achitevedza gungwa reGarirea. Akakwira muchikomo ndokugara pasi imomo.

³⁰Zvita zvavanhu zvakawanda zvakauya kwaari. Vakaungana kwaari nemhetamakumbo navakaremara namapofu nembeveve navamwe vakadaro. Vakavaisa patsoka dzake. Iye akavaporesa

³¹zvokuti gurusvusvu riya ravanhu rakashamiswa, pavakaona mbeveve dzichitaura, zvirema zvaita zvakanaka nemhetamakumbo dzavakufamba namapofu avakuona. Vakarumbidza Mwari wavaIsiraeri.

³²Jesu akadaidza vadzidzi vake akati, “Ndine urombo kwazvo negungano ravanhu iri nokuti vanga vaneni kwamazuva matatu aya zvino havachisina chokudya. Handide kuvaendesa nenzara vangadaro vakaziya[20] panzira.”

³³Vadzidzi vakamubvunza kuti, “Tingawane kupi chingwa chinokwana kugutsa gungano guru ravanhu rakadai murenje muno?”

³⁴Jesu akati kwavari, “Mune zvingwa zvingani?” Ivo vakati, “Tine zvinomwe netuhove tushoma.”

³⁵Akati vanhu vagare pasi.

³⁶Akatora zvingwa zviya zvinomwe nehove. Akatenda, ndokuzvimedura ozvipa kuvadzidzi. Vadzidzi vakazvipawo kuvanhu.

³⁷Vose vakadya vakaguta. Vakanhongerera zvimedu zvakasara zvikazadza tswanda nomwe.

³⁸Vakadya vacho vaiva zviuru zvina zvavarume tisingaverengi zvedu vakadzi navana.

³⁹Jesu akazoendesa vanhu ndokukwira mugwa woenda kudunhu reMagadhani.